寓賽於操既紅魔鬼迎戰降班富咸 - 曼聯對富咸 (賽前陣容預測)

曼聯餘下既賽程只剩番三場賽事﹐包括：
1) 5月18日對富咸 (聯賽)
2) 5月23日對狼隊 (聯賽)
3) 5月27日對維拉利爾 (歐霸盃決賽)

本土聯賽就純粹名次之爭﹐贏多一場波就可以確保以第二名完結今季賽事﹐其次就食花生睇下邊隊爭到歐聯席位。最重重重點既賽事就梗係歐霸盃決賽賽事啦﹐睇下蘇B可唔可以首次帶領曼聯奪標而回。4日前主力盡出下﹐力戰而敗利記。今場對住已經宣佈護級失敗既富咸﹐大家都係風流波。計計數﹐踢完呢場去到歐霸盃決賽有9日既休息時間﹐換句話呢場出少少正選等佢地寓賽於操亦未嘗不可。既可以保持狀態﹐又可以磨合下提升默契﹐亦可以等後備操下狀態。預測蘇B會照用甸軒達臣打正選﹐等迪基亞係決賽上陣。中堅方面﹐麥隊長仍未知能否係決賽上陣﹐如果最後出唔到﹐即係要出拜利同連迪路夫。基於呢兩位人兄同時間上陣既時間實在太少﹐正好利用呢場風流波磨合下。左右二閘則會起用威廉斯同泰利斯﹐等雲比沙加同梳爾抖抖。一對防中起用馬迪拍住普巴﹐等MCFRED休息一下。左中場起用雲迪碧克﹐般奴費南迪斯出任攻擊中場﹐配合埋右路既迪亞路﹐一齊係中場提供彈藥俾最前既格連活特入波。
預測曼聯正選陣容
甸軒達臣
威廉斯 拜利 連迪路夫 泰利斯
迪亞路 馬迪 普巴 雲迪碧克
般奴費南迪斯
格連活特

P.S. 希望VDB唔好又打番落防中