Penaldo終於開齋(賽後分析-舒列夫對曼聯)

Hea談曼聯 於 16/09/2022 發表 收藏文章
因周末對列斯聯既賽事會改期,所以坦克係毫無後顧之憂下派出最強陣容出戰歐霸盃第二場賽事。球隊繼續4-2-3-1出戰,迪基亞把守最後一關。防線由左至右係馬拿斯亞-馬天尼斯-華拉尼-達洛治。艾歷臣拍麥湯文尼組成平排中場。左右翼辛祖同安東尼聯同攻擊中場般奴費南迪斯支援取代受傷既福仔同馬仔既C朗拿度攻堅。

整場賽事舒列夫踢得其實唔差,但礙於球員級數所限,能實際創造具威脅既埋門唔多,迪基亞可謂相當清閒。曼聯整場都控球在腳主導球賽。曼聯憑17分鐘,經一輪猜傳後,突入禁區既辛祖係中間接應艾歷臣既斜傳,冷靜地右腳一cup左腳快射尾柱先開記錄。係38分鐘,C朗拿度射入由達洛治搏到既12碼領先二比零。C朗終於打開今季入球之門。球隊亦保持勝果,以二比零擊敗對手。

見到坦克既大致進攻模式
坦克暫時既進攻模式都係傾向後場保持三名球員加一名防中球員係中後場build-up。艾歷臣亦有時移後到左中堅位置去負責較炮,將馬拿斯亞同達洛治壓前提供寬度。中中堅則係屠夫主動組織,防中則交由麥湯文尼負責轉方向。進攻時,球員走位不會局限自己既位置,有時會見到馬拿斯亞係左中堅位置,艾歷臣就去左邊路,辛祖就移入中路。不停換位嘗試去拉散對方球員,總之果個區域有人就可以了。繼續以overload左路為主,清空右側為輔。後場build-up完,去到對方三閘線開始就會做小組配合嘗試打入中路,邊路則交俾單人負責出波。入第一球正正係透過係左路憑般奴同辛祖二人做左幾腳短傳,吸引左對方用人數集中防守後,交俾中路艾歷臣推進,再引到對方中堅殺出黎後,傳番去左面俾插入中間既辛祖射入。


點評下個別球員表現
戰術就好明顯了,但整體執行上仍有好大既進步空間。進攻往往死去左路,甚少快速轉向加以利用安東尼既能力。就算個波轉到去中路,個波都係去番左路發展,直接令安東尼甚少機會發揮。安東尼亦被對手左閘守得好貼,自己甚少去作盤扭突破,更多時候嘗試同隊友做配合。情況同辛祖初加盟時類似,唔敢去波扭波,有波就搵人交,咁就欠缺左球隊買你既原因。佢要更多去策動攻勢,去盤扭去突破對方創造空間,而非下下搵人交波。心態需要改變啊!當然球隊係波既轉向速度唔夠快,唔係好多波到佢腳亦有影響。

麥湯文尼則繼續扮演dirty work角色。呢樣係完全冇問題,但當要係中場中路做一個進攻接拍器就唔太得。今場所見麥湯文尼係進攻現位企位還是係轉方向既選擇決定都仍有很大進步空間。般奴費南迪斯則需要係陣地戰中更多參與球隊進攻。一缺乏空間,佢賴以成功既直線無從發揮下,佢就好似隱左形咁。要更多嘗試係對方中場線同防線間既空間現身拎波轉身,等待艾歷臣既輸送先得。艾歷臣則變成隊中不可或缺的一員,球隊既攻守節奏,派牌組織,死球處理,都全權負責。坦克絕對需要諗諗Plan B。畢竟傷病對球員黎講係非常普遍,而佢更曾經心臟出過事,絕對需要選擇適當地去使用。

最後講講C朗拿度。今場終於能成功開齋,但佢亦都錯失左一兩下都幾黃金既機會。多次無謂既現身拎波除左嘥體能之外,亦令到球隊兩側缺少左一個可靠既傳中點。佢需要更多時間留守禁區附近作短距離加速入楔捕機會去完成攻門。中場有艾歷臣有般奴,唔太需要前鋒墮後做波。兩側亦有安東尼同辛祖,留守禁區等機會或係禁區內打小組配合效果應會更佳。

總結
今場球隊既防守未有太大考驗,下場對曼城先見真章。進攻上亦仍然需要大大加強,要更多利用安東尼進襲。般奴亦需要係陣地戰貢獻更多。下場賽事將會係作客曼城,兩個光頭佬既對決。睇下坦克有咩辦法贏曼城啦!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

如果喜歡我們的文章,請即分享到︰

標籤: 曼聯  舒列夫  歐霸  

留言


請按此登錄後留言。未成為會員? 立即註冊
    快捷鍵:←
    快捷鍵:→