輕鬆晉級歐霸盃4強 - 曼聯對格蘭納達(賽後報告)

Hea談曼聯 於 17/04/2021 發表 收藏文章
帶住兩個作客入球優勢既曼聯,蘇B今場既正選陣容有少少出其不意,佢排出一個較為會主動進攻,技術含金量較重既一個正選陣容,想用上半場再捅多對手一刀,直接將對手晉級既機會幻滅,結果佢得嘗所願,憑卡雲尼左腳窩利射入,半場得以領先。最後加上對方既烏龍球以二比零取勝﹐晉級4強。

龍門果然繼續用迪基亞,後防亦變無可變,因梳爾、拜利同麥隊長缺陣,自然用杜安沙比拍冰人,左泰利斯右雲比沙加都係可預期既正選球員。麥湯既停賽,防中用上馬迪同費特,兩翼起用狀態大勇既格連活特同普巴,前面則出般奴同卡雲尼。擺大個頭想係半場解決對手。

簡單講下正選球員既表現
迪基亞全場都發揮穩定﹐只有下半場一下近距離頭鎚同一下遠射真係要撲下﹐其餘時間都幾得閒。冰人拍杜安仔 - 今場表現穩定﹐一搶一包亦冇乜派膠。值得一讚係兩個中堅甚少向前推進同亂放高波俾閘位球員﹐時常利用馬迪同費特去運波向前﹐亦令到隊波冇咁易失控球權。雲比沙加繼續防守出色﹐令到對方都集中進攻左路多過右邊﹐進攻就當然都係麻麻地。泰利斯D左路傳中落點同力度都係比梳爾好﹐人地既烏龍球亦都係來自佢既左路傳中﹐算係間接助攻。當有卡雲尼在陣﹐可以多出泰利斯令左路側擊力提升。馬迪今場都算係無名英雄﹐企位同遮線令到對方唔能夠輕易係中路滲入﹐亦提供左一個穩定的出球點串連中後場。費特繼續滿場飛﹐周圍係咁搶﹐亦有一兩次係中路個人推進﹐愈踢愈好。右路既綠木繼續有好表現﹐不停走位配合﹐亦有一兩腳內切射門﹐不過就唔中目標﹐長遠都係打中鋒比較好。普巴今場雖然踢左半場就被調走﹐但絕對唔係佢踢得差而換﹐而係因為佢上半場中段已經拎左面牌。今場除左有一個靚頭鎚跣後助攻俾比卡叔﹐佢既防守非常積極﹐仲有機會2黃1紅離場﹐好彩球證放過佢。般奴今場表現都唔係好差﹐不過射門鞋就好似冇帶﹐亦有一兩腳波既直線俾得麻麻地﹐今場踢左73分鐘就被換馬達入替﹐亦可以早D抖抖。卡雲尼繼續延續勇態﹐開賽早段入左一球窩利﹐亦係前場不停現身、搶點、逼搶﹐狀態番晒黎﹐禮拜日靠你啦卡叔。

講講後備球員表現
後備出黎既雲迪碧克就入替普巴打攻擊中場位置﹐推左般奴打左中場。今場都多左上腳去做波﹐但依舊都係以插入人地後防空位為主﹐蘇B真係要諗諗點先可以發揮到佢最大威力。占士入替卡叔都係比佢休息﹐占士都係亮點不多﹐繼續都係跑跑跑。好感動終於見到達叔﹐佢更間接令到對手擺左個老烏﹐佢既復出又令到曼聯既攻擊線上可以多一個變化。威仔都係入黎踩下草﹐下季如果收番達洛特﹐就外借佢出去踢下﹐冇得出場冇可能有進步。迪亞路出黎時間不多﹐但就利用到佢既速度差少少有一下單刀機會﹐不過最後比人搶左個波(我覺得係犯規)。佢值得有更多上場機會﹐絕對有能力解決曼聯右路進攻力不足既問題。

今場早早入一球﹐已經打沉左對手﹐無乜驚險下﹐既嬴到比賽﹐又可以令一眾主力早D休息﹐達致雙贏局面。禮拜日又對般尼﹐又睇下蘇B點樣排兵佈陣。

如果喜歡我們的文章,請即分享到︰

標籤: 曼聯  格蘭納達  歐霸  

留言


請按此登錄後留言。未成為會員? 立即註冊
    快捷鍵:←
    快捷鍵:→