好大機會係卡域克親自領軍既最後一場 (賽前預測陣容 - 車路士對曼聯)

Hea談曼聯 於 27/11/2021 發表 收藏文章
曼聯周中歐聯擊敗維拉利爾,以二比零不失球情況下贏波一洗頹風,順利晉級16強。呢場賽事會加強左球員不少既信心,從而係周日作客史丹福橋球場挑戰如日方中既車路士會冇咁怯。

車路士今季大勇,聯賽踢左12場賽事,9勝2和1負,拎左29分暫時排係榜首,入左30球失左僅僅4球,防守冠絕英超,進攻亦僅次於利物浦。近10場各項賽事加埋,8勝2和,周中仲4球輕取祖雲達斯,近況大勇,即使欠缺中鋒盧卡古,亦冇影響到佢地攻力。上場捷維爾受傷,仍有馬高斯阿朗素可以侯命,陣容深度毋庸置疑。

面對杜曹既3-4-3車路士,若果使用4人防線,兩翼就必需回防看守番對方既兩邊翼衞,皆因人地3前鋒一集中中路,二閘就必定要收中縮窄防線。睇番曼聯既兩翼福仔都甚少回防,仲要面對對面首席射手列斯占士,用單閘泰利斯肯定比人玩弄。上場卡域克都夠薑將般奴打後備,唔爭在今場都先抽起佢,改用5-4-1守左個半場不失先。龍門繼續係迪基亞。三名中堅由左至右係麥佳亞、連迪路夫、拜利。兩邊翼衞起用泰利斯同雲比沙加。中場中路使用Mcfred組合搶中場,利用麥湯文尼同費特既跑動多施壓俾佐真奴,唔可以俾佢輕鬆連接後場同前場。福仔辛祖出任左右兩翼,防守除左可以壓迫左右中堅亦需回防邊路協防。進攻則攻擊翼衞與中堅既空間。前鋒線上繼續依靠C朗拿度停波牽制對手。

預測曼聯正選陣容
迪基亞
雲比沙加 拜利 連迪路夫 麥佳亞 泰利斯
辛祖 麥湯文尼 費特 拉舒福特
C朗拿度

如果喜歡我們的文章,請即分享到︰

標籤: 曼聯  車路士  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→