安東尼會係曼聯解決進攻問題既靈丹妙藥嗎?

Hea談曼聯 於 29/08/2022 發表 收藏文章
曼聯係今個夏天主力求購兩個球員,一個係巴塞隆拿既迪莊,另一個則係阿積士巴西右翼安東尼,而早幾日收購既卡斯美路,於我而言算係一個恐慌性收購,畢竟佢既踢法作用絕對唔係坦克一路所追求既迪莊類型,但卡斯美路既級數同能力就絕對唔需要懷疑。貴就一定係貴架啦,睇下坦克會點樣用佢。

講番安東尼先,小弟用左whoscore既資料統計整左個表比較佢同我地三個翼鋒係上一季既表現(見下圖)
唔同聯賽就冇得比較,所以英超同荷甲都係只供參考,但都可以見到佢場均射門次數比我地求其出兩隻翼加埋都多。歐聯數據就值得參考啦掛,冇比較冇傷害,七場四助攻,而我地三隻翼加埋係零,係零啊。場均射門次數去到3.7次又係多過求其出兩個加埋,而場均盤扭次數同致命傳送次數亦係四人最高。

小弟只係拎左部分數據出黎睇,當然仲有其他可以比較,例如射門命中率,盤扭次數,傳中等,但只睇上圖都可以睇到佢係一個突破力強,具備超強射門欲望既一個翼鋒,仲係可以憑盤扭去創造射門空間既球員黎,而睇致命傳送都可以見到佢既創造力應該比我地現有三個翼鋒好。除左數據睇得出點解坦克要求購佢外,佢亦非常適合坦克既戰術。坦克要求逆足翼鋒內切,同隊友打短距離小組快速入滲。曼聯隊中係冇一個左腳翼鋒可以打到右路,不論福仔辛祖還是伊蘭加,要佢地你右路用右腳內切入中路難度極大,就算成功內切,佢地既射門意欲同射門路線角度,都冇左腳仔咁好。格連活復出無期,而佢亦唔算係呢類球員,所以根據上面既數據同戰術需要,安東尼係絕對適合坦克既體系(踢唔踢得掂英超就踢過先知)。你話一億歐羅好貴啊,點睇都唔值啦!睇價錢睇佢現有成就我同意既,但我覺得格拉沙賭既係多左佢可以係呢季上番頭四,下季拎番歐聯資格就咩唔同講法啦,而佢亦只得22歲都係一個長遠投資黎!總結,多左佢絕對可加強曼聯右路進攻問題。錢,唔係我錢,班主又肯駛,冇所謂啦!
標籤: 曼聯  英超  安東尼  

留言


請按此登錄後留言。未成為會員? 立即註冊
    快捷鍵:←
    快捷鍵:→