贏波除左靠對方送禮,又係靠迪基亞(賽後分析-維拉利爾對曼聯)

Hea談曼聯 於 24/11/2021 發表 收藏文章
雙方出場陣容
卡域克排出4-2-3-1陣式。龍門迪基亞。防線左至右係泰利斯、麥佳亞、連迪路夫、雲比沙加。一對防中係麥湯文尼拍住費特。左翼係馬斯亞,右翼辛祖。攻擊中場雲迪碧克拍住C朗拿度攻堅。
艾馬利排出4-4-2陣式。龍門路爾尼。防線由左至右係艾斯杜賓拿、托里斯、艾比奧爾、科夫。中場線由左至右係高美斯、柏里祖、卡普爾、賓奴。前鋒係丹祖馬拍特基路斯。

卡域克部署有想法,但踢落好大問題
艾馬利深知曼聯豆腐般既防守只要慢慢搓住踢就自然創造到機會。整場比賽並冇急攻,慢慢地從龍門開始組織,極有耐性地尋找機會。卡域克首次領軍都見到部署,進攻時,整隊踢4-3-3,馬斯亞居中路,C朗拿度轉任左翼,麥湯逗後一格串連中後場,右翼辛祖,費特同雲迪碧克則一左一右支援前鋒。防守時,整隊放棄逼搶,陣式轉為4-4-2係中場佈防,馬斯亞同C朗拿度形成平排前鋒,將雲迪碧克拉後同麥湯文尼形成雙防中,費特移去左路防守。問題係頭廿分鐘不段出現,進攻時雲迪碧克會移左入中路當攻擊中場去進攻。當失控球權,費特需要先回中路同麥湯文尼形成平排中場,等待雲迪碧克番後連結麥湯文尼,先可以轉去左路防守。維拉利爾見到呢個時間差既漏洞,多次係左路搶完波,轉方向俾右閘科夫,佢就可以壓上聯同賓奴進攻防守力較弱既泰利斯。頭廿分鐘係右路都出左唔少傳中球去威脅曼聯後防。除左攻守轉換出現問顯,當曼聯嘗試前場逼搶亦有。C朗逼一名中堅再以孤線逼對方門將向一邊踢。兩翼追兩閘,攻擊中場位置球員看守另一名中堅。潛艇一對中場現身時,往往費特都有跟其中一位,但麥湯文尼卻選擇留守係一對中堅前面,並冇聯同費特一齊推出去,帶動整條防線向前逼,令對方其中一個中場可輕鬆轉身接應再轉方向解除逼搶,未知係卡域克指示唔好太進取,還是麥湯文尼臨場判斷有誤,但咁樣既壓迫無疑只係消耗己方球員既氣力之餘,又會暴露空位俾人進攻。一係就一齊縮,一係就一齊逼。冇得話前有前逼,後有後企既。

卡域克有樣比蘇B好就係臨場應變快
踢左大約廿分鐘,維拉利爾係控球組織都佔據主導。曼聯中場三人組亦冇一個能肩負起護波吸引防守再派牌既能力,係中後場俾潛艇逼兩逼就要解圍。就算搓到兩腳都屬於後防橫傳後傳居多。靠大腳踢前既話,左翼C朗同前鋒馬仔都鮮有地能在前場停波,就更難令對方縮後防線,而費特所面臨既問題就不停被攻擊先致命。卡域克睇到問題所在,果斷作出改變。進攻仍舊4-3-3,俾自由度雲迪碧克,但將C朗移番入中鋒位,左翼俾番馬仔去踢。防守則改為4-4-1-1,要求馬斯亞番後助守。雲迪碧克係番中路幫C朗一齊遮線。呢個調動後,明顯對方既科夫再冇咁容易可以係邊線發難。雖然見到臨場應變及改善,但唔失波既原因都係因為有迪基亞撲出對方幾下極具威脅既埋門,先可以半場不失。

講講曼聯既進攻問顯
整個上半場既進攻就係差。最有威脅竟然係左閘泰利斯既傳中球,同一下斜線湯穿維拉利爾防線。馬斯亞形同虛設,係中場迎完波,往往只選擇回傳俾左閘,就連身體語言都冇一下嘗試盤扭過人去帶生個波。中場既雲迪碧克勤力有餘,但明顯唔擅長孭住對手踢波,中場三人要靠佢一個去發動進攻實在未如理想。反而辛祖同雲迪碧克都有幾下彈傳走,再靠辛祖既個人能力係右路攪攪震都算係進攻中既清泉。麥湯文尼繼續迷失,只能係中後場轉左轉右而唔斷已經交足功課。缺少般奴同普巴兩個具級數既中場,令到曼聯進攻毫無章法同方向。你都唔能夠要求費特係進攻幫到咩手。缺少輸送下,C朗都冇機會發揮到佢既把握力。雖然進攻乏力,但後防唔失波都完成到卡域克既部署 - 唔好失波就得。

66分鐘既換人成為贏波關鍵
下半場出番黎個戰況一樣,都係維拉利爾主導,曼聯仍然係打唔出反擊。卡域克66分鐘首先作出調動,用般奴費南迪斯入替勤力有餘但進攻建樹不多既雲迪碧克,亦用福仔換入零作用既馬斯亞。真係諗唔明點解馬仔仲有得踢而連加特冇。福仔同C朗個自由度都好大,有時我係左邊就你係中間,冇話企死係一個位置。當兩個都係中路,就靠費特跑多兩步守埋左面邊路,般奴就自然移後一格防守,都幾明顯見到隊波防守時係如何遷就C朗拿度。般奴換入既威力即刻見到,多次憑佢較炮激活球隊進攻。曼聯有極強既兩翼,中路係需要有人放到波俾佢地去突破。雲迪碧克唔係差,但唔係呢家波,佢係要人同佢打小組配合彈彈彈,單出佢一個要佢做般奴做既野係冇可能做到,期待佢同般奴同場作戰,就可以注入新元素。

要不是人地送禮,要入波都唔係咁易
換完人既曼聯注入左活力,多左福仔係前場反擊既威力即刻有所提升。佢亦不停尋找對方防線既空間去做拉扯入楔。般奴在場亦多左好多對角斜線長傳同具穿透性既直線。辛祖亦立即有一下半單刀機會,可惜被龍門撲出。踢到78分鐘,維拉利爾後場由龍門組織。曼聯球員都只係高位遮線,都冇太主動向前逼搶。C朗慢慢埋去龍門施壓,路爾尼受壓下,嘗試交波俾係中路既卡普爾。當時費特企左係佢附近,佢都唔係太會意路爾尼會係呢個地帶俾波佢。個波稍欠力水,費特埋去撞一撞卡普爾,就撞左個波向前。C朗一轉身,個波就係佢前面,佢輕力一逗乖巧地笠入,為曼聯領先一比零。C朗固然射得靚,費特埋身搶截要讚,但都係靠路爾尼送禮先出現呢個機會。卡普爾身處既位置就算你俾到佢,佢都未能轉身向前只能回後,俾佢既作用不大,但個波一係呢個區域失就容易埋下輸波伏線。路爾尼既左面其實仍有球員空可以傳,大腳向前踢亦有足夠時間。曼聯真係多謝你!

辛祖終於入波係幾感動
踢到83分鐘,C朗吼到中堅頭鎚回俾門將,差少少可以偷到雞,可惜射斜。踢到90分鐘,維拉利爾右路進攻,費特再次埋身搶截成功,C朗執左個波踩個後抽俾番費特。費特橫傳俾麥湯,麥湯隨即塞個直線俾C朗跑一段。C朗再第一時間斜線俾中路既福仔。福仔推兩步已經去左左面禁區,再係左路橫傳俾中間既般奴,佢再順腳一質,交俾係右面後上既辛祖望空怒ban入網。今場佢既表現絕對值得收獲一個入球,防守不遺餘力,進攻亦開始見到同個別球員有默契。哨子聲一響,曼聯作客贏二比一,提早晉身16強。

總結
我會揀迪基亞做今場最佳球員。要不是佢屢救險球,又邊會有人地送禮再加辛祖入波呢?另外,卡域克第一場帶隊就取得勝利,順利晉身16強值得慶祝。第一場領軍比我既感覺係佢夠薑,夠膽抽起疲憊既般奴費南迪斯,亦嘗試改變球隊在場時既陣式轉換。見到唔對路就即刻改變陣式去補救,換人時間亦算早,今場帶隊表現可接受。不過,隊波既陣容配置短時間都難以解決,雲比沙加低迷既狀態以及不擅進攻既特點
、中場配置既級數所限、馬仔練習神勇比賽冇影都仲有得踢既問題,戰術上擺明踢唔到高位逼搶又點解決中後場低位防守既問題?進攻又可以點樣從後場組織?只能講句,卡sir,加油吧!

如果喜歡我們的文章,請即分享到︰

標籤: 曼聯  維拉利爾  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→