爭四機會死灰復燃(賽前分析-愛華頓對曼聯)

Hea談曼聯 於 08/04/2022 發表 收藏文章
阿仙奴上場爆冷以0:3輸左比韋拉帶領既水晶宮,目前少踢一場得54分,同熱刺暫時同分但因得失球較差而排系第5名。泰亞尼因傷收咧,缺少呢名出色既左閘,泰華利斯又難擔重任,逼使沙加要改踢左閘。加上中場柏迪又勇戰受傷,中場兩名主力都不在其位,令到阿仙奴系搶分上出現暗湧。曼聯上場對李斯特城只拎得一分,本身都主動放棄頭四,但阿仙奴咁樣輸一輸,又令到曼聯重燃爭四既希望。現時只欠熱刺三分,數字上仍有望後上奪四,但球員狀態低迷,更衣室氣氛怪異,場上各有各踢,欠缺鬥心既表現,縱然捉到鹿都未必識脫角。賽前傳出現任阿積士領隊坦根加下季上任曼聯領隊一職,唔知呢個消息又可唔可以激發到球員既心態,搏表現踢番場好波俾新領隊睇呢?

愛華頓身陷降班漩渦,近五場聯賽僅得一勝四負,目前以29場得25分排係尾四,距離尾三既般尼只領先一分。上場護級大戰被般尼反勝三比二,仲要係領先兩球下,對整隊士氣同信心都必然受打擊。列斯聯則踢多兩場有30分排第16名,睇下拖肥糖呢場贏唔贏到波,順便拉埋列斯聯落水先。

曼聯同愛華頓兩隊狀態都低迷,但曼聯有C朗復出,爭四希望重燃,加上新帥消息激活,望落可以睇高一線。預測蘭sir都係繼續433進攻4231防守。龍門都係迪基亞。左閘梳爾受傷,泰利斯會頂上。上場麥佳亞同華拉尼左右對調後效果不俗,今場應會繼續左華右麥。達洛特狀態較為一般,或會改用雲比沙加,針對性凍結李察利臣。麥湯文尼今季已多次證明自己不適合踢逗後防中位置,依家一週一賽下,馬迪絕對有能力先任正選。上場馬迪亦有係75分鐘入替,今場要見到佢啦。普巴同般奴費南迪斯繼續踢兩個八號位。福仔上場後備入替箭頭位置0貢獻之餘,踢落仲要冇里神氣交行貨,都係先列後備啦。左右翼都會係辛祖同伊蘭加支援前鋒C朗拿度攻堅。

預測曼聯正選陣容
迪基亞
雲比沙加 麥佳亞 華拉尼 泰利斯
般奴費南迪斯 馬迪 普巴
伊蘭加 C朗拿度 辛祖

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

如果喜歡我們的文章,請即分享到︰

標籤: 曼聯  愛華頓  

留言


請按此登錄後留言。未成為會員? 立即註冊
    快捷鍵:←
    快捷鍵:→