用兩場波作參考分析英格蘭同德國既戰術部署 (預測雙方正選陣容)

Hea談曼聯 於 26/06/2021 發表 收藏文章
歐國盃進入左16強階段,已經有連場強強對碰,實在係球迷之福。今次就想分析下英軍火拼德國既十六強賽事同預測下兩隊既正選陣容。

英格蘭修夫基既排兵佈陣
分組賽遇上克羅地亞、捷克同蘇格蘭。名氣上、牌面上,英軍都算係高其他隊少少。修夫基三場波都起用4231陣式,全部起用賴斯同加雲菲臘斯出任雙防中,務求以守為先。三場波都零封對手,但亦因踢法比較保守下,只能入到兩球。以對克羅地亞為例,頭廿分鐘既高速行軍,縱然未能入波,但已經令到克軍門前風聲鶴唳。但廿分鐘過後,卻拖慢節奏。本以為係回一段氣再黎過,但之後卻無以為計。克軍中場速率同體能明顯未能跟上英軍節奏,本應最有威脅既列比治同佩利錫亦明顯不在狀態。對住攻力疲弱既克軍都冇抽走防中換入一名較進取較有創造力既球員。入波後更退守中後場,但反擊卻未見凌厲,只想一心守到尾。入波果下係靚既,但縱觀入波前後既表現,都可以見到修夫基係以守行先。

德國路維既排兵佈陣
身陷死亡之組,同組對手有法國同葡萄牙,仲有令人眼前一亮既匈牙利。三場比賽都係用同一班正選球員,除左對匈牙利賽事起用左辛尼代替老將梅拿。睇控球比率,三場比賽德國都係主動既一方。343陣式睇黎係路維今屆既主力陣式。以對葡萄牙賽事為例,德國依舊主導球賽,進攻時,右中堅堅達會當成右閘咁打,壓到去對方既三閘線幫手出波。後場曉姆斯同魯迪加則壓上中場線,左翼衛高辛斯打晒整條左路,一對中場卻奧斯、根度簡則在中場負責控制節奏,駁腳組織進攻。右路甘美治係邊路發難。夏維斯更多時候會插入禁區接應,格拿比則走兩邊幫手側擊,梅拿就周圍走幫手串連或者入楔。呢個踢法有極大隱憂,進攻上當然可以不停overload兩側創造機會,但中路防守同右中堅既身後空間會係德國既大問題。兩名中場都不是防守勇悍形,亦不是靠跑動速率去保護防線。當一失控球權,中場只有兩名中場加兩名中堅防守,而右中堅亦壓得太上,只要對方一搶到波,突破左其中一名中場球員,吸引左魯迪加防守,曉姆斯再向左收協防。對方一個斜線轉方向,只要翼鋒跑贏堅達就可以埋門。皆因卻奧斯同根度簡都唔會夠速度去包番堅達既身後空間,葡萄牙早段既突擊同入波已經清楚見到呢個問題,只係葡萄牙既防守體系同選人實在出現極大問題,而領隊亦冇係落後二比一情況下果段換人(個人認為換走其中一個防中緊要過換走施華),最後先以二比四落敗。

預測雙方陣容同賽事戰況
用左相當長篇幅講德國隊以攻代守及防守問題,亦講左英格蘭以守行先既戰術部署,相信呢場都會係攻防戰,就睇下德國overload兩側再加中路地面滲入能否擊敗重兵佈防既英格蘭!相信路維都會覺得英格蘭同法國葡萄牙屬同一檔次,唔會胡亂試陣或作出變動,依舊用番正選十一人。紐亞出任龍門,魯迪加、曉姆斯、堅達任三中堅。左右翼衛用高辛斯同甘美治。一對防中起用根度簡同卻奧斯。前線三人則係格拿比、梅拿同夏維斯;而英格蘭方面,個人認為捷維爾同蒙特既隔離唔會對英軍造成太大影響,左閘仲有今季攻守兼備既梳爾,亦有維拉大將格利殊可以取替蒙特既位置。龍門繼續起用碧福特,獲加既防守力同經驗會比占士好,梳爾代替隔離既捷維爾。中堅麥佳亞已經可以復出,拍住用波能力不俗既史東斯,厄守中路。一對防中孖寶必然係雙斯(賴斯同菲臘斯)。福仔係呢場波絕對應該上陣,出任左翼同堅達鬥跑﹐但我相信修夫基都會繼續用愛將史達寧﹐而右翼則會起用科頓。前線則由攻中格利殊支援哈利簡尼攻城掠地。

預測德國正選陣容
紐亞
堅達 曉姆斯 魯迪加
甘美治 卻奧斯 根度簡 高辛斯
夏維斯 格拿比 梅拿

預測英格蘭正選陣容
碧福特
獲加 史東斯 麥佳亞 梳爾
科頓 賴斯 菲臘斯 史達寧
格利殊
哈利簡尼

PS: 個人會用辛祖同福仔代替科頓同史達寧出任左右翼位置

如果喜歡我們的文章,請即分享到︰

標籤: 英格蘭  德國  歐國盃  

留言


請按此登錄後留言。未成為會員? 立即註冊
    快捷鍵:←
    快捷鍵:→