鶴臣：我出主力我洗輸？（賽前分析-曼聯對水晶宮）

鶴臣上場收起大部分主力球員，讓賽下以零比三不敵曼聯，成功令自己係聯賽盃出局，可以專心聯賽護級。輸波都係預左，但呢場輸波可以令到鶴臣睇到用4-4-2中低位防守去應付呢隊曼聯未必有用。今場番到黎聯賽，首先鶴臣一定會用番主力迎戰，艾度亞、艾斯、基耶、韋曉士等正選都會悉數上場；另外，如何指示中前場球員應對番曼聯三人後場出球，亦係鶴臣會解決既問題。上場實在太容易俾曼聯後場望空踢斜線。呢場相信水晶宮唔會再大敗俾曼聯，仲可以睇下艾斯有冇機會係前場拮一刀偷雞。

曼聯上場輕輕鬆鬆贏三比零晉級，隔幾日再對水晶宮，球員肯定有信心。雖然上場贏得非常輕鬆，但不得不防既係艾斯出場好短時間已經有一腳直線湯穿曼聯防線，證明此子有一定能力去策動反擊，加上佢個人速度盤扭上乘，點樣係中場截停或者凍結佢會係坦克首要任務。另外，上場坦克收起華舒福、般奴同海倫幾個正選下，幾個年輕小將同曼治都逼到馬斯亞要一齊跑，淨講跑動距離完全係今季既代表作。番到黎聯賽，如坦克起用番一眾正選，佢地又會唔會係咁跑？還是繼續好似大爺般等波到上腳推妹番兩下先？個人希望班大帝睇到班後生仔後會輕輕改變下個腦袋。預測坦克會沿用上場既攻守模式，只係人腳上作出調整。係未有其他傷兵會復出既消息下，門將繼續係安拿拿。防線會同上場一樣，達洛治同安拉拔踢二閘，中堅交俾華拉尼拍麥佳亞。防中卡斯美路逗住曼治同般奴費南迪斯踢。兩個係進攻分工上需要更加清晰，亦要安排清楚防守既企位。左右翼會係華舒福同柏利斯迪支援前鋒海倫攻堅。
預測曼聯正選陣容（4-3-3）
安拿拿
達洛治 華拉尼 麥佳亞 安拉拔
般奴費南迪斯 卡斯美路 曼治
柏利斯迪 海倫 華舒福