幫到你盡,拎唔到頭四就怨自己啦(曼聯對李斯特城 - 賽後報告)

Hea談曼聯 於 12/05/2021 發表 收藏文章
賽前都估到蘇B肯定會用多D副選去踢呢場比賽,但估唔到佢近乎係全副選出陣,真係o晒咀!話就話賽程密姐,都未免放水放得太誇張。羅渣士亦都不負所望,險勝二比一,拎唔拎到歐聯資格就靠自己,呢場幫到你盡啦!

先講呢場既正選陣容先,龍門用迪基亞,後防由左至右係泰利斯、杜安沙比、拜利同埋威廉斯。中場由左至右係19歲既伊蘭加、雲迪碧克、馬迪、新仔迪亞路。攻擊中場用馬達拍住近期fit到爆既格連活特。

重點想講下球員表現,由前線開始。格連活特再次展現射手本色,右腳窄位射尾袋,中鋒先係佢世界。達叔繼續佢一貫作風,串連走位做波都見到佢,入果球更係佢由中場發動,一個高波扔俾迪亞路哨,最後先入到波。踢全場對佢黎講太辛苦,後備踢半個鐘絕對交到功課。歐霸決賽分分鐘靠你啊!

19歲既伊蘭加,第一場就踢正選唔多唔少有d怯場,見到佢都好肯同隊友配合同走位做拉扯,速度係快既,但今場就未見到佢有咩個人特點,都係俾波走位為主。雲迪碧克就中規中矩啦,係依家4231/4222體系下佢應該踢邊路攻擊中場會較合適。而馬迪則係今場我揀既曼聯mom,持波時控制節奏,防守企位遮線再指揮隊友都做得非常唔錯,恰如其分往往係最好。右邊既迪亞路成場都好勤力,繼續扭扭扭,又見到佢防守,絕對可以俾多D機會佢上陣。

防線方面,左閘既泰利斯真係雪到硬左,除左有一下招牌死球,生波進攻都唔係有太多貢獻。當然佢前面係新仔伊蘭加,對佢上黎助攻都有影響。而佢激活梳爾作用已經成功左,下季做梳爾副手絕對冇問題。杜安沙比今場防守冇乜大甩漏,係用波方面仲有進步空間,值得俾機會佢上陣。拜利今場都係一樣發揮穩定,top fit既佢絕對會係隊中最強中堅。右閘既威仔就令我有D失望,進入左一個撞牆期。雖然佢係右腳球員,但明顯佢打左閘係好好多,打右面硬係怪怪地。睇下蘇B同教練團會點指導佢。如果達洛特番黎,威仔睇黎又要借走。鯰魚效應下,迪基亞發揮正常,輸果兩球都唔係好關佢事。下場對利物浦,唔知佢有冇份踢呢?

而後備入黎既福仔、卡雲尼同尾段先換入既般奴費南迪斯,個人認為都係做下樣,等佢地入黎踩下草,熱定身備戰利物浦。最後,占士係呢場波竟然冇份踢,佢真係要俾心機去操去吸收去進步,分分鐘連輪換位置都俾新仔搶埋啊!

留言


請按此登錄後留言。未成為會員? 立即註冊
    快捷鍵:←
    快捷鍵:→