迪莊不如考慮下我地啦(歐霸盃次回合賽後分析-曼聯對巴塞隆拿)

Hea談曼聯 於 24/02/2023 發表 收藏文章
《從兩隊正選陣容睇雙方領隊思維》
馬天尼斯復出,坦克可以擺番一對最理想中堅組合-馬天尼斯拍華拉尼。梳爾踢番慣常位置-左閘。雖然對方冇左加維,但可能坦克預期對方會起用左閘既佐迪艾巴同左翼既安素法迪,所以佢安排雲比沙加踢先,希望穩住右路。卡斯美路繼續踢逗後防中,拍住費特扼守中路。中前場方面雖然人腳一樣,但位置同首回合就有唔同。般奴費南迪斯同華舒福改踢兩翼,辛祖出任攻中支援踢番前鋒既韋賀斯。呢個人腳位置調動明顯係比較進取,想係前場踢高位逼搶,務求係上半場搶到主導權。希望球隊透過高位逼搶,令巴塞犯錯從而係前半場踢轉守為攻,一改上場作客魯營前場以遮線為主,利用後場長傳放空位俾福仔跑既戰術。

沙維缺少左柏迪同加維,中前場需要大執位。好彩布斯基斯可以復出,拍住迪莊踢兩個中場,推前基斯爾踢攻擊中場,改踢4-2-3-1陣式。唔將迪莊推前,應該係想靠佢同布教授既個人技術控制中場,基斯爾則係前場多施壓俾卡斯美路。左翼唔用安素法迪,改用沙治羅拔圖;左閘亦起用巴迪而非佐迪艾巴,應該係想先守穩左路。畢竟作客奧脫福,加上首回合打和,唔需要同你搶攻,和住踢唔係壞事。右閘則改用觀迪,阿拉奧祖則拍基斯甸臣踢中堅。進攻同防守戰術同首回合一樣,都係照逼照搶,進攻以右路為主,左路則簡簡單單,巴迪後上踢晒條邊,羅拔圖則多縮入中間overload中路幫手組織,透過右路overload到對方就轉方向,係左路搵空間突破。
《般奴跳制先輸一球》
曼聯想搶主導權,但巴塞既控傳絕非省油的燈。巴塞亦冇將節奏推太快,加上布教授同迪莊係中後場串連,令巴塞係上半場有接近60%控球權,整隊傳球成功率亦有約82%,厄解左曼聯想搶主導權既戰術方針。係用人方面,坦克如果想搶主導權,就必需要搶贏中場。雖然辛祖既技術可以加強曼聯組織,但佢不擅攔截(整場只錄得一個攔截,冇interception冇解圍)未能幫到費特同卡斯美路去搶中場。坦克其實可以使用薩碧沙代替辛祖去實行中前場踢高位逼搶既理念,理應比辛祖好。曼聯未能主導球賽,難以組織到黃金機會埋門;巴塞雖然控球時間多,但前場未有核心組織者有能力係final third再做波入禁區,所以攻勢都係隔靴搔癢。強強對碰好多時都係睇下邊隊犯錯多,上半場就係曼聯既般奴突然跳制。18分鐘,巴迪係禁區都已經拎左身位保護左個波,般奴走埋去用手攬一攬巴迪,令佢失平衡跌低,咁就輸左一個十二碼。雖然當時巴迪係禁區內,但佢背對龍門係冇即時危險去威脅迪基亞,所以般奴隻手斬左佢啦。迪基亞面對利雲杜夫斯基,捉到路摸到個波都好叻架啦,巴塞領先一球番更衣室。

《安東尼既回歸作用極大;沙維換人都只能係咁》
下半場出黎坦克決定即刻換人,用安東尼入替韋賀斯,前場位置大執位。福仔踢最前;般奴打番中間;安東尼同辛祖踢兩翼。整隊加快行軍速度,多左安東尼係右路,後場多左一個放長波既攻擊點,而佢既速度同竄擾力係邊路明顯比般奴強太多。福仔踢最前亦比到巴塞防線極大壓力。坦克點用韋賀斯亦非常明確,想打高位逼搶,以轉守為攻為主要方針時就用佢;要強攻對手,要爭取入球就放棄佢。
47分鐘,費特禁區邊接應般奴橫傳,右腳一控一射撻撻地咁近柱收死迪史達根。曼聯換人後,整隊亦加強左逼搶壓力,特別係般奴同費特不停既跑動,令巴塞既組織未能好似上半場咁拖得慢亦多左失誤。安東尼既入替亦令右路多左持球點去停波,作用明顯。63分鐘,迪基亞救出觀迪近距離既頭鎚攻門,奠定贏波既基礎。67分鐘,坦克用達洛治同加拿祖入替雲比沙加同辛祖,加強邊路進攻活力同速度;70分鐘,沙維則用托利斯入替羅拔圖。73分鐘,曼聯係禁區連番施射都省中人,最後安東尼係右面左腳窩利射尾柱入網,反超前2:1。落後既巴塞再換入安素法迪同馬高斯阿朗素嘗試搏鎚。不過沙維唔換埋佐迪艾巴入黎攻就令我諗唔明,輸緊一球你都要搏架。坦克則係88分鐘用麥湯文尼換走疑似有少傷既華舒福。此舉則有少少冒險。當時球隊只領先一球,而福仔係最前打反擊既威脅係極大,可以令巴塞防線唔敢全部壓上。只要巴塞入到一球就要加時,或者福仔傷得太嚴重,否則係呢個時間唔換或者會較好。最後階段,利雲真係有一個機會射門,個波已經過左迪基亞直飛白界線,幸好仲有華拉尼護左個空門,令曼聯最後以二比一擊敗巴塞,成為歐霸盃16強既其中一隊。

《總結》
沙維呢場同時間冇左柏迪同加維,影響實在太大,而佢不論點樣換人換位都未能將影響減到最低。後備只有翼鋒叫做「見得下人」,重建之路睇黎非常漫長,但加維同柏迪兩個絕對有條件帶領巴塞重回頂級球隊行列。坦克,俾個Like佢先!呢半季見到隊波進攻同防守都有系統,先唔講work唔work,起碼每個人係場入面知要做乜。坦克再係每場利用唔同既人腳配搭去做唔同既戰術部署,亦都好肯去換人去變。今場終於唔駛靠福爺都有波入值得高興。安東尼同辛祖既回歸令前線有幸福既煩惱;麥湯文尼同達洛治既復出都令到中後場多番人手去應付四線戰線。雖然擊敗巴塞晉級16強係值得興奮,但我始終認為現有人腳踢四線係極其困難,歐霸盃出局專心本土聯賽及盃賽,唔係駛飛黎飛去仲有機會爭3冠。不過,比賽都係要全力爭勝先對得住球迷球會同自己,希望各球員可以保持狀態唔好傷,四條戰線行得幾遠就幾遠!周末係溫布萊,贏左個聯賽盃先再講!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

留言


請按此登錄後留言。未成為會員? 立即註冊
    快捷鍵:←
    快捷鍵:→