沒有你﹐曼聯甚麼都不是 - 歐霸盃次回合 — AC米蘭火拼曼聯 (賽後報告)

Hea談曼聯 於 19/03/2021 發表 收藏文章
再一次拯救蘇B﹐再一次憑入波奠定勝局,再一次救國﹐講緊既就係普巴!歐霸盃次回合﹐曼聯憑普巴半場後備上陣﹐係48分鐘射入一個冷靜的入波﹐一比零險勝AC米蘭﹐晉級8強﹐再次用表現說服俾球迷聽﹐論頂級中場仍然有佢份!

先談談蘇B上半場既佈陣同部署\
出場陣容同我賽前預計既大致上一樣(詳情可睇 - 背水一戰的曼聯 - 歐霸盃次回合 — AC米蘭火拼曼聯 (賽前分析)) ﹐不同既係費特繼續正選上陣﹐將普巴先列後備﹐但亦如我所料半場入唔到波﹐下半場立刻換入﹐加強進攻火力。曼聯早段已經嘗試係前場做逼搶﹐不過AC米蘭首回合有一球作客入球下﹐故意拖慢進攻節奏﹐係後場從容不逼﹐利用二閘拉闊﹐龍門變成第三中堅﹐等曼聯中前場球員向前壓﹐先將波分向兩條邊線推進又或者等查拿洛古回到中場附近幫手做支點再分波向兩翼去哨。因AC米蘭球員用波能力不俗﹐而4411陣式亦將陣型拉到好闊﹐所以曼聯既前場逼搶都不算十分有效。所以蘇B係15分鍾後已經放棄逼搶﹐改為係高位遮線﹐逼AC米蘭以長波高波直接放過頭﹐俾前場球員去跑。曼聯明顯有備而來﹐加上麥隊長同冰人身材都好過對面既卡斯迪利祖﹐所以輕鬆奪回控球權。而AC米蘭亦冇好似第一回合係前場作高強度逼搶﹐直接改用442平排中場係中場開始佈防﹐縮窄後場空間同重兵防守左路。此舉令到曼聯看似係戰情上控制球賽﹐雖有較多控球權﹐但能製造到具威脅既埋門實在寥寥無幾。一對防中係進攻組織上提供唔到支援俾般奴﹐令到般奴要墮到較後既位置去做波。福仔亦受傷患困擾未能係左路撕破對方既密集防守﹐而右路占士雖拉到好闊﹐但佢既冇突破力﹐而出波既落點同時間亦有待進步。雖然MCFRED進攻乏力﹐但呢個組合就可以打響蘇B既如意算盤 - 半場先求不失。雖然AC米蘭上半少場都有不少機會埋門﹐但CLEAR CHANCE實在不多,絕對要歸功於一條防線同甸軒既集中。

究竟係逼於無奈既換人﹐還是深思熟慮既神級調動呢?
半場踢成零比零﹐蘇B少有地係中場就立即㩒制﹐將普巴換入福仔。小篇認為佢係前者 - 逼於無奈既換人。雖然福仔上半場既表現冇任何亮點﹐但睇數據佢同般奴都係球隊既進攻核心﹐非入一球不可既前提下﹐除非受傷﹐否則係冇理由唔繼續擺福仔係球場搏殺。千呼萬喚始出來的普巴以左中場既位置出現﹐更係48分鐘係AC米蘭小禁區附近﹐混亂之中控到個波﹐右腳先一下扮射﹐第二下先射龍門手頂﹐為曼聯攻入極度重要既一球。失左波既米蘭係64分鐘換入伊巴同達洛特加強前場同邊路側擊力﹐再係72分鐘換入巴謙戴亞斯加強突破力同串連能力。不過曼聯今場的防守實在值得一讚﹐普巴同占士係防守上亦跟得好足﹐普巴更貢獻左兩個攔截、一個搶斷和一個解圍。唔好再話佢唔防守啦 最後﹐要讚甸軒救出伊巴一個近距離既球鎚﹐再次零封對手。但都要講講既係﹐係領先一球下都仲係高位遮線又係咪一個明智選擇呢?可以討論一下。

總結
歐霸盃兩回合﹐曼聯合計贏AC米蘭二比一﹐雖然晉左級﹐但仍有大把空間可以改善。先要改善一下主場蟲作客龍既比賽表現﹐隊波狀態總唔能夠如此起伏不定﹔第二要改善既係如何輪換球員﹐傷兵陸續復出﹐可以提供到足夠既人手去輪換主力球員﹐特別係般奴同福仔﹐過度依賴兩名球員對球隊亦唔健康﹐多左普巴下我相信般奴既責任就可以縮細少少了﹔最後就係要改善球隊破密集既能力了﹐暫時都仲係未有一套板斧 / 殺著可以破到密集﹐呢樣係最最最最需要改善的地方!

展望未來既中場陣容
見到今場普巴打邊路既表現﹐小篇認為絕對可以安排普巴繼續出任此位置。馬仔狀態低迷﹔綠木係中鋒將才﹔占士缺乏突破力﹔迪亞路暫時只做奇兵﹔變左只餘福仔一個係屬於可信賴既翼鋒。右路可以交俾福仔單人作強力爆破﹐解決雲比沙加疲弱既後上能力﹐而梳爾既大爆發可以為左路提供闊度﹐普巴既復出可以係左路提供邊中結合﹐係左路加埋般奴改以小組配合進攻﹐絕對可以解決邊路既失衡。如對強隊﹐防中則用上MCFRED組合﹔對弱隊,則抽起一個﹐換上馬迪控場串連中後場﹐亦可以用普巴打番中間﹐出迪亞路打條右邊﹐擺福仔係番左路亦未嘗不可。唯獨係雲迪碧克可能要繼續坐板凳了﹐除非蘇B會改用433陣式﹐否則暫時都好難有佢既位置了

如果喜歡我們的文章,請即分享到︰

標籤: 曼聯  AC米蘭  普巴  歐霸  

留言


請按此登錄後留言。未成為會員? 立即註冊
    快捷鍵:←
    快捷鍵:→