預測曼聯今季陣容名單及今季目標

Hea談曼聯 於 09/08/2021 發表 收藏文章
英超仲有幾日就開季,係時候預測一下今季陣容同講下今季既目標。

先講講係轉會窗買入既球員
直到現時為止,曼聯同馬達同卡雲尼續左約,係多蒙特收購左專打右翼既辛祖,從維拉重新簽入舊門將希頓,同係皇馬簽入中堅華拉尼(只欠體測)。達叔留隊絕對係有需要,佢既能力同經驗絕對可以幫助一眾年輕的攻擊中場進步(包括有梳泰爾同爆炸頭漢尼拔)。卡雲尼上季極具級數既表現令人信服,格連活特又多一年從佢身上吸經,相信再下季就要綠木擔大旗啦。由上季就已經話買,但因轉會費問題,導致今季先終於扑搥,辛祖可謂千呼萬喚咁加盟。佢既能力係多蒙特都有目共睹,加盟絕對可以幫曼聯平衡番左右邊路既攻力。希頓則會出任球隊第三門將,而華拉尼則希望係防線最後一塊拼圖。雖然佢上季既表現唔係好突出,亦有派膠,但佢既級數係毋庸置疑。28歲仔亦屬當打,佢既回追速度同身型,相信能協助麥隊長組成穩健既中堅組合。直至現時為止,曼聯係轉會市場都算對症下藥,但仍未針對中場中既位置作出補強係暫時既敗筆。

講講已經離隊同有機會離隊既球員
係上季既一隊球員中,暫時只有門將羅美路離隊他投,祝佢前程似錦。而曼聯亦有幾名年輕球員外借左去吸收經驗,包括有翼鋒鍾達希同柏利斯迪、門將比索,中堅杜安沙比亦外借左去維拉。除左以上既球員,小弟覺得隊中仍有多名球員都會被放棄又或者外借離隊。

後防方面,鐘斯傷患纏身,放棄睇黎係唯一辦法。大佬達洛特既回歸亦直接會逼走威仔威廉斯。威仔初出令人眼前一亮,但缺乏上陣時間令佢不進反退,需要外借增加比賽機會;但大佬亦絕不是一定可以留隊,還看查比亞係咪真係加盟,但小弟就覺得用大佬好過買一個三十歲既右閘啦。而文治亦應外借或者落番u隊踢下先。

中場方面,新仔占士加拿、萊維特應會外借繼續吸經。巴西仔彭利拿雖然熱身賽入左個靚波,但呢季應該都係唔會見到佢。連美斯既續約相信球會只係唔想錢才兩失,一係就賣走,一係就自用,外借就應該唔會了。梳泰爾同漢尼拔亦會番番u隊踢或外借磨練。

前線方面,辛祖既加盟直接影響迪亞路、占士同伊蘭加既出場時間。小將伊蘭加可翼可鋒,我預測佢有力留係一隊候命。占士呢兩季都停滯不前,有人買就不如放左佢,留迪亞路反而起到奇兵作用。被屌足一季既馬斯亞亦盛傳離隊在即,相信曼迷下季可以屌少一個球員。

預測一隊陣容及正選陣容
龍門方面:迪基亞同軒達臣繼續係幸福既煩惱,希頓係第三門將,格蘭利爾則做精神支柱。
後防方面:麥隊長拍華拉尼會係正選中堅組合,拜利同冰人連迪路夫任替補。開季或者會係麥隊長拍冰人先,俾少少時間華拉尼適應同融入。兩隻閘都係鐵膽雲比沙加同梳爾,大佬同泰利斯隨時候命。
中場方面:普巴會踢番中場中路,馬迪、費特、麥湯文尼,三選一幫普巴執屎,首選會係麥湯文尼。攻中繼續係般奴揸旗,雲迪碧克係替補。

前線方面:左右翼會係契仔福仔同辛祖,綠木替工,迪亞路、馬達、占士則爭一個出場機會。伊蘭加則會虎視眈眈。正前鋒則係卡雲尼同綠木輪換。福仔開季會因傷抖兩個月,相信辛祖會轉踢左路,右路則交俾綠木去踢。

踢法陣式上﹐我預測都係以4231為軸﹐將般奴費南迪斯既能力最大化﹐中後場則依靠普巴串連調度。對弱隊久攻不下時﹐則會改踢4222﹐推普巴上一格行雙核心做波。多左辛祖既加盟﹐左右邊路攻勢會比之前平均﹐但主要都仍會OVERLOAD左路為主﹐右路為輔。進攻我就唔太擔心﹐畢竟後備有不少可以改變戰局能力既球員﹐反而都係擔心中場中路防守﹐麥湯文尼又能否如簡迪一樣係中場大範圍搶截﹐始終普巴既機動力同防守意識一定係弱﹐呢個亦係擺普巴踢中場中要解決既必要問題。

今季既陣容比上一季更完整﹐實力理論上比上季更強。蘇B亦再無任何藉口去解釋點解呢季會一個盃都拎唔到。聯賽盃、足總盃﹐點都起碼要贏一個。歐聯冠軍或者有少少諗多左﹐8強我相信係基本目標﹐絕不能再次係小組賽就出局(除非身陷死亡之組)。聯賽方面則絕對要以冠軍為目標﹐而不是為保四而戰。如果呢季都係一個盃都冇﹐我諗蘇B再有光環都好難唔駛執包伏。

預測正選陣容(4231)
甸軒達臣
雲比沙加 華拉尼 麥佳亞 梳爾
辛祖 麥湯文尼 普巴 拉舒福特
般奴費南迪斯
卡雲尼
標籤: 曼聯  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→