可以輕鬆但唔好輕敵 - 羅馬對曼聯 (賽前預測陣容)

一次反格拉沙風暴令到早幾日既雙紅會被逼改期作賽﹐亦令到曼聯球員多左幾日既休息時間。雖然踢完呢場波之後又係接近一周三賽既賽程﹐但聯賽錦標基本上已經同佢講左拜拜﹐積分榜上亦幾近確保左頭四既位置﹐所以對球隊黎講﹐除左歐霸盃賽事要全力以赴外﹐本土聯賽絕對可以輪換﹐等年輕球員同板凳球員多多磨練。

講完球隊係聯賽既狀況﹐番番黎講番呢場歐霸盃賽事先。上場首回合主場大勝羅馬六比二。雖然有四球既領先優勢﹐但失左兩個作客入球亦存在一定既危險性。千其、千其、千其唔可以輕敵﹐如一不留神係上半場早段早早失波﹐半場輸夠兩球既話﹐都咪話唔騰騰震。輪心態﹐有四球優勢就冇乜壓力；輪實力﹐更加係對方之上。再加上對方上場仲傷左三個球員﹐對本身實力唔太強既羅馬更加大打折扣﹐所以呢場球員只要保持專注同集中﹐唔派膠就應該輕輕鬆鬆完場沖涼。
基於聯賽既狀況同歐霸盃既形勢﹐預測蘇B都會FULL TEAM出擊。龍門用番迪基亞把關。後防四人組繼續上陣﹐由左至右數起會係梳爾、麥佳亞、連迪路夫同雲比沙加。中場一對防中MCFRED組合﹐麥湯文尼拍費特會係正選。 陣式都係介乎4231同4222之間﹐左中場用普巴﹐右翼用福仔﹐攻擊中場般奴費南迪斯﹐最前則會用格連活特﹐等綠木吸收下經驗。雲迪碧克、迪亞路、威廉斯等應該會下半場先慢慢入替主力球員。

預測曼聯正選陣容
迪基亞
雲比沙加 連迪路夫 麥佳亞 梳爾
拉舒福特 麥湯文尼 費特 曹巴般奴費南迪斯
格連活特