富咸不明不白咁唔見左一分（賽後簡評 - 富咸對曼聯）

先講下富咸，呢場波整隊係個防守部署上做得非常好，基本上曼聯係創造唔到任何黃金機會埋門。唯獨輸果一球係個解圍處理上唔得清脆，竟然踢番個波入中路。仲要經過一大輪波子機俾般奴係禁區執到再射入，輸得係幾不明不白。進攻上依靠兩翼側擊同打反擊為主，機會上仲比曼聯多，不過始終球員埋門既質素仍有改善空間。呢場對富咸黎講，和波會相對合理。小弟認為伊禾比今場踢得非常好，進攻防守都見到佢，覆蓋範圍又大，盤扭亦屢次成功，幫到球隊係中場串連。

相反，曼聯就不明不白咁袋左三分。正選陣容都幾大調整。華拉尼都係後備，達洛治踢逆足左閘，麥湯文尼正選取代安拉拔，加拿祖亦代替左華舒福踢正選。呢場波坦夏都繼續沿用3-1-6既build-up方式（見圖示），間中有時係跑位上會變成3-2-5。坦夏改用艾歷臣係中路串連，推前麥湯文尼希望前線可以有多一個點入禁區埋門。從圖示見到6個中前場球員既企位係企係人地既中場線後，掉番轉睇就係富咸有6個球面對住曼聯三個中堅加一個防中。最理想當然係曼聯中堅可以一腳波打穿人地條中場線，然後曼聯就有6個球員去進攻對方5人（計埋門將）；但如果打唔穿或者俾對方後衛搶到，後防就只得4個人去做防守，當中有一個更係跑動速率較慢既艾歷臣。另外，小弟認為呢個企位上，會令到後防同中前場距離過遠，而你後防又冇馬天尼斯呢類有做波能力既球員，咁樣踢就變左有好多長波或對角斬，咁就變得容易俾對方攔截，而你中前場球員亦好難可以用到個波。
整場波曼聯可以創造到既黃金機會接近零，射門只得12射5中，而富咸係18射2中。麥湯文尼既入波被var推翻，但從var既角度睇，麥佳亞確實有參與並干擾到防守球員玩波，吹係合理既。入果球就極度負碌咁入，無啦啦又彈番落般奴隻腳，又無啦啦射中龍，利奴又無啦啦落地慢左，總之成場計就唔值得贏波。踢得最好果個我覺得係麥佳亞。一開波俾人撞到面青口唇白，都仲可以踢到全場，仲同你左頂右撞，血肉長城式護住安拿拿。另外，小弟覺得前鋒線又係資源錯配。當你用到柏利斯迪同加拿祖，兩個都可以提供到傳中果陣，點解前鋒會係馬斯亞？凱倫呢個時候先可以發揮到佢長處 - 係禁區捕位搶點。如果你要用福仔同安東尼兩個都係以內切射波為主，何不先用馬斯亞，等佢可以拉後現身提供多一點去停波，等福安可以插入身後空間。點都好，呢場總算贏波止血，係對哥本哈根前拎番少少信心都係好事。下場，繼續撐！