背水一戰的曼聯 - 歐霸盃次回合 — AC米蘭火拼曼聯 (賽前分析)

Hea談曼聯 於 18/03/2021 發表 收藏文章
首回合曼聯補時階段被AC米蘭憑角球攻勢頂入一球﹐被逼和1:1﹐亦因失左一個作客入球由出線形勢大好陷入出局邊緣。次回合去到聖西路球場,係必需要入到一球的情況下﹐蘇B究竟會點排兵佈陣去嘗試收復失地﹐爭取出線呢?

先簡單講講AC米蘭會如何部署
個人認為AC米蘭會沿用番上場頭30分鐘既高強度前場逼搶﹐務求係早段趁曼聯陣腳未穩下爭取入球。30分鐘後﹐會縮到落中後場開始佈防﹐以壓縮中路空間和重兵防守曼聯既左路為主﹐求穩守再伺機而動去打反擊爭取入球。上仗陣容不整下﹐作客仍然可以壓住曼聯黎踢﹐上仗贏唔到直頭係唔抵﹐加上呂布伊巴已復出﹐信心一定會有增無減!中場攻防重心基斯爾上場踢到曉飛﹐前後都見佢。攻中的巴謙戴亞斯上場的逼搶、串連、穿針引線都有不俗的表現﹐不過查拿洛古已復出﹐佢就變左一個X-FACTOR。配合東拿利伊巴﹐中前場既火力不容小覷。而曼聯面對縮後防守的球隊往往就會老鼠拉龜﹐所以只要AC米蘭既球員係防守時有紀律地整體縮後﹐保住專注同集中﹐只要冇球員自爆﹐曼聯要入波並不是一件易事。

估計蘇B排兵佈陣同踢法
先講中場
上場頭30分鐘被AC米蘭反客為主﹐被人逼到只能求其向前踢﹐等綠木占士馬仔去哨,皆因兩翼都係冇個人突破能力﹐往往背身拎波只能回後,唔能夠係邊路靠個人能力突破﹐持球殺出重圍。但今仗有福仔復出﹐佢既護波﹐突破能力遠比其他三人為佳﹐從而吸引防守球員夾擊令到其他球員可以有更多空間同時間去做波﹐加上梳爾今場必定會上陣﹐絕對能為曼聯提供到左邊推進既能力﹐破解AC米蘭既前場逼搶。右邊相信都係會先用占士﹐當進攻缺乏空間﹐此子就好似唔識踢波咁﹐但防守、跑動、拼勁﹐令到蘇B重用佢﹐相信佢作用都係拉邊﹐盡量提供寬度﹐但AC會否因而被佢拉出空間﹐我就有好有保留啦。而一對中場方面﹐相信今場普巴都會臨危受命﹐拍住麥湯文尼一齊鎮守中場。一攻一守﹐進攻將麥湯移後到二閘位置形成三中堅﹐推二閘向前變成翼衛﹐普巴在中路負責轉方向﹐串連中後場同係中路交出具穿透力既直線俾般奴﹐等佢可以係對方手臟地帶組織和發炮﹐如果選擇先出費特防守﹐我相信半場都必定會換普巴加強攻力。

再講前線
卡叔馬仔因傷未能隨隊﹐今場綠木必然擔正。上場對韋斯咸未能入波實在欠運﹐但走位、射門、隊友配合、支點等﹐一個正前鋒需要既東西已漸見進步。攻擊中場唔駛多講都一定係般奴費南迪斯,上場對AC米蘭交出一個靚助攻﹐今場多左普巴既支援下﹐應更能將佢推前﹐令佢更接近龍門從而發揮出最大威力。

最後到防線
龍門相信都繼續用甸軒﹐雖然上場失左一球佢應該要救到既作客入球﹐但人誰無過﹐佢近幾場表現值得繼續信任。一對二閘必然係左梳右雲﹐梳爾繼續解放其進攻能力﹐繼續曼聯戰術overload左路﹐而雲比沙加就繼續防守行先﹐希望能有靈光一閃既靚傳中﹐就還得神落。中堅相信都會係麥隊長麥佳亞拍冰人連迪洛夫﹐強強對碰都係用冰人多﹐上場AC前鋒亞奧踢法較為衝撞型﹐用拜利屬明智之舉﹐今場面對呂布﹐用路數型冰人或許會有不俗效果。

估計球隊戰術
估計球隊早段都會嘗試前場逼搶,如果唔太成功﹐就會縮到半場先做好防守﹐以上半場不失波為目標。下半場初段亦會貫徹上半場踢法﹐直到70分鐘才會陸續換人加強攻力﹐到尾段才放手一搏。
預測出場陣容
甸軒達臣
雲比沙加 連迪洛夫 麥佳亞 梳爾
占士 麥湯文尼 普巴 拉舒福特
般奴費南迪斯
格連活特

個人期望和總結
個人相信蘇B會必然會先出占士﹐如半場都入唔到波﹐希望佢半場就即刻換迪亞路入黎加強進攻﹐唔好太遲先換人﹐歐霸可以換5個人﹐係5個人﹐係5個人。再攻唔入就換入雲迪碧克﹐推佢打一個輔鋒角色﹐將般奴移後一格﹐加多一個前場支點﹐唔好只係人換人﹐位換位﹐要變陣啊!
最後總結一下﹐我覺得呢場波係55波﹐要曼聯去焗攻對手實在未敢樂觀。嬴唔到波唔緊要﹐但起碼要踢出拼勁同有想贏既心﹐先係曼迷樂於見到的。AC米蘭應該會有好多空間可以發揮﹐可唔可以插多刀就睇前場球員把握力了。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→