有條件輪換既歐霸盃次回合 - 曼聯對格蘭納達 (賽前預測陣容)

Hea談曼聯 於 15/04/2021 發表 收藏文章
星期日18號聯賽對般尼﹐依家踢少一場差11分既情況下﹐數字上仍有後上奪冠既可能性﹐重要性相比呢場歐霸盃次回合賽事會係較為重要﹐畢竟首回合作客淨勝對手二比零﹐加上對方格蘭納達既進攻力又唔係咁強既情況下﹐呢場波係時候可以輪換一下主力球員。

上場雖然淨勝兩球,但卻有五名球員拎左黃牌,而當中三人因為儲夠牌係需要停賽,包括有麥佳亞、梳爾同埋麥湯文尼,所以今場都佢地三個都可以休息抖抖。冇左梳爾,泰利斯自不然會正選上陣,威仔都係坐住後備席先。拜利同麥佳亞都唔出得對防守方面會有一定既影響,要睇下杜安沙比拍冰人既表現如何,而右閘都會繼續用雲比沙加。迪基亞上場歐霸盃已經有踢,相信今場都會繼續用佢把守最後一關。

中場缺少左麥湯文尼,加上呢一場波可以守住黎踢既情況下,馬迪同費特應該係一對防中既首選。呢場可以主力踢穩守突擊既戰術,右翼可以出占士加強防守同跑動,而左路就可以用福仔拉舒福特,靠佢兩個既速度打反擊。攻擊中場呢個位置就變左三揀一,普巴、般奴、雲迪碧克揀一個出。雖然普巴狀態不俗,但蘇B甚少將佢放係攻中既位置,我估計都會先列後備。雲迪碧克始終暫時都未能適應攻擊中場既位置﹐雖然呢場有條件輪換﹐但我估計佢都係先坐坐板凳。而般奴雖然有疲態,但佢打反擊既效果會比普巴好﹐上半場先出可以令曼聯保持一定的進攻火力。如果半場失波﹐就可以選擇出普巴加強攻力。如果半場不失或偷到一球﹐就可以半場換入雲迪碧克﹐等般奴抖抖。

前鋒方面,我估計會先用格連活特。上場卡雲尼踢足全場,如果今場又踢足,34歲既佢體能上會好吃力,加上戰術需要,可以先擺狀態甚勇既綠木去衝鋒陷陣,保留卡叔既體力去應付周末既聯賽會比較合理。上場對熱刺係落後情況下﹐選擇改用雙核驅動既4222陣式﹐並成功反cup對手﹐更踢出可能係全季最立體、最有效﹐最熱血既一場賽事。如果今場有咩冬瓜豆腐﹐相信都會再次起用呢個陣式。先留卡叔﹐睇情況再調動既彈性亦會比較大。另外﹐迪亞路亦可以隨時候命﹐希望呢場可以有條件地俾佢踢下﹐吸下經驗有助成長。

預測曼聯正選陣容
迪基亞
雲比沙加 杜安沙比 連迪路夫 泰利斯
占士 馬迪 費特 拉舒福特
般奴費南迪斯
格連活特

如果喜歡我們的文章,請即分享到︰

標籤: 曼聯  歐霸  格蘭納達  

留言


請按此登錄後留言。未成為會員? 立即註冊
    快捷鍵:←
    快捷鍵:→