雙紅會睇下邊個傷（賽前分析-曼聯對阿仙奴）

阿仙奴今個轉會窗大肆擴軍，前中後龍都有買人。當中最為觸目既係前鋒基奧高尼斯、防守中場既蘇比文迪同翼鋒馬度亞基。蘇比文迪完美替代離隊既柏迪，馬度亞基則可左可右，嘗試加強側擊力，神鋒基奧高尼斯就直接加強前場既入球能力。同時睇下鯰魚效應下，可唔可以重新撻著夏維斯，等佢可以幫球隊入多幾球。

阿記賽前熱身賽終於捧到一個「酋長盃」，由對AC米蘭去到近期對畢爾包，見到新舊球員開始磨合，酋長盃更以三比零淨勝畢爾包，睇黎球員開始上力。今場雖然作客曼聯，但我相信達叔都唔會以拎一分為目標，誓必起用勝利十一人。頭半場或者會先摸一摸阿摩廉個底，唔會太早用力猛攻，到下半場先開始撳掣爭取勝利。
預測阿仙奴正選陣容（4-3-3）
拉也
添巴 沙列巴 加比爾 卡拉費奧利
奧迪哥特 蘇比文迪 懷斯
薩加 基奧高尼斯 馬天尼利

曼聯話今年冇錢冇錢都科金買左四個人，其中三個都係前場球員，管理層決定把心一橫將條垃圾前線換鬼晒佢。古拿同安保姆都係英超打滾幾年，上年更齊齊各自carry球隊，睇下夾埋一齊踢又有冇咩火花。錫斯高高大兼靚仔，雖然數據上係德甲就唔係特別標青，但曼聯球探都觀察左佢兩三年，希望今次冇入錯貨。前場實力望落就提升左唔小，但一次過咁樣換就肯肯定默契零分；中後場暫時就冇乜買賣人，唯有睇下係訓練營訓練成點。
曼聯熱身賽就幾勁啦，連拎三個飛機盃，「捧盃捧到手軟」。不過近兩場對費倫天拿同愛華頓都係贏唔到，當中發現隊波係中後場方面仍有有好多不足既地方需要改善。面對阿仙奴相對強勁既進攻火力，頂唔頂得住會係今場既重點。預測一下曼聯正選陣容，門將安拿拿好似已經復操，相信踢得到既都會係佢踢，唔得既就唯有用比連迪亞。後防方面，約羅、迪列特同梳爾應該會係正選。中場方面，因錫斯高係一場熱身賽都冇踢過，相信唔會一黎就踢正選，所以般奴會推上一格。一對平排防中會起用烏格迪同卡斯美路先求守穩。左翼衛會係必然正選多古，暫時睇佢踢熱身賽都幾fit；右翼衛睇下會唔會先起用達洛治加強防務，迪亞路隨時後備入場搏殺。前鋒方面，般奴會拍住安保姆踢左右攻擊中場。海倫都係等緊離隊，舒克斯係熱身賽冇上過陣，估計古拿應會改踢前鋒。戰術上或者都會先求穩，盡量控球在腳，唔好亂咁搏波進攻，慢慢係兩側尋找機會。
預測曼聯正選陣容（3-4-2-1）
安拿拿
約羅 迪列特 梳爾
達洛治 卡斯美路 烏格迪 多古
安保姆 般奴費南迪斯
古拿

個人認為如出上述三人，俾般奴踢一個假九或者會更合適。古拿同安保姆都擅於走空間，般奴既墮後或會令前兩者有更多空間插入，而古拿亦較適合踢攻中位，令佢踢得更自由，睇下阿摩廉到時點部署。曼聯呢場波可能未必拎到分，但希望會見到球隊踢出風格同鬥志，畢竟阿記既磨合程度係高過我地好多。曼聯，加油！