狼隊,三分你值得擁有(賽後報告-曼聯對狼隊)

Hea談曼聯 於 05/01/2022 發表 收藏文章
上場曼聯以三比一擊敗般尼,但係比賽過程方面並不是一面倒碾壓對手。蘭歷克今場依舊排出上場贏波既4-4-2陣式,只係因應球員傷病情況去選擇輪換球員。龍門繼續起用迪基亞。防線方面則見到一個久疏戰陣既面孔-菲爾鍾斯。佢拍住華拉尼踢中堅,左右二閘用梳爾及雲比沙加。中前場維持不變。中場線由左至右繼續沿用辛祖、麥湯文尼、馬迪、格連活特。前鋒線則用70歲組合C朗拿度拍卡雲尼。

上半場直頭係災難演出
曼聯沿用上場既陣式同踢法,但對住實力比般尼明顯高,加上陣式上成功克制曼聯既狼隊,明顯係毫無優勢,甚至乎陷入劣勢。狼隊既3-4-3陣式,3名前場一內收入中路縮窄曼聯防線,施米度同馬卡爾再壓上邊路拉闊球場,就輕易將曼聯防線拉散。中場葡萄牙孖寶莫天奴同魯賓拿維斯技術性擊到馬迪同麥湯文尼,牢牢控制住中場節奏同快速轉向,尋找兩側空間。要不是迪基亞多次成功撲救,以及久疏戰陣但有出色表現既鍾斯多次成功攔截,曼聯早已失守。整隊曼聯多次有波在腳下犯錯,冇壓力下都可以傳左個波俾人,就令防線經常要面對突然既攻守轉換。曼聯一對中場被壓制,難以運送個波上前場。C朗多次回後中場線現身停波,但之後都係回傳居多,而唔係轉身去較炮或轉邊。中場冇人數優勢,亦缺乏進攻組織大腦。最有威脅要數到綠木自己係右路舞同有一下係邊線內切硬闖中路。左翼辛祖攪唔掂施美度,同上場對般尼比較狀態下滑得緊要,上半場形同虛設。中前場又做唔到波,又停唔到波,又唔見有蘭帥強調既高壓逼搶,就令到對方輕鬆慢慢組織尋找空間進攻。上半場以零比零結束可以話係最理想既局面。

下半場變陣有用,拎番少少主導權
下半場蘭帥決定變陣出擊,將陣式改為3-4-3,將梳爾拉後一格改踢左中堅,中中堅為華拉尼,右中堅則係鍾斯。左右翼衛係辛祖同雲比沙加。中場照舊馬迪拍麥湯。前線3人踢得較自由,綠木靠右,C朗同卡叔則會一個係最前就一個係左面,自由走動。變陣後,進攻未見起色,但因三中堅拉闊多左人數係後場組織,起碼令到隊波係傳球成功率上有上升,多左控球時間回氣;防守變成一對一,就冇咁容易走甩對手,而狼隊亦需要適應曼聯突變既防守模式,進攻即刻冇咁銳利。

變陣效果唔突出就試下再換人再變陣
踢左15分鐘後,蘭帥見球隊防守冇再咁亂就用般奴費南迪斯換入格連活特。綠木踢到呢刻既表現係隊中算有交代,但因要遷就陣式亦想保留卡叔,先換走佢而非貢獻不大既辛祖。般奴入替亦再變陣為3-4-1-2,利用兩個箭頭牽制對方三中堅,般奴聯同馬迪麥湯overload中場。般奴既技術同進攻組織力明顯帶動到整隊曼聯,短時間內亦係禁區內有一次射中楣,差少少就可以再次逆境中領先。雖然進攻有番重心去組織,但兩邊翼衛能提供既供應少得可憐,中前場個人突破力亦欠奉,難以破壞對方既防守陣型去創造空間進攻。全場僅得七射二中就知今場攻力疲弱到不行。

狼隊努力有回報,抵佢贏波拎三分
見到般奴入替令曼聯攻力有所加強,狼隊都換入大隻佬查奧爾去加強前場牽制力。呢段時間雙方踢得比較膠著,蘭帥見狀係75分鐘用華舒福換入無表現既辛祖,純粹位換位而低迷既福仔表現依舊平庸。狼隊領隊拉格亦係81分鐘用法比奧施華換入踢到乾乾地既占美利斯。踢至82分鐘,狼隊終於入波。魯賓拿維斯係中路右腳腳面片俾右路查奧爾沉底出波。鍾斯係禁區內一頭頂走,但俾莫天奴係禁區頂執到第二點,無人看管下右腳一控,翻步一射尾柱入網。由查奧爾出波一刻,狼隊只有三人係禁區內,而曼聯有多達5人。梳爾要防守被拉出邊路查奧爾,馬迪順移左中堅補防前柱位置。中間華拉尼鍾斯兩加埋雲比沙加都係一個防守一個。唯獨是麥湯文尼出現係12碼點位置,走得太入而令到禁區外既狼隊球員係無人防守,除左莫天奴,其實魯賓拿維斯都係冇人防守。麥湯文尼都並不是第一次走得太入,而令到禁區外冇人防守。落後既曼聯隨即換入伊蘭加搏鎚,而狼隊亦換入鄧當加加強防守。最後,狼隊一比零作客擊敗曼聯,全取三分。

總結
上半場要不是迪基亞左飛右撲,場波早已放入雪櫃;下半場表現需有起色,但要同「強隊」二字扯上關係就遠遠都講唔上。蘭帥黎左一個月,總共都帶左六場波,三勝兩和一負,但踢落除左見唔到佢初到埗強調既前場逼搶外,而佢強調要控球主導球賽亦見唔到。暫時只見到佢會經常改變正選陣容同陣式去應付不同對手,亦會將球員移左移右更出現辛祖福仔打翼衛既現象。不停將球員改變位置,由翼鋒轉踢攻中又踢下最前甚至踢下翼衛,對球隊同球員又係咪好事?4-4-2 / 4-2-2-2係咪最合適依家既曼聯?我覺得蘭帥心中有數。下場11號主場對住近況勇銳既維拉,如球隊再交出今場既表現同踢法模式,我相信今季要頭四完成會很有難度。

如果喜歡我們的文章,請即分享到︰

標籤: 曼聯  狼隊  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→