究竟係憎麥隊長定C朗還是開左荷蘭式風筒(賽後分析-曼聯對利物浦)

Hea談曼聯 於 24/08/2022 發表 收藏文章
坦克今仗改排4-2-3-1陣式。龍門迪基亞。防線由左至右係馬拉斯亞-馬天尼斯-華拉尼-達洛特。平排中場係左艾歷臣右麥湯文尼。左右翼係伊蘭加同辛祖。攻擊中場般奴費南迪斯支援華舒福攻堅。

高普沿用4-3-3陣式。龍門艾利臣。防線左至右係羅伯臣-雲迪克-祖高美斯-阿諾。逗後防中係軒達臣,左右中場中係米拿同艾利諾。左右翼係迪亞斯同沙拿支援復出既費明奴爭取入波。

坦克贏在肯變,終於冇執著自己既理念
坦克今場收起麥佳亞同C朗拿度,用上華拉尼同伊蘭加。除左用人變左外,最大轉變係放棄後場build-up。只要利物浦係前場進行逼搶,迪基亞或者後防就會大腳向前斬,等個波遠離後場,等福仔係前場嘗試爭頂,麥湯文尼就係中間執漏。放棄後場組織用上華拉尼,改善左中堅回身追波速度,亦令到球隊可以更放膽係前場進行逼搶(華拉尼或者小馬甚至會追到去對方三閘線,見下圖)
除左放棄後場組織,將陣式改踢4-2-3-1去將般奴效率最大化,亦係今場贏波關鍵。小弟從頭到尾都講般奴係一個需要球權需要自由度既攻擊中場,踢8號位會大大限制佢既發揮。今場踢番最擅長位置後,無論跑動、俾波、走位都見到佢既作用。雖然間中有派膠,但今場演出絕對係今季暫時既代表作;而改踢平排中場既另一好處則係多左一個人本身已經企係後場幫波,唔會因踢兩個8號位要前插,導致一失控球就會剩番單防中補位。坦克亦針對利物浦二閘作出部署,兩翼伊蘭加同辛祖會跑到極深位置追番兩邊閘位,避免兩閘被拉出去防守,兩閘可以專心收入中路去防守內切既沙拿同迪亞斯。左右平排中場亦會追番對面米拿同艾利諾既後上。
值得一讚既係左面既艾歷臣同馬天尼斯,當馬拉西亞被逼一對一面對沙拿,佢兩個會極快跑到附近準備補位,以防沙拿扭過馬拉西亞後,可以睇定定黎用波。整條防線再向強邊縮窄空間,今場凍結沙拿非常成功。前場進攻則以簡單為主,踢兩側俾福仔去停等支援或者有空位就去,又或者經般奴再塞直線俾兩翼推進。亦有賴利物浦會長期將防線壓上,令到後場有好多空位俾曼聯前鋒發揮,都係今場曼聯反擊流暢既原因。

一開波已經踢得好有火,早入波就信心大增
唔知係因為冇出C朗還是咁憎麥隊長,一開波已經見到曼聯整隊既精神面貌同上兩場非常唔同,波到人到既防守,高位逼搶既跑動,終於見番隊波係真係踢緊波。簡單直接既進攻,般奴幾下策動,都帶到好多威脅俾利物浦防線。16分鐘更有斬獲,左路伊蘭加同艾歷臣少有地打個撞牆落底腳面傳中,辛祖12碼點附近無人看管接應,一控一推都仲有時間,再一cup避過米拿既橫身飛剷,雲迪克又冇即刻撲出去,辛祖極冷靜地擺個波入左面網仔入網。入完波後,曼聯整隊士氣同信心都大大強左。眾將不惜氣力既跑動令到利物浦難以係後場慢慢組織。當去到前場,連般奴都會跑到去禁區線協防,可想而之曼聯係壓縮後場空間去到幾盡,前場僅留福仔去牽制對方。利物浦上半場係零次射門中目標,最有威脅果下係黎自般奴解圍變射門,好彩屠夫馬天尼斯岩岩係龍門口硬食先唔駛俾人追和。值得一讚係整條防線多次成功防守後,都會互相鼓勵擊掌,帶動全員士氣(幾耐冇見過),半場領先一球甚具說服力。

C朗都要接受佢唔會係坦克頭號選擇
下半場出黎竟然係曼聯先作出調動,唔知伊蘭加係咪有傷,但個人覺得係戰術需要。坦克用馬斯亞換入伊蘭加,將福仔改踢左路。因呀諾半場拎左張牌,加上落後一球既利記必定會將佢推得更前,坦克就想用福仔係呢個空間用速度大做文章;坦克起用剛傷癮既馬仔直接表示只要馬仔冇傷,就會係隊中第一中鋒首選,而福馬二人同場既連攜效果明顯較佳。僅踢左8分鐘,馬仔係中場拎波擺脫對手策動反擊,一腳直線交俾突破越位既福仔單刀。福仔冷靜地射個近柱,拉開比數到二比零。呢腳助攻更加確定佢既正選席位,C朗一係離隊,一係要接受做替補幫助球隊。

65分鐘打後要不是迪基亞……
下半場65分鐘開始,見到曼聯逼搶開始乏力,中後場球員向前跟進既速率明顯下降,令到利物浦多左控球時間外,更開始圍住曼聯既三閘線開始組織攻勢。坦克用費特入替辛祖加強中場跑動,中場防守重現麥費組合,推前艾力臣將般奴移去右邊。對方已成圍攻之勢,曼聯幸有迪基亞發揮神勇,更有一下極快反應撲出屠夫既篤射,先唔駛早早失波。去到81分鐘都係頂唔住,利記角球攻勢,卡華路禁區轉身怒射被擋出,門前沙拿快一步頭鎚攻門破網,追成二比一。踢到80分鐘打後,除左球員速率慢左,亦見到華拉尼同屠夫相繼抽筋,反映球員體能係極有需要加強。一周一賽咋依家,唔練點踢到季尾。

都要幫高普講下輸波原因
踢到86分鐘,坦克換入C朗、雲比沙加同雲迪碧克加強番後場球員體能同嘗試用C朗加強番前場牽引力。C朗出到黎都有一腳窩利射門高出,但出黎比賽態度都係散步式渡步式慢跑;而馬仔尾段都仲有一下斜插擺脫對手再想助攻俾雲迪碧克,兩者一比較大相逕庭。最後曼聯有驚無險,二比一勝出雙紅會拎到三分,避免連敗三場既破紀錄尷尬局面。高普就三戰兩和一敗,暫時排係第16位。賽前多達10名球員因傷缺陣,但整場比賽都仍然能控球在腳去進攻對手,見到實力上仍然較曼聯為高,只係年青人實在要時間浸,難以同泰亞高、基達及祖達等人無縫接軌,令到球隊實力打左折扣。唯一敗筆就係點解唔先出法賓奴控制中場,而係選擇落後兩球下先換佢出黎搏命。如果佢有傷,輸緊兩球都唔應該換出黎搏。出左神軒同米拿,缺少左playmaker係中路串連,米拿亦真係老了,唔能夠插入禁區進攻再回追到自己禁區防守,令到曼聯呢場波要防守相對變得簡單。巧婦難為無米之炊,高普都盡了力。

總結
見到坦克肯變陣出擊深感欣慰,再放棄自己追求既理念選擇針對對方既踢法要讚。起用華拉尼而非麥隊長,係高位逼搶立竿見影,但如對中下游踢高Q大棍就要再諗下屠夫會唔會繼續用,而華拉尼係用波上的確係比麥隊長差(仲要唔好受傷),睇下坦克如何係後場組織定高位壓逼作出取捨。呢場波整條防線抵讚,相信梳爾同麥隊長要努力練波先可重回正選位置。另外,以今場球員既積極性、鬥志同士氣先係曼迷們想見到既,見到球員抽晒筋都頂硬上,馬拉西亞怒跑90+分鐘激情二段飛剷,如果最後頂唔住利記強攻倒輸兩球都收晒貨。今場除左MVP馬天尼斯踢出身價外,無名英雄麥湯文尼亦值得表揚,保護防線同係中場搶波爭奪都做得出色,搶到波後鮮有故亂向前推進,多次交番俾艾歷臣同隊友保持控球權,well done!下場對修咸頓,對手唔會再留咁多空間俾你進攻。除左希望可以延續呢場波既拼勁外,睇下坦克又如何係陣地戰上調較球隊。面對中下游絕對係另一種比賽模式,望住頭四前進吧!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

如果喜歡我們的文章,請即分享到︰

標籤: 英超  曼聯  利物浦  

留言


請按此登錄後留言。未成為會員? 立即註冊
    快捷鍵:←
    快捷鍵:→