非常掛住綠木同卡叔(賽後分析-曼聯對屈福特)

Hea談曼聯 於 27/02/2022 發表 收藏文章
蘭sir排出4-2-3-1陣式。龍門迪基亞。防線左至右係泰利斯-華拉尼-連迪路夫-雲比沙加。一對防中係馬迪拍費特。左右中場係普巴同伊蘭加。攻擊中場般奴費南迪斯支援C朗拿度攻堅。

鶴臣排出4-5-1陣式。賓科士打出任龍門。防線左至右係卡馬夏-沙米亞-卡夫卡治-安基基亞。中場線左至右係京治-卡華利-路沙-施素高-沙亞。丹尼斯踢前鋒爭取入球。

曼聯今場進攻有改善 奈何冇人擺到個波入網
見到蘭sir係進攻上都嘗試新安排。左閘泰利斯一個負責整條邊路,將普巴同般奴安放係C朗既身後,普般朗都可以互換位置,盡量保持禁區入面有兩人接應。普巴同般奴冇固定位置,控球時有極大自由度係前場走動。右路則靠伊蘭加同雲比沙加提供闊度。馬迪同費特則係中路做一對屏障,除左防守搶第一點同執第二點外,進攻幫手轉方向。費特有時都會移後變成三中堅;馬迪就會係番中場中負責控制節奏同做連接點。一對中堅就係中場線防守。整個上半場基本上都圍住對方黎踢,早段C朗同般奴都各有一下黃金機會,可惜一下中柱一下就被撲出。之後C朗亦有一下越位詐糊。半場控球有67%,射門亦有10次,但僅得1下中目標。又係把握力問題,機會創造到了,但連龍都唔中,講咩入波呢!屈福特則擺明一心求和,中場三人都係工兵型,後場亦唔會多作地面傳送,有波就向前大腳斬就算,所以曼聯今場都唔駛點作出高強度逼搶,就可以拎番控球權。屈福特兩翼都少掂波,僅得零星突破仲要失敗下,曼聯防線基本上冇受到太大考驗,迪基亞食住煙守都得。曼聯圍攻對手,但射極都唔入,半場,完。

少有地中路一下靚組織
下半場雙方都冇作出換人調動,戰況一如上半場一樣,54分鐘,C朗拿度係禁區從後俾人踢跌,球證示意比賽繼續,但慢鏡都幾清楚交代到卡馬夏出腳係唔中波淨中腳,VAR再睇都係話冇事就令人非常費解。55分鐘,曼聯少有地創造到一下非常漂亮既組織令我不得不讚。雲比沙加右路拐過一個再傳俾伊蘭加。佢被重重圍困下左腳一撥出大位,再推中路傳俾娥楣月頂既費特再斜插入禁區。費特直線塞俾禁區內既普巴,普巴打個後抽搵到入楔既伊蘭加。佢右腳一控左腳一射,可惜柱邊出界。整個攻勢非常流暢,有後上有支點,就係差最後一腳。呢下都見到普巴同C朗係禁區既不同,普巴就係有級數係禁區做支點搵人交;C朗係呢方面就冇普巴咁好,但講把握力佢就當然冇問題。

蘭sir換人求變 唔掂就再變 但換完好似仲衰
踢到62分鐘,蘭sir先換人,將狀態甚勇既辛祖先換入費特。普巴移後一格拍馬迪,擺正般奴係攻中位,左右翼就係辛祖同伊蘭加。呢著係正路既,對方攻力弱同踢法都唔經地面,用費特係地面掃都冇用,屈福特進攻時個波係空中時間多,唯一係驚馬迪叔叔體能頂唔頂到。辛祖就可以加強左面邊路進攻威脅力,嘗試拉闊對方防守再係中路入滲。鶴臣則係之後既一分鐘換入森馬同卡巴素利,陣式不變保持球隊活力。踢左幾分鍾,般奴右路45度傳中,普巴係禁區漏左,C朗係後面反應不及,未能作出射門。蘭sir見都係未入到波就再換。74分鐘將福仔同梳爾換入,換走泰利斯同馬迪,進一步加強攻力。改踢4-3-3,普巴移後一格踢單防中,般奴福仔踢兩個進攻中場支援C朗,兩翼不變踢到尾。換走馬迪係合理既。一黎體能都八八九九,二黎對方攻力接近0,只靠高波長傳,一個普巴身型頭鎚都夠頂。換走泰利斯就有斟酌餘地。右閘雲比沙加進攻弱就我呀媽都知,伊蘭加係需要隊友支援做配合,如果要換閘,點解要換梳爾都唔換達洛治加強右路側擊呢?左閘泰利斯又唔覺得佢體能跌得好緊要。換完人之後直到完場都係曼聯圍住黎攻,但一黎屈福特已經適應左你既進攻套路,二黎福仔出到黎放係中路位置,有少少形同虛設,反而令到進攻冇咁流暢。尾段球隊亦都冇創造到具威脅傳送,最後0:0完場,各得一分。

總結
都係老問題:把握力。上半場多次創造到機會,但就係擺唔到個波入網,非常懷念卡雲尼同格連活,亦係點解蘇B同蘭sir都好堅持要用綠木既原因。除左C朗同般奴,最能夠可以入波既兩個人都出唔到場果陣,就會出現呢個情況。今場解放普巴做得唔錯,但換人方面仍然有相確性。C朗踢到60-70分鐘都開始出現腳軟,又應否換走呢?我認為都冇得換,除非有卡叔或綠木。始終除佢以外,冇人踢到前鋒,有埋門觸角。要解決呢個體力問題,改打雙箭頭都係一個好方法。右閘雲比沙加冇攻力,都選擇換左閘而非右閘就有問題。對方既森馬唔見得達洛治會守唔掂。屈福特全隊縮後,根本冇空間俾福仔發揮速度,如出佢就應該擺佢踢右路等佢單打獨鬥,將伊蘭加入中路拍C朗打雙箭頭,效果可能更理想。用馬達或者連皇又會唔會係更好選擇?佢兩個比起福仔更善於同隊友配合,達叔更善長策動進攻,其實亦可一試。再一次入唔到波,蘭sir都要諗下辦法點樣加強球員既把握力。好彩足總盃出左局,球隊有一星期時間休息備戰曼城,睇下蘭sir有冇咩針對性部署。

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/
標籤: 曼聯  屈福特  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→