曼鏡既野,你識條鐵咩(賽後分析-曼聯對曼城)

Hea談曼聯 於 15/01/2023 發表 收藏文章
坦克排出4-2-3-1。門將迪基亞。防線左至右係馬拿斯亞-梳爾-華拉尼-雲比沙加。卡斯美路拍費特出任防中。左右翼係華舒福同般奴費南迪斯。攻擊中場係艾歷臣支援前鋒馬斯亞進攻。

哥迪奧拿排出4-3-3。門將艾達臣。防線左至右係簡些路-尼敦艾基-艾簡治-卡爾獲加。防中用上洛迪。左右中場中係賓拿度施華同迪布尼。左右翼係科頓同馬列斯支援前鋒夏蘭特攻堅。

《坦克吸取教訓;哥帥又黎大膽嘗試》
哥帥並冇安排閘位球員內切,選擇用番4後衛拉闊球場,佢亦作左個大膽嘗試,安排夏蘭特更多從前場位置拉後到中場駁腳。本身應該係應對番坦克既高位前場逼搶,希望夏蘭特拉走對方一個中堅,再等翼鋒或中場中後上插入空間。可惜,呢個如意算盤完全打唔響,因為坦克唔同你玩高位逼搶。
防守則用番平時既高位逼搶,推前迪布尼,將陣式形成4-4-2前場施壓,令曼聯只能用長傳踢前。

坦克吸取首回合既教訓,先係陣容上作出調整,覆蓋範圍大同搶截力強既費特拍住卡斯美路踢防中;抽起安東尼,將般奴改踢右中場,艾歷臣推前一格踢攻擊中場;最後一著則係用梳爾代替身材較矮少既馬天尼斯踢中堅,去協助華拉尼防守夏蘭特。除左陣容上,佢亦係戰術上明顯作出部署,先放棄前場逼搶,前場改以係中場線至對方三閘線中間開始遮線。艾歷臣同費特釘人式防守洛迪同迪布尼,中場僅留卡斯美路補位。
當曼城打穿中場區域時,中場放棄zone-defense,接近人釘人式防守。費特更會留守迪布尼身後,防止佢係線與線之間拎波轉身。般奴較辛苦,除左要幫手壓迫中堅,亦要兼顧防守簡些路,但佢既企位會相對係中路而非拉出邊路防守,寧願等簡些路多時間控球,都要以遮住佢俾入中間線路為主。福仔則負責防守卡爾獲加。兩閘貼身招呼對方兩翼,如被拉走到前場則犯規整停對方,番後場重新黎過。
曼聯係前場間唔中都會逼一逼對手,見圖示。

坦克除左防守有落苦功,轉守為攻打反擊亦明顯有一定既部署。當球隊搶到波後,會嘗試盡快尋找馬斯亞,等佢回波俾艾歷臣或般奴,再迅速踢對角斜線俾福仔針對左路爆;又或者係後場透過幾下one-touch打穿對方逼搶等卡斯美路轉方向保持控球。

《坦克頭廿分鐘非常成功;哥帥好快已經搵到應對方法》
坦克放棄自己既理念,放棄控球既踢法令哥帥操手不及。頭廿分鐘,曼城空有控球權,但難以運到波入禁區;曼聯憑攻守轉換,福仔既衝刺加上馬仔今場非常醒神既支點,多次製造到有效反擊,令艾達臣非常忙碌。廿分鐘後,未知係哥帥指示還是場上球員自動波(我偏向認為係後者),本身係前場游走既賓拿度施華,開始墮後到洛迪附近,洛迪有時再墮後形成三中堅,係中後場用人數優勢先overload曼聯中場,卡斯美路亦唔敢完全離開防中位置,令艾歷臣陷入兩難 - 死跟洛迪定係守持球既施華。
曼聯防守出現混亂,曼城開始分到波打到側擊。雖然曼城進攻開始流暢,但亦因施華仔要墮後,前場人數少左,而曼聯防守亦集中,兩閘同一對防中防守對方翼鋒同中場都好貼,所以曼城產生唔到太大威脅。半場,以和為貴。

《哥帥靚變陣取得領先;坦克憑問題球追平》
下半場竟然係坦克先換人,用安東尼入替馬斯亞。半場黎講馬仔踢得幾好,唔知係傷定點,但有傷既福仔就繼續踢。安東尼一出黎都係踢最前,不過踢左15分鐘到都係要去番右邊,般奴改踢最頂。哥帥就冇換人,但就開始踢閘位內切,變陣3-2-5。

坦克好似完全冇諗過哥帥會咁變,明顯係諗唔到計仔。加上福仔有傷在身,擺明留佢搏一段向前跑,冇能力再回防,所以下半場左路形成缺口。曼城係下半場頭15分鐘狂攻右路。56分鐘,哥帥用加利殊入替無表現既科頓。60分鐘,馬列斯終於打穿右路俾迪布尼沉底出波,遠柱既加利殊輕鬆頂入取得領先。
曼聯成個下半場都係受壓,加上冇方向應對對方閘位內切既換位踢法,兩閘頻頻受壓。72分鐘,坦克用加拿祖入替跑到莫晒既艾歷臣。福仔打番最前,等加拿祖有活力幫手守一守條左路。

78分鐘,問題球出現了。卡斯美路右路踢斜線入中間,越位既福仔有追波但冇掂波,而後上般奴(不在越位位置)衝埋去就射入左。
咁究竟福仔有冇構成越位犯規?先見下圖,例書寫明如果越位球員跑埋去個波度而冇掂波;另一個冇越位隊友去玩波係唔構成越位。
再見下圖,身處越位位置既球員只有在積極參與比賽時才會被判越位犯規。何謂積極參與則相信要睇第3點:明顯於近距離試圖參與玩球,而此舉動明顯影響對方球員。
何謂「影響」?球例並冇詳細解讀,影響對方判斷又算唔算?我嘗試從球證角度解釋,艾簡治係追唔到福仔,而其實艾簡治唔知般奴係後上緊,除非艾簡治可以跑到福仔身邊,只要被福仔撞到掂到,令艾簡治玩唔到波,咁就有被「影響」。望落艾簡治係決定收步,而越位與否從來唔係球員決定,青訓都教你聽雞聲舉住手黎跑,而咁岩般奴又確係後上跑緊,符合左第一張圖既意思。球證係跟據呢個情況下判入球有效,又絕非無的放矢。何謂「影響」就真係要問清楚FIFA啦。你問我,我第一下就覺得係越位既,但再睇playback,就覺得分分鐘球證wait and see係good call。

《曼城陣腳大亂就又失一球;曼聯換晒中堅頂到尾》
曼城失左球相對冤枉既波,陣腳真係有少少亂,就被曼聯係4分鐘後再入一球。左路加拿祖沉底出地波,門前福仔(冇越位)撞入,延續佢係主場連續入球記錄,反超前2:1。90分鐘,坦克換入麥湯文尼、麥佳亞同馬天尼斯,改踢5-4-1頂住曼城既最後狂攻。場雞一響,曼聯以2:1險勝曼城,光頭佬贏番場。

《總結》
兩隊踢出高水準足球。曼城實力同搓傳能力明顯較強;曼聯踢轉守為攻,打反擊既戰術亦發揮得相當唔錯。哥帥係賽事尾段唔再嘗試換人就有少少怪,根度簡同艾華利斯都有條件去改變戰局;坦克則都係咁換架啦,成隊明顯下半場體能跌晒都焗頂。球證再次成為焦點,而你撐邊隊波亦令你有唔同既睇法,只能等英超賽會解釋原因或者FIFA再去修訂「越位準則」同解釋清楚何謂「影響」。個人認為成場波球證既執法尺度都相當一致,有問題球唔一定係黑哨,不仿先代入下球證既角度,咪一句黑哨都好抹殺雙方球員既努力。多謝兩隊球員出色發揮,令我睇左一場高水準賽事。曼聯下場對水晶宮,睇黎都有幾多人要抖抖,繼續努力!

如果喜歡我們的文章,請即分享到︰

標籤: 曼聯  曼城  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→