曼聯踢防反入晒血（賽後簡評-曼聯對阿仙奴） 精選

少有既雙紅會係由第十四位既曼聯對第二位既阿仙奴，曼聯憑般奴費南迪斯係上半場補時階段射入罰球而領先，而阿仙奴則靠懷斯係74分鐘妙射得手追平。兩隊最後以一比一完場，各得一分。

《阿仙奴可以專注歐聯》
阿仙奴傷左耶蘇仔同夏維斯後，阿迪達只能將美連奴硬推上前一格打箭頭，而翼鋒薩加仍未能復出，達叔起用小將亞旺尼擔正。雖然今場亞旺尼係邊線非常落力，多次聯同奧隊同添巴係度造文章，但級數同薩加比就當然有距離，加上中鋒點乏力，整隊攻力大受影響下，球隊雖有控球權，但真係要埋到龍門口既機會唔算真係太多，有一兩下黃金機會亦因太心急而把握唔到，最後只能逼和對手。踢完呢場後，阿仙奴已落後榜首既利物浦十五分（打少一場），要後上奪冠都僅餘數字上可能，餘下賽事唯有全力專注歐聯，聯賽就真係變Netflix FC下季見。
《曼聯踢防反入晒血》
周中曼聯作客被皇蘇逼和，從戰情上睇，曼聯過幾日番主場贏既機會率係比較大，但阿摩廉冇選擇留力下場，而決定係呢場波盡量出主力去應付阿仙奴。由於多古停賽同麥前隊長加入受傷名單，阿摩廉決定起用約羅、連迪路夫同迪列特，而天堂仔就先列後備。中場方面，先抽起哥利亞，起用般奴同卡斯美路。一對翼衞照用馬沙拉維同達洛治。前鋒線則先抽起海倫同馬田仔，起用舒克斯、加拿祖同艾歷臣。今場阿摩廉直頭改踢防反，球隊一失控球就縮到中後場防守減少後場空間，放棄控球權等阿仙奴攻。搶到波後就放長波俾右路既加拿祖係邊線打反擊。因球隊放棄高位逼搶，5-4-1防守陣形係中後場比較緊密，大大減少左卡斯美路速率不足既問題，相反更用到佢既補位同防守企位既經驗，從而令阿仙奴製造唔到好多威脅。可惜，前鋒線三人只得加拿祖有速度，舒克斯同艾歷臣都需要用到波先可以發揮到，導致反擊時既效果比較一般。雖然阿摩廉係出場人腳配置下係有不足既地方，但曼聯踢防反真係入晒血，般奴一腳送前，就算得單邊走反擊都夠走。馬後炮睇，海倫應該比舒克斯更適合踢呢家波，而翼鋒方面，有冇條件係青年軍提升一個上黎試，會係阿摩廉需要諗既野。呢個踢法上，艾歷臣既作用真係冇乜，反而舒克斯係前場停到一兩下都算係咁。
《曼聯機會少但入肉，尾段搏鎚就兩邊都有機贏》
一場攻守格局既波，兩隊係上半場都唔係製造到好多埋門機會，而曼聯單靠反擊有一兩下去到阿記心臟地帶仲有威脅。情況去到70分鐘後有改變，係懷斯追成平手之後，兩隊都唔想拎一分而開始對攻。阿仙奴有馬天尼利係窄位補射飛機唔入，而曼聯則有般奴9碼點近距離射門俾拉也擋到，拉也接住再黎下飛身係門口拍走個波，擋住哥利亞既衝門。要數阿仙奴踢得最好都應該係門將拉也，否則阿記分分鐘一分都冇；曼聯就要數到加拿祖、般奴同馬沙拉維。加拿祖明顯適合防反加係邊線活動，球隊今場多次既進攻威脅都係黎自佢既推進；般奴基本上已確立佢係隊入面踢既位置，逗番後一格踢再周不時後上入禁區會較適合佢；馬沙拉維今場就上上落落，除左完封托沙，亦有一下怒跑幾廿碼係門前撞射被救出，只能講拉也太神，否則馬沙已經入左波。
《總結》
曼聯既防反DNA真係入晒血，對強隊要咁踢係岩晒河車，但要變番做強隊就真係需要一段頗長既時間。約羅半場已被換出，相信佢又係傷左。幸好，入替既天堂仔表現不俗，下場睇黎會擔正。黎緊禮拜四再對皇蘇，曼聯搏完呢場後，一眾正選球員恢復如何會係果場波既關鍵，尤其係卡斯美路。歐霸冠軍既重要性唔駛講，希望球隊會放棄聯賽，全力爭冠就好。