爆冷溫床足總盃會否令曼聯咁早墮馬 (賽前足總盃陣容預測 - 曼聯對米杜士堡)

Hea談曼聯 於 04/02/2022 發表 收藏文章
經過左多日休息,英格蘭足球戰火重開。爆冷溫床足總盃首先出場,英超曼聯係第四圈迎戰英冠既米杜士堡。米杜士堡近10場賽事只係輸過俾布力般流浪一球,獲得8勝1和1敗既戰績,暫時係英冠排係第7位,要爭上英超絕對有機會。米堡上場波就係29號踢,有6日休息下,球員狀態應該能夠保持;曼聯則係22號踢完仲要比米堡多7日,但會唔會隔得太耐而失去比賽狀態就要睇下先知。曼聯係冬季轉會窗內借走左馬斯亞、雲迪碧克同小將迪亞路。最大影響就一定係格連活事件,佢既私人問題除導致曼聯前線少左一個入波得分點外,更直接令到連加特未能逃離曼聯魔爪,而賽前又爆出「被放假」風波,今場都應該唔會見到佢。更衣室亂過亂世佳人,陣中亦有不少球員踢世盃外圍賽而要延遲歸隊,蘭sir今場要排個靚陣都咪話唔頭痕。

龍門方面,上次爆出蘭sir應承甸軒達臣會係足總盃上陣但最後反口。今場只係對英冠既米堡應該有機會啦掛。防線方面,梳爾同雲比沙加應會正選上陣,代替達洛治同去左踢外圍賽既泰利斯。連迪路夫病左,拜利已歸隊但有少傷都未能出戰。中堅華拉尼或會拍麥佳亞鎮守防線。中場方面,費特未能出戰。馬迪會負責逗住踢,麥湯文尼同般奴費南迪斯會係馬迪前面踢一對中場中。普巴應會先列後備,而漢尼拔上季尾都漸露頭角,今場都有機會後備上陣。 前線方面,小將伊蘭加有好表現會繼續正選踢左路,右路會先起用華舒福,始終辛祖狀態仍然低迷,俾佢後備出黎踢下谷狀態會較好。少左格連活,卡雲尼又申請延遲歸隊,前鋒唯有靠C朗拿度繼續擔正。

預測曼聯正選陣容(4-3-3)
甸軒達臣
雲比沙加 華拉尼 麥佳亞 梳爾
麥湯文尼 馬迪 般奴費南迪斯
華舒福 C朗拿度 伊蘭加
標籤: 曼聯  米杜士堡  足總盃  

留言


請按此登錄後留言。未成為會員? 立即註冊
    快捷鍵:←
    快捷鍵:→