曼熱大戰（賽前分析-曼聯對熱刺）

先講熱刺，熱刺本身傷兵滿營，羅美路、麥迪臣、所羅門、賓戴維斯、盧斯素同佩列錫都受傷，實力理論上大打折扣，但球隊近六仗卻有五勝一負既佳績，李察利臣同比坦古亞既復出都幫到好多手。不過今周開始孫興慜、沙亞同比蘇馬都要代表國家隊出戰，咩球員可以頂替到呢三個球員既作用，就考考領隊普斯迪高古既腦袋啦。一月轉會窗已開，主席利維火速進行添兵計劃，添姆華拿已被借入重返英超，亦買入左熱拿亞中堅達古仙，相信呢兩個球員都會係今場賽事披甲上陣。雖然人腳會大變，但球隊既戰術方針都唔會變，繼續維持前場高位逼搶，後場堅持地波組織，兩閘內收中路幫手build-up再前插助攻，兩翼拉闊創造一對一突破空間等。睇下熱刺既進攻球員有冇辦法撕破到曼聯既防線。
預測熱刺正選陣容（4-2-3-1）
域卡利奧
樸羅 達古仙 雲迪芬 烏度治
靴爾保 比坦古亞
古路錫斯基 拜恩希爾 賓倫莊遜
李察利臣


曼聯係2024年首場就贏波，順利用正選擊敗英甲既韋根係足總盃賽事晉級，希望呢場贏波可以洗一洗上半季既黑氣。一月份開始多名球員會陸續復出，梳爾、馬拿斯亞、卡斯美路同馬天尼斯等都有復操。卡斯美路同馬天尼斯尤其重要，前者級數毋庸置疑，抖左半季能否重拾上年「I will fix it」既心態同狀態會係曼聯今季排第幾既關鍵；後者係後場組織用波同熱血硬淨防守可以帶動到曼隊士氣，亦可以提升到中前場球員再放膽進攻既心態。可惜兩個係今場都未必可以上陣，坦克睇黎都要諗諗點安排呢兩個位置。曼聯依家只有足總盃同聯賽兩個盃，接近一周一賽下，球隊都唔需要留力，絕對可以場場用勝利十一人踢。前一場賽後分析都講依家既曼聯係贏定輸，係取決於對方踢咩戰術。基於小弟相信熱刺係會忠於自己既踢法，曼聯呢一場係有空間跑，半對攻既格局下，係有能力贏呢場波。預測坦克都會用安拿拿守龍。防線以不變應萬變，雲比沙卡同達洛治踢二閘，伊雲斯拍華拉尼踢中堅頂住。明奴已變主力踢逗後防中，上場被抽起既艾歷臣應會正選拍般奴費南迪斯。加拿祖踢右翼繼續有表現就繼續出；左翼就靠華舒福留守前場打反擊做爆破。正選前鋒都係凱倫，佢都要把握機會入下波先得！
預測曼聯正選陣容（4-3-3）
安拿拿
雲比沙卡 華拉尼 伊雲斯 達洛治
般奴費南迪斯 明奴 艾歷臣
加拿祖 凱倫 華舒福