歐霸出局的李城大戰筋疲力盡的曼聯 - 足總盃8強 (賽前分析)

Hea談曼聯 於 21/03/2021 發表 收藏文章
講講李城近況同預測正選陣容

李斯特城係歐霸盃32強賽事已出局﹐爭奪前四同足總盃就成為左佢地既目標。三月初飽受傷兵困擾﹐猶幸上周對錫菲聯開始已經有兩位球員傷癒﹐包括有莊尼伊雲斯同艾約斯﹐但攻擊重心麥迪臣同今季表現大熟大勇既哈維班尼斯仍然要繼續休息﹐未能係呢場足總盃賽事上陣。上仗用3412陣式大炒錫菲聯五球﹐前線改打雙箭頭﹐用伊恩拿祖拍住華迪﹐伊恩拿祖更大演帽子戲法﹐艾約斯則出任攻擊中場﹐亦有一球進帳。
中場就繼續依靠尼迪迪掃蕩﹐泰利文斯派牌,配合兩個出擊力幾高既列卡度彭利拿同卡斯泰尼﹐攻力都有一定保證。防線上﹐伊雲斯復出﹐繼續拍住蘇恩古同科芬拿﹐龍門繼續用穩健既舒米高。因李城有七日休息同備戰﹐相信今場正選陣容大致會同上仗相同﹐不過列卡度彭利拿可能仍有傷﹐今仗或會改用艾伯禮頓出任翼衛

預測正選陣容
舒米高
科芬拿 伊雲斯 蘇恩古
艾伯禮頓 尼迪迪 泰利文斯 卡斯泰尼
艾約斯
伊恩拿祖 華迪

講講曼聯近況同預測正選陣容
曼聯兩日前先作客AC米蘭﹐憑普巴下半場3分鐘既入球﹐以1比0險勝AC米蘭﹐總比數以2比1淘汰AC米蘭晉級。多名傷兵開始傷癒﹐包括迪基亞、普巴同雲迪碧克﹐普巴既歸來更大大減輕左般奴費南迪斯既負擔﹐但卡雲尼同拜利則未知能否係呢場賽事趕及上陣﹐而馬斯亞則未有消息﹐相信都會缺陣。曼聯賽程之密已經令到球員已經出現疲態﹐加上受傷兵問題困擾﹐想作出輪換亦未有太多選擇下﹐體能既恢復程度會係比賽既關鍵。龍門應會續用甸軒達臣﹐對AC米蘭表現不錯﹐再次力保不失﹐值得信任。一條防線相信都係以不變應萬變﹐梳爾、麥佳亞、連迪洛夫同埋雲比沙加會繼續上陣。我個人就希望泰勒斯同B.威廉斯可以上陣踢下﹐等二閘可以休息。中場方面﹐馬迪應會逗住黎踢﹐拍住費特﹐進攻build-up時馬迪就會移去二閘位協助組織﹐費特就留係中間做串聯。右翼繼續用占士﹐雖然佢攻擊力較弱﹐但跑動拼勁防守都值得繼續正選。曼聯進攻核心般奴費南迪斯就冇得休息啦﹐必定繼續滿場飛帶動球隊﹐而普巴則會出任左中場﹐幫輕一下般奴﹐等前場可以多一個持球點同用波既球員﹐係左路打小組配合撕破對方防守。前線就依靠格連活特﹐綠木近幾仗其實踢得唔錯﹐入唔到波實屬欠運﹐希望今場佢可以有所斬獲。

預測正選陣容
甸軒達臣
雲比沙加 連迪洛夫 麥佳亞 梳爾
占士 費特 馬迪 普巴
般奴費南迪斯
格連活特

戰況預測
兩隊既對賽往績黎睇就曼聯稍稍佔優﹐近三次對碰﹐曼聯係2勝1和。不過波係逐場逐場計既,往績只供參考。估計曼聯今場都會繼續其主攻既踢法﹐係前場作出逼搶﹐務求令到對方球員唔可以準確地放到長傳俾華迪去哨﹔而李城則會係中場先佈防,有機會先向前逼搶﹐打反擊為主﹐始終有華迪係度﹐有空間俾佢發揮速度先係殺著﹐加上曼聯一對中堅偏慢﹐更係針對其弱點作出攻擊。希望兩隊都有高水準表現﹐合演一場好波!
標籤: 曼聯  李斯特城  足總盃  

留言


請按此登錄後留言。未成為會員? 立即註冊
    快捷鍵:←
    快捷鍵:→