或者會繼續見到馬斯亞 - (狼隊對曼聯 - 賽前預測陣容)

Hea談曼聯 於 28/08/2021 發表 收藏文章
講講狼隊
上季帶領狼隊既領隊紐奴遠走倫敦,出任熱刺主帥。狼隊最後請到前賓菲加領隊般奴-拉格。又睇下呢位新領隊會唔會帶領狼隊踢出新風格。狼隊係今個轉會窗都有相當大既動作,截至現時為止有多達12人加盟,又有13人離隊。猶幸主力球員只有上季正選門將柏捷斯奧、輪換球員奧達蘇維、費拉拿同荷西威廉斯離隊。核心球員查奧爾、占美利斯、魯賓利維斯等仍然留隊。主要新加盟球員則有中場莫斯基拉、門將蘇沙、購入上季借左黎踢下既左翼衛艾特路尼、右閘保拿(Bolla)同埋從巴塞外借加盟既翼鋒特連卡奧。近三場賽事都起用3中堅兩名翼衛既陣式,睇黎3-4-2-1 / 3-4-3會係拉格既常用陣式。近三場賽事只得1勝2負,只能在聯賽盃擊敗諾定咸森林,聯賽兩場皆北,包括對住熱刺同李斯特城,暫時以0分排係第16位。以狼隊既人腳黎講,降班應該未輪到佢地。兩場都算對住前列份子,落敗亦無可厚非,睇下主場對住曼聯又會唔會承住聯賽盃賽回勇贏番一場!

講講曼聯
曼聯第一場係威係勢咁大勝列斯聯5個1皮,但第二場作客只能1比1逼和踢得非常有紀律既修咸頓。蘇B係選擇正選陣容同臨場即時調動既能力再飽受批評。防守中場麥傷文尼再次受傷,預計要一個月後才能復出,當MCFRED組合冇得同場果陣,又要睇下蘇B會點安排中場既配搭啦。好消息係翼鋒拉舒福特福仔已經可以操練,希望可以提早復出。上賽季我地曼聯一對住5名後防鐵桶陣縮係後半場防守就完全唔識得進攻,而今季右路多左辛祖﹐普巴、般奴暫時狀態不俗下﹐睇睇蘇B係戰術上會有咩變化去贏呢場波先。小弟預測佢仍然會起用4-2-3-1陣式。龍門繼續係迪基亞﹐防線照舊左至右係梳爾、麥佳亞、連迪路夫、雲比沙加。華拉尼可能要再操多兩課先會出,畢竟冰人連迪路夫呢兩場又唔係真係踢得好差,中堅拍檔默契會比較重要。冇左麥湯文尼,上場整個馬迪拍費特即刻令中場速率同用波流暢度大減,。相信今場會作出改變。普巴拍馬迪用波會比較好,普巴係中場串連同轉方向,要睇下馬迪既執屎功力仲淨幾多。攻擊中場般奴費南迪斯繼續主導進攻。前鋒卡雲尼或者要再操下先﹐以蘇B既思維,睇黎都會再見到馬斯亞。左右翼則起用辛祖同格連活特。

預測曼聯正選陣容
迪基亞
雲比沙加 連迪路夫 麥佳亞 梳爾
格連活特 馬迪 普巴 辛祖
般奴費南迪斯
馬斯亞

如果喜歡我們的文章,請即分享到︰

標籤: 曼聯  狼隊  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→