森保一下緊一盤好大既棋

Hea談曼聯 於 03/12/2022 發表 收藏文章
日本係最後一場分組賽對西班牙,上半場落後一球下,係下半場短時間三分鐘內入兩球下反超對手,最後守到完場以首名力壓德國晉身16強,將會硬碰克羅地亞。森保一由賽前選兵到帶領球隊出線16強,由球迷狂鬧到要寫道歉信,可謂來回地獄又折返人間。球迷固然有自己既想法,不如又嘗試代入森保一既角度睇下。

《從三場分組賽睇佢既排陣換人》
身處死亡之組,第一場已經要硬碰德國。賽前必定被睇低一線。森保一排出4-2-3-1陣式。龍門係權田修一。防線左至右係酒井宏樹-板倉滉-吉田麻也-長友佑都。一對防中係遠藤航拍田中碧。左右翼係伊東純也同久保建英。攻擊中場鐮田大地支援前鋒前田大然。整條防線年紀偏大,只有板倉滉係25歲,其餘三人都超過30歲。正選有五人都係德國搵食,三人踢緊日職,另外三人則係西甲、蘇超同法甲踢波。名氣較大既富安健洋、三笘薰、南野拓實都要打後備。上半場被德國圍攻下,先失一球12碼完半場。下半場即換入富安健洋,及後再換入三笘薰、堂安律、淺野拓磨同南野拓實進攻,最後反勝二比一,以不足三成控球率贏波震驚全世界。

森保一手執三分,第二場面對哥斯達黎加。廣大球迷自然認為只要日本肯攻,拎多三分就肯定出線,梗係要排出最強陣容搶攻。森保一完全唔同諗法,哥斯達黎加都要搶分搏出線,如呢場日本打和有四分,下場只要和波都大機會出到線,就決定唔同你搶攻,以穩行先。對比上場,防線用山根視來換左酒井宏樹;中場既守田英正換左田中碧;左右翼則用上堂安律同相馬勇紀。攻擊中場鐮田大地則改為支援上田綺世。正選陣容以中前場大幅度調整,總共換左四人,防線只換左一人。上半場零比零下,又係下半場即作出調動,先換入淺野拓磨同伊藤洋輝,再係剩餘約30分鐘開始換入三笘薰同伊東純也。南野拓實本身想係零比零最後十分鐘入替加強攻力,可惜企係度等入黎果陣,日本就失左波。最後狂攻下但無功而環,一比零敗北。

最後一場天王山之戰對西班牙,情況非常清晰,贏波出線,和波睇隔離隊。森保一繼續其領軍風格,半場守住同你踢。對比上一場,防線用左谷口彰悟代替左山根視來,改踢三中堅。中場用左田中碧代替遠藤航;伊東純也改踢左翼衛,前場三人只有鐮田大地繼續正選,拍住久保建英同前田大然。正選陣容都係以中前場作大幅度輪換,總共換左四人,防線只係一人。上半場又係被圍攻下先落後一球;下半場即㩒制換入堂安律同三笘薰,短時間連入兩球反超對手,再跟住換入淺野拓磨、富安健洋同遠藤航去保住勝果,最後以不足兩成控球比率贏敗西班牙,晉身16強。

《總結》
森保一會根據對手去安排踢四後防或三中堅,只會係後防更改其中一員,盡量保持整條防線既默契。希望以老將憑經驗帶領整隊,唔會將防線作出大規模更改。防守中場用兩個,以三人作輪換去踢。前場方面除左鐮田大地係每場都係正選之外,其餘四個位置每一場都必定會換人踢,主要起用前田大然、久保建英、伊東純也。其他攻擊力比較強既球員,例如堂安律、三笘薰、淺野拓磨同南野拓實都基本上會先列後備,等下半場即換或係剩餘30分鐘後換入黎同你搏鎚。森保一既諗法係後防必須要盡量完整同默契足夠,防中兩個要有足夠體能去覆蓋中路範圍,前場幾個要同我不停去跑去搶去逼,反擊一定要快上快落。除左想係半場保持不失外,亦希望上半場可以消耗對方體能,等下半場約三十分鐘換入進攻力強技術好速度快既球員搶攻。隔四日就踢一場波下,森保一既排陣可以充份利用後備球員既體能。除左佢對球員有信心外,亦充份顯示出日本隊正選同後備球員既質素相差不遠,而落場既球員亦毋需留力,因為大家都知領隊會換盡五人名額。先收起攻力強既球員,再換入去進攻體能下跌既對方,想法亦絕對可取。正選對正選,三笘薰就未必可以恰到卡華查,但當卡華查跑上跑落60分鐘,仲要再對上三笘薰,卡華查都咪話唔頭痕。當然,去到世界盃,仲要先留力後搏鎚,得唔得架?得唔得就睇結果,但森保一帶隊就係咁,sofar暫時佢係叫成功,畢竟日本出左線。而佢選人係咪有問顯?小弟不熟日本球員不敢評論太多,但從對哥斯達黎加所見,呢班兵翼鋒好多,但缺乏攻擊中場,亦缺乏一個係中場中路可以派牌可以有創造力既球員,去破對方密集。如日本作為underdog既話,戰術上又確係未必需要呢類球員,但有總好過冇既。16強對上克羅地亞,相信森保一都會繼續佢果套先留力後搏鎚既思維,希望佢可以繼續帶領日本殺入八強!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/
標籤: 日本  世界盃  森保一  

留言


請按此登錄後留言。未成為會員? 立即註冊
    快捷鍵:←
    快捷鍵:→