恭喜意大利奪得今屆歐國盃 - 賽後超長文分析

Hea談曼聯 於 14/07/2021 發表 收藏文章
歐國盃決賽,由分組賽到決賽僅失一球既英格蘭主場火拼已經連續33場不敗既意大利。先睇睇兩軍正選陣容
修夫基延續今屆賽事部署 - 守。派出343陣容。龍門碧福特,後防線係中堅三人組獲加、史東斯、麥佳亞,左右翼衛梳爾同查比亞。中場一對鐵膽雙斯,賴斯同菲臘斯厄守中路防務。前線由右至左係蒙特、簡尼、史達寧。

文仙尼則繼續沿用433迎戰。當拿隆馬把守最後一關。後防線起用加埋70歲既基亞連尼同邦路斯,左右二閘則係艾馬臣同迪羅倫素。中場線方面。華拉提同巴里拿出任box-to-box,舒服哥佐真奴逗住踢。前面3個則係右路基艾沙、恩莫比尼居中同左路恩斯尼。

快速取得領先就可以踢得更修夫基mode
甫開賽,英格蘭就踢番今屆既模式,防守上前場3人高位遮線,防止意大利後防可輕易搵到中場去連接中前場,中場線則在中場佈防截擊。只要意大利一打穿中場就全軍退守中後場,防止對手攻擊身後空間。意大利則利用佐真奴控制節奏,慢慢組織進攻。前場靠基艾沙單打獨鬥,恩斯尼既引球推進。開波3分鐘,英軍就取得好開始。一個角球反擊,簡尼係中場線作支點,俾個斜線去右路,隨即加速走入禁區接應。史達寧亦已走入禁區,獲加走查比亞overlap試圖引開回防既意大利球員,梳爾則伏兵左路尾柱。其實意軍後防人數足夠,但簡尼既衝前吸引右閘迪羅倫素收中,完全冇為意右路仲有梳爾等緊。查比亞係K角位見狀即刻curve尾柱俾梳爾,左腳撞射破網,火速領先一球。

頭廿幾分鐘盡是英格蘭天下
失波後,意大利並冇自亂陣腳,繼續慢慢由後場組織,但前鋒恩莫比尼被輪流招呼,難以係前場停波。兩翼亦被英軍二閘牢牢鎖死。中路雙斯覆蓋面攔截力體型亦非常不俗。缺少中路突破點既意大利,進攻空有控球權,無法組織具威脅埋門,亦因陣式被克制而踢得被動。當英軍後場持球,意軍三子就係前場施壓。英軍兩翼衛自然可以從邊路壓上,尤以左路梳爾為甚。英軍前場三子集中中路,逼對方兩閘內收,清空兩側邊線等翼衛後上。意軍中場三人既要堵塞中路空間又要走到邊線防守,可謂疲於奔命。加上簡尼墜後拎波,再將波快速轉向,利用側擊製造機會,情況極似德國對葡萄牙。

佐真奴被踢跌 跌得合時
主場之利加上踢法問題,英軍氣勢如虹。到左二十幾分鐘,佐仔持球被踢跌,要軍醫入場治療。文仙尼即刻叫基艾沙同恩斯尼埋黎密密斟,叫佢地對方龍門死球時可以係前場企高位迫對方開長波,但生波就一定要先回中場追番左右翼衛。此舉立刻令到英軍overload兩側既戰術失效。兩翼衛被守,中場意軍變相就有人數優勢,而英軍兩翼則被意軍兩閘位對位防守,而中路既佐仔同華拉提同巴里拿番番入中路企位,簡尼再想出黎拎波亦困難左好多。意大利一守番穩左就冇咁被動,開始主導球賽慢慢組織。

半場拉鋸,意大利追唔追到還看下半場
文仙尼調動湊效,令到英軍進攻即刻缺乏侵略性,而縮後踢番修夫基式防守足球亦貫徹今屆賽事既理念。意大利則只能依靠基艾沙步大力雄既突破創造攻勢。恩莫比尼今場被凍結,未能係前場發揮作用。左右二閘都未係好敢壓太上,畢竟時間尚有。英軍一球領先完半場。

文仙尼一㩒制就見效
下半場大家都冇作出任何調動,戰況亦如上半場中後段一樣陷入膠著。踢到54分鐘,文仙尼見狀求變,換入基斯坦迪及貝拉迪取代作用不明顯既巴里拿及恩莫比利。基艾沙轉戰左路,恩斯尼出任假九,貝拉迪則係右路發難。中場仍然維持倒三角防守,但進攻則將基斯坦迪插入禁區,中場佐仔拍住華拉提係中路較炮,左右二閘壓上。重點在恩斯尼並唔似恩莫比利在前點等待機會,佢更多時會向前迎波,以攻中形式出現係英軍兩名防中中間既身後位置,係中路突破或者轉方向。英軍明顯被打亂陣腳,多次被佐仔或者華拉提打穿中路,等恩斯尼係禁區頂轉身再分兩邊或者再塞直線俾入楔既基斯坦迪。此舉非常湊效,先有基艾沙左路推大位射尾柱被救出,跟住亦有恩斯尼窄位施射,攻勢一浪接一浪。攻到67分鐘,英軍終告失守。一次角球攻勢,被邦路斯係門前執雞成功,追成平手。

修夫基既換人都係對症下藥
得勢不饒人既意大利繼續乘勝追擊。戰至70分鐘,修夫基將沙卡取代查比亞,先將陣容改踢回4後衛,再係4分鐘後將神軒入替賴斯,將陣容變做4141。菲臘斯踢番逗後防中,塞住中路令到恩斯尼再難係呢個位置輕鬆轉身連接。獲加同梳爾縮後防守番對方兩翼,而一對中堅則只需留神基斯坦迪既後上。神軒同蒙特則係菲臘斯前面防守意軍一對中場。因意軍當刻實在太強勢﹐加上修夫基今屆以守為先﹐換人先守穩係合理既調動。呢個變陣成功將弱勢既英軍穩住陣腳﹐但始終成隊波縮得較後﹐而簡尼去到下半場亦未能係前點停波﹐難以製造反擊。史達寧同沙卡都屬各自為戰型球員﹐只能靠自身能力去突破。兩隊又再次陷入膠著狀態。踢到86分鐘﹐今場大勇既基艾沙傷出﹐由貝拿迪斯治入替。缺少左基艾沙明顯對意軍既進攻力有極大影響﹐但修夫基亦冇再作出任何調動﹐最後磨完全場。

文仙尼明顯唔想射碼,修夫基繼續守到尾
加時作賽﹐對意大利應該都幾不利。畢竟平均年齡比英軍大﹐上場又要去到12碼階段先射贏西班牙﹐體能既負荷令人擔心;反而英軍仲有大量進攻球員可用﹐加上主場之利同年輕﹐體力理應佔優。加時上半場開始﹐文仙尼就換走踢到乾乾地既思斯尼﹐換入巴路迪。除左因恩斯尼無力作戰﹐亦係針對部署。見英軍踢番兩個中堅﹐我就擺番個柱躉入去等機會。但反而係英軍突如其來既反擊先嚇一嚇文仙尼﹐史達寧左路反擊快放沉底出波﹐幸有基亞連尼趕及封波出底線。及後既角球亦有菲臘斯執到第二點右腳射尾柱斜出。到96分鐘﹐盧卡迪利入替華拉提﹐而修夫基只在99分鐘用格利殊換入隱形戰機蒙特。接著﹐意大利最有威脅就係艾馬臣左路急勁傳中﹐不過兩名隊友衝近柱都冇人踢到個波﹐再次被碧福特救出。冇入球下完加時上半場。加時下半場再戰﹐文仙尼就換晒六個冇得再換;修夫基就無心加強攻力﹐一心守到尾同你射碼﹐最後時刻換入福仔同辛祖去射12碼。最後1:1全場完﹐進入12碼階段。

個人感想
最後﹐意大利射嬴12碼﹐奪得今次屆冠軍﹐恭喜恭喜!想講講今場波既感覺。先講開波陣容﹐修夫基無疑先勝一仗﹐利用343邊路進攻火速領先。及後文仙尼既臨場應變﹐抵讚!落後一球既文仙尼54分鍾作換人調動亦屬正常﹐但修夫基既反應則慢左少少。見到中路多次被打穿就應該早變陣。輸波後既變陣係合理亦算合時﹐再踢多10分鐘先換就可能已被反Cup。好多人都話點解換入沙卡而非7號仔?沙卡既防守能力同個人突破力或者會係箇中原因。做波梗係格利殊好好好好多﹐但當刻如只想搵人爆搵人突破仲有防守就或者沙卡可能好少少。去到加時﹐見修夫基都唔換進攻球員則覺得佢太保守。"唔失波"係佢理念﹐但亦變左"唔想搏"。換一個角度﹐佢係靠守﹐守到入決賽。"寧願射碼輸都唔想場上面輸俾你"都可以理解﹐接受與否就各有各睇法﹐亦都冇人知如英格蘭換人攻﹐又會唔會輸反擊呢?如因為呢樣野就叫佢執包伏﹐我覺得唔太合理。今屆確係見到英格蘭防守力驚人﹐黎緊世界盃睇下修夫基又如何加強進攻力去達致攻守兼備;而文仙尼盡用後備名額﹐見招拆招亦顯出大師級級數。去到12碼階段﹐修夫基隻鑊就食晒架啦﹐換入黎兩個都射唔入﹐新丁沙卡仲要射最尾。佢12碼既安排確係令人摸不著頭腦。不過﹐"入就戰術大師﹐唔入就自作聰明"都係球場定律。文仙尼冇咩好講﹐勝者為王﹐恭喜!
標籤: 英格蘭  意大利  歐國盃  

留言


請按此登錄後留言。未成為會員? 立即註冊
    快捷鍵:←
    快捷鍵:→