皇馬勝在夠一針見血 (賽後分析-利物浦對皇馬)

Hea談曼聯 於 30/05/2022 發表 收藏文章
高普排出4-3-3陣式。龍門艾利臣。防線由左至右係羅伯臣-雲迪克-干拿迪-阿諾。法賓奴出任逗後防中,艾簡達拿、軒達臣出任左右中場中。前場三义戟左迪亞斯中文尼右沙拿。

安察洛堤排出4-3-3陣式。龍門古圖爾斯。防線由左至右係文迪-艾拿巴-米列圖-卡華查。卡斯米路出任逗後防中,卻奧斯同摩迪出任左右中場中。前線由左右翼既雲尼斯奧斯同華維迪支援賓斯馬攻堅。

高普繼續踢自己足球 安察洛堤以己之強攻敵之弱
皇馬奇蹟反勝曼城晉級,但曼城卻同利物浦踢成均勢,足見兩隊實力上係有些少距離。利物浦繼續大打進取足球,前場繼續高位逼搶,盡快爭取球賽主導。二閘繼續頻頻壓上打側擊,堅持自己今季既踢法去踢呢場比賽;安帥明白對攻或者嘗試主導球賽實屬自殺行為,中場速率亦冇可能跟得上對面,但佢有快馬雲尼斯奧斯加金球獎候選人賓斯馬,就決定等君入甕。

先講下防守,皇馬放棄前場逼搶,只要一失控球,中場就即刻退守三閘線,前場僅留賓斯馬係中場附近等,左翼雲尼斯奧斯則會睇情況回後,盡可能留守係中場同三閘線既中間位置伺機打反擊,右翼華維迪則必定要縮後夾擊迪亞斯同防守羅伯臣。卡斯米路係中路遮線,摩迪同卻奧斯兩個就係佢附近,唔輕易埋波,以堵塞中路空間為主。防線則退至禁區頂,防止身後有太多空間俾利記前場哨。進攻方面,依靠反搶利用長傳放去右閘阿諾既身後空間,等雲尼斯奧斯同賓斯馬以個人能力去偷利物浦雞,所以多次見到皇馬以二打四或五去創造攻勢。華維迪則上到黎幫就幫啦。當陣地戰時,皇馬會拖慢進攻節奏,華維迪會內收入中路牽制羅伯臣,清空邊線等卡華查後上。三場三個盡可能都唔會向前插入禁區,卡斯米路企死中間,卻奧斯係佢附近派牌,留摩迪一人係對方中場同後防線中間現身拎波。賓斯馬就睇情況拉邊或者係中路;雲尼斯奧斯主力係邊線發難。進攻上得4人會有走位,其餘則留守中後場保留人手,防止利記打反擊。依靠卻奧斯既長傳斜線去進攻羅伯臣既左路,以及雲尼斯奧斯既突破去攻擊阿諾既右路。

前三十分鐘利記佔優,尾十五分鐘響起警號,更出現一個問題球
一開波,利記前場逼搶,加上針對卻奧斯用波,神軒主動對上防止佢轉身派牌,多次令到皇馬後場要求其大腳踢前,好快就拎到球賽主導權,壓住皇馬黎踢。中段更錄得利記8射5中;皇馬係0射0中。雖然皇馬全軍退守,但因雲尼斯奧斯未必每一下都退到咁深,又或者打完反擊未番得切,右路阿諾既後上甚具威脅。要不是古圖爾斯上半場有超水準演出,撲出文尼勁射同沙拿既近距離埋門,早已失守。皇馬係防守利物浦方面,我覺得戰術上唔算太成功。反擊則只靠前面兩個零星突破,淨睇頭半個鐘,會覺得皇馬失波只係時間問題。但30分鐘過後,利記球員體能同速率明顯跌watt,前場逼搶冇咁高壓,皇馬開始拎番多少少控球權,亦創造左一個問題球。賓施馬接應中場長傳係小禁區一停,再橫傳俾後上華維迪,一輪波子機下,華維迪踩到個波向前,個波先撞到干拿迪隻腳再撞到法賓奴膝頭,彈落去企左係越位位置既賓施馬射入。決定係咪越位並唔係睇進攻方想射定係傳,而係睇當進攻方出腳後,如個波撞到防守者,防守者是蓄意玩球還是蓄意救球。若是前者,呢球係冇越位;反之就係有。球例冇寫話反彈來回幾多下先計,就睇球證主觀認為干拿迪同法賓奴係救球還是玩球。呢下球證覺得兩個球員都係救球,所以賓施馬越位唔入。利迷食完呢下救參就完半場。

皇馬偷到一球就好睇
半場出番黎,兩隊都冇作換人調動繼續踢。明顯利記球員係慢左,皇馬都多左壓上前去嘗試爭取入波。踢到58分鐘,摩迪後場右路一個持球吸引左4個紅衫上前逼,但利記中場球員當刻先番到中場,未有一齊跟進壓迫卡華查同卡斯米路。值得一讚係摩迪擺兩下一轉身就直線隊穿利記前場防守線。卡華查係右路邊線突然望空接應摩迪傳送,吸引左羅伯臣同法賓奴埋波,傳俾中間卡斯米路再斜線彈俾華維迪。當時利記明顯中後場失位,雲迪克被拉出邊線防守華維迪,禁區只餘干拿迪防守賓施馬,阿諾要係干拿迪附近準備cover。雲尼斯奧斯醒目地走阿諾身後,係尾柱接應華維迪靚既急勁地波撞入,領先一比零。由摩迪策動到入波,整個組織都非常流暢。利記突然中後場冇跟進中前場施壓,亦係其中一個失波原因。

高普換人效果有但就係入唔到
一失波,高普即刻將祖達入替今場被嚴密看管既迪亞斯加強活力。祖達出黎後,多次成功做到二傳俾隊友埋門,又或者入楔折射攻門,可惜都被神勇既古圖爾斯救出。77分鐘,高普再用基達同費明奴換入神軒同艾簡達拿,變陣4-2-4強攻對方。不過皇馬已經一心死守頂到尾,就再冇咁多空位俾你攻,加上門將神勇到好似打多一個人咁。安帥係86分鐘換入卡馬雲加,再係補時換入施巴路斯同洛迪高只係拖下時間同加強番中場活力。最後眾志成城頂到尾。以一比零擊敗紅軍,奪得今屆歐聯冠軍。

總結
先恭喜皇馬奪冠。由16強到4強奇蹟反勝曼城,恍惚幸運之神已將半隻獎盃袋落袋。利記全場24射9中0入球,MVP就梗係皇馬門將古圖爾斯奪得。守,我就覺得唔算好,真係要不是古圖爾斯…..;攻,就真係咁岩雲尼斯奧斯係打左翼而非右翼,加埋賓施馬既努力,成功偷到雞。利物浦季尾幾場都展現左後勁乏力,高普都要睇下點樣補強陣容,下季多作輪換去保留正選球員體力,去應付季尾既重要時刻。呢場波捱夜抵睇啊!

如果喜歡我們的文章,請即分享到︰

標籤: 皇馬  利物浦  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→