大膽預測今季唔會排到頭四 ( 賽後長文分析-曼聯對修咸頓)

Hea談曼聯 於 13/02/2022 發表 收藏文章
蘭歷克排出4-3-3陣式,陣容同上場有少少變動。龍門迪基亞。防線由左至右係梳爾、麥佳亞、華拉尼、達洛治。中場線麥湯文尼逗後一格,前面兩個左般奴費南迪斯右普巴。左右翼係辛祖同華舒福支援前鋒C朗拿度攻堅。

哈辛赫圖排出4-4-2陣式。龍門科士打。防線左至右係皮賀、沙利素、碧拿歷、獲加比達斯。中場左至右係艾利安路斯、羅艾美奧、禾特包斯、岩士唐。前鋒係波也拍住阿當斯攻堅。

面對修咸頓壓出黎迫 曼聯有部署
蘭sir今場繼續擺4-3-3進攻,而今場係前場係有指示叫隊員去做逼搶。當對面開龍門死球,整隊會以4-3-3陣式向前施壓,逼對方唔經中場向前踢,嘗試依靠麥隊長同華拉尼既制空力搶番控球權再立刻進攻。當對方打穿左逼搶時,整隊會慢慢移後變番4-2-3-1陣式防守,兩翼都會縮後協防而唔會留守前場。有別於近幾場係放棄前面逼搶,失控球時除左前面人多球員自己決定反搶外,就縮落黎守番4-2-3-1。今場進攻都有明顯改變,普巴並冇好似前幾場咁會係旁邊傍住麥湯文尼,佢同般奴會企係對方既防線同中場線既空間去尋找後場既直線係前點停波。呢個進攻模式好處係可以有更多進攻球員係前場,容易製造人多打人少既優勢;壞處係你後場連同麥湯文尼都需要具備一定既護波同俾穿透力直線既能力。麥湯更要有足夠既控制節奏同閱讀到直線既線路。因為只要中場一俾失,後場就未必夠人手去防守對方既反擊。

哈辛sir係前場起用4-4-2陣式壓迫,見到曼聯雙進攻中場既企位即刻有調整。前場施壓維持不變,縮後防守就會改用5-3-2,將羅美奧移後,形成三中堅,一對翼衛防守對方一對翼鋒。當普巴或者般奴嘗試現身就可以動用邊中堅出去防守,咁係中間就仍然會有兩名中堅去防守C朗拿度。三名中場就縮窄中路區域防止曼聯中路入滲。進攻就將羅美奧移後,兩名中堅拉闊。禾特包斯逗後串連。以3-1-4-2陣式去進攻。後場高波搵波也去跣,阿當斯負責搶第二點捕位。

修咸頓大踢開放式足球 曼聯話開正我果範
修咸頓賽前排係第十位,今季都係高不成低不就,降班未輪到佢,爭歐洲賽事都冇佢份。冇包伏下就同你曼聯對攻,反正大家都係中游隊伍。修咸頓今場將條中場線壓得非常前,前鋒企到禁區線,中場線壓過半場,係前場施壓。呢個踢法係上半場就開正曼聯果範波。呢個防守模式令後場多空間俾曼聯兩翼去爆,加上般奴同普巴既級數要俾穿實在太容易。一開波已經快上快落,早段兩三分鐘,修仔既波也係右路邊線扭過華拉尼傳中;曼聯既福仔亦係右路45度傳中;兩面既落點都相當有威脅,可惜冇隊友接應到。阿當斯係5分鐘係三閘線都照射,途程太遠就射左個藍天射球。跟住既龍門球開出,普巴一個靚直線俾辛祖再直線俾C朗拿度。C朗扭過門將左腳一盪,可惜被皮賀番黎護左個空門。整個攻勢完美展現左今場戰術縮影。轉頭迪基亞失誤,踢生波唔夠高俾羅美奧截左即刻打轉守為攻,左路既艾利安路斯右腳curve尾袋落,獲加仔右腳撞番個波埋中間,可惜阿當斯人前波後將個波頂番出黎。後上撞射既禾特包斯又省中梳爾彈出。一輪彈彈波之後,梳爾交俾辛祖打反擊。3打1下選擇自己去,窄位一射被救出。都要讚讚碧拿歷遮條傳球線路遮得幾好,但辛祖如早幾步交都應該可以傳到俾大師兄埋門。頭十分鐘已經相當刺激。

又係上半場入波,又係入得一球
踢到20分鍾,曼聯一下轉守為攻。般奴係自己三閘線避開羅美奧攔截。轉到身踢個長波去右路俾福仔哨。沙利素飛身都踢唔中個波。福仔壓入禁區傳去尾袋,俾辛祖門前撞入,領先一比零。曼聯最鍾意就係呢種後場大把空位俾翼哨既防守模式。沙利素呢個波都要負責任,失左位俾個波可以俾般奴打穿身後仲要係內線。曼聯上半場5射4中,當中不乏半單刀既黃金機會,但都只能靠一下反擊入一球。咁咪又出事囉!踢左30分鐘,哈辛sir藉住有球員受傷治理時,改變球隊進攻模式,用番4-4-2陣式,推前兩隻閘改踢番兩翼側擊。羅美奧推番前就有利佢係中前場掃蕩。其後既15分鐘都盡是修仔天下。未變陣前係2射0中,變陣後15分鐘係有5射2中,搶番球賽主導權。

修咸頓下半場冇耐已經追平
下半場修咸頓用史提芬斯入替碧拿歷,純位換位調動。修咸頓唔駛3分鐘已經追平。整個攻勢由中場開始發動。獲加比達斯開始回後,經一輪控傳回俾龍門,引到曼聯球員上前逼搶,再經龍門踢去左面皮賀發動攻勢。佢連同艾利安路斯同阿當斯係左路形成3打2。皮賀持球引左達洛特出去就傳俾空晒既艾利安路斯。佢一個直線交俾入楔既阿當斯。佢係窄位盪射尾柱入網追成平手。 呢個波咁輸要先講前場逼搶。福仔同C朗係一齊逼向沙利素,而達洛治係冇上去施壓。福仔本身應該要逼皮賀,而沙利素係應該交俾C朗拿度。到皮賀壓上三閘線再持球,達洛治就唔應該太早離開位置去防守,應該先遮住皮賀俾艾利安路斯既線路,等普巴或麥湯文尼追番艾利安路斯先追出去埋波。梳爾亦要負一定既責任,再次包左越位。閘位球員冇可能企得後過中堅。都要讚阿當斯射得相當乖巧。

追和既修咸頓攻勢仍有 曼聯都有機會但被科士打救晒
追成平手後既修咸頓仲有機會反超前,靠住快速反擊先有岩士唐中路左腳施射偏離目標,及後有波也怒推半場係禁區頂射門被救出。曼聯都唔係冇機會,先有麥隊長接應罰球人群當中起腳被龍門用腳踢走,後有C朗拿度係左面禁區內接應梳爾傳送窩利一射被救出,再有達洛治係右路窄位窩利被擋出。普巴緊接再黎一下近距離倒掛,可惜踢唔中個波。

蘭sir都嘗試換陣但換完效果衰過唔換
兩隊都陷入膠著狀態,未能創造更多既埋門機會,踢到71分鐘,修咸頓反而先換人,哈辛sir用利華文度入替艾利安路斯。岩士唐調過去打左中場,將獲加比達斯打上一格踢右中場,右閘就交俾利華文度。蘭sir就係75分鐘用伊蘭加入替麥湯文尼,改踢4-4-2陣式。將般奴同普巴縮後踢平排中場,福仔推前一格拍C朗拿度。左翼交番俾辛祖,右翼就用伊蘭加試試。換完陣只得般奴一腳過頭直線俾福仔盪射較有威脅,但整隊係陣地戰更因般奴同普巴踢得較後,缺乏隊友係對方禁區頂附近做波。蘭sir再係82分鍾收起福仔換入連加特,推伊蘭加打最前,連加特打左伊蘭加打右。麥隊長係補時階段有機會絕殺對手,接應角球頭鎚攻門。可惜被科士打橫身撲出。最後一比一,完。

總結
又係一場可贏可輸既比賽。如對方既防守反擊把握得好既話,曼聯可以輸一兩球,但如果曼聯上半場把握力好,可以一早已經拉開對手。缺少左卡雲尼同格連活既影響非常大,70歲組合睇黎要試下用。C朗拿度唔認老真係唔得,英超既速率同強度對佢體能消耗極大,踢到70分鐘到已經見到佢唔多爆得起。再用佢踢單箭頭係三四日一場既賽程黎講應該唔會係理想既做法。另外,把握力問題亦真係急需改善。曼聯淨番14場賽事,有7場要面對爭四既球隊(白禮頓都仍在頭四射程範圍)其餘7場都係榜下游多,隊隊都要搶分。以曼聯既近況,中間仲有兩場對馬體會既歐聯賽事,能夠拎到頭四既機會我開始感到不樂觀!蘭sir睇你會唔會放棄歐聯啦!

如果喜歡我們的文章,請即分享到︰

標籤: 曼聯  修咸頓  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→