作客龍曼聯能否偷到雞呢 - 格蘭納達對曼聯 (歐霸盃八強首回合 - 預測正選陣容)

今晚凌晨3點鐘﹐歐霸盃八強首回合賽事﹐愛隊曼聯作客西班牙既格蘭納達﹐又要起身支持了。

從近況講講格蘭納達
從近況黎睇﹐格蘭先達既狀態就唔多好了。自從係三月十九號歐霸盃既賽事以2比1輸左俾莫迪之後﹐近兩場聯賽賽事都係輸波而回﹐只係入得一球﹐就失左5球﹐包括0:3輸左比維拉利爾同埋2比1輸左比華倫西亞。依家就排到第9位﹐距離第5位足足差成10分﹐想係聯賽爭取到歐洲賽既資格都係可以死左條心。不如就歐霸盃搏一搏仲大機會。睇一睇佢地今季主場成績可能都嚇你一跳﹐淨講聯賽﹐主場賽事踢左15場拎到27分﹐排係西甲第五﹐只有巴塞、馬體會、皇馬同西維爾勁過佢地﹐而作客賽事則排倒數第一﹐踢14場波拎得9分。真係主場龍﹐作客蟲﹐同曼聯係完全相反﹐主場威力不容小覷 。
講下國際賽後的曼聯
上場主場對白禮頓﹐靠格連活特尾段頭鎚入波﹐險勝二比一﹐球員狀態都係一般般﹐要破密集都係要再諗諗計。最大獲係福仔帶傷上陣下踢到72分鐘都係頂唔住﹐換出黎果陣仲要拐下拐下直入更衣室﹐呢場波我諗都係唔駛預佢。好消息既係格連活特打破入球荒﹐呢下球鎚亦係勤力回報﹐拎番唔少信心。卡叔果場既狀態認真麻麻﹐呢場波我覺得要坐坐後備先﹐下半場先換出黎搏作客入球會比較好。雖然黎緊11號要作客熱刺﹐今場仲要面對住主場龍既格蘭納達﹐但我唔認為蘇B會揀呢場波留力﹐聯賽積分上要保四都尚算穩陣﹐其他盃仔又已經玩完﹐得番歐霸盃爭下﹐冇理由大幅度輪換﹐所以我估呢場波都會全力一戰。面對主場龍既對手﹐而自己又不擅長圍攻對手﹐踢番穩守突擊會係呢場波主要戰術。想講講係曼聯係前場既逼搶總係唔係太有紀律﹐成日都係前面幾個向前逼﹐但中場線同後防線就冇跟上﹐呢樣我覺得蘇B係需要諗諗點解決﹐希望今場波可以見到有正視呢個問題。
預測曼聯正選陣容
甸軒達臣
雲比沙加 連迪洛夫 麥佳亞 梳爾
占士 麥湯文尼 費特 普巴
般奴費南迪斯
格連活特