多災多難既一季(唔講都知邊隊啦掛)

Hea談曼聯 於 27/05/2022 發表 收藏文章
曼聯係收咧戰作客一比零不敵水晶宮,好在有白禮頓幫手贏左韋斯咸,先令到曼聯以第六名完成球季,下季仍有歐霸盃既參賽資格。今季曼聯既表現同上兩季有極大分別,除左戰積差,蘇B亦被炒,再有領隊走馬上任,亦創下不少新記錄(單季失波最多、單季得分最少等)。呢季可以話係多災多難,依家就重溫下整季加個人少少諗法。

蘇B時期
曼聯開季兩勝一和,除左第一場贏列斯較有說服力,其餘兩場都係踢得唔好但都不敗,都帶到唔少奪冠希望俾曼迷。夏季轉會窗完結前,曼聯簽入球王C朗拿度。冇人諗過C朗會突然回歸曼聯(包括蘇B)。C朗雖然加強到曼聯前場既入球把握力,但同時間亦令到蘇B不得不改變整隊既進攻同防守模式。進攻核心由普巴支援般奴變成由般奴支援C朗,而最大既改變就係防守模式。呢兩年建立既前場逼搶雖然仍有很大既進步空間,但都總算起碼叫有固定模式。突然之間要遷就C朗去搵一個適合佢及整隊球員既防守體系係需要時間同磨合。另外,係頻密賽程下,對愛華頓賽事只收起左C朗半場,蘇B就已經被「明宿」口珠筆伐(但半場明明係領先緊,換出黎反而失番球)。其實C朗既體能根本不能一周三賽,但蘇B已經失去左自己帶隊既膽量。之後佢帶領曼聯贏下又輸下,有時又靠C朗尾段入波保帥位,但最後都難逃被炒既命運。被屈福特大炒四比一後,就同管理層和平分手。

卡域克時期
管理層炒左蘇B,只係為平息球迷既怒火,根本未有諗一個長治久安既方法,炒之前冇諗過會請邊個黎做,純粹就炒左先。個人覺得蘇B係有責任,但個責任唔能夠完全入佢數。夏季冇針對性補強防中位置,係陣容一個根本性既問題。突然簽入C朗(不在蘇B可控範圍),令到前場人手過盛,亦要改變整隊進攻同防守體系,同時管理層同球迷對曼聯既期望增大,對蘇B黎講壓力遠超佢所能承擔。蘇B落台,管理層又冇諗過點攪,就搵卡域克頂住先。個人覺得卡sir帶呢幾場都算係咁,對住車仔維拉利爾同阿仙奴,都拎到兩勝一和,亦夠膽輪換主力。可惜,管理層係呢三場波期間搵左蘭歷克做暫代領隊,而佢亦對蘇B非常忠心,不想侍二主就主動離開,確實難得。

蘭sir上任初期
蘭sir係12月初接掌帥印,好多人都對呢個逼搶教父有極大期望。曼聯管理層同佢既合約係非常有趣,今年會係暫代領隊,季尾可以選擇繼續帶又或者轉做球隊顧問。呢種合約模式帶黎既影響容後再談。佢初上任頭兩場波既頭半場都見到有少少逼搶既影子,但只得半場就無以為繼。頭十場波雖然贏多輸少,但場上戰況明顯同佢上任時講會做到既有明顯出入。冬季轉會期間,管理層除左冇為佢增添新球員外,更借走左馬斯亞、迪亞奴同雲迪碧克。最大影響莫過於格連活既私人事件,除左失去一個入球點外,亦直接令連加特被逼留隊。點解管理層唔幫佢買人?就要講番佢份約:一年暫代領隊,分分鐘下年到第二個接手就唔知冬季買既人岩唔岩新帥用,加上當時中前場陣容爆晒棚,中場你話唔夠人用,但又唔見你出下馬達、雲迪碧克,就算蘭sir自己用黎用去都係馬迪普巴麥湯費特般奴,所以管理層唔課金俾佢買,我又覺得情有可原。

蘭sir接手後期
到足總盃爆冷俾米堡踢左出局,跟住大敗俾曼城。首回合,雖然蘇B只係輸兩球,但場波俾人當馬嬲咁撚;呢場蘭sir帶就仲衰,戰術部署錯漏百出,仲輸夠四個一皮。然後歐聯16強又輸埋俾馬體會,跟住輸埋俾李斯特城。蘭sir就開始批評整隊波,又話果個唔跑得,又話果個唔夠落力。總之就隊波輸唔關佢事,一定係球員問題。但如果有場場睇,就知佢既排陣戰術,換人調動既效果,都絕對唔講得上係好。本身已經係暫代領隊,隊中球員或者唔多支持佢,加上帶左十場八場波都唔覺佢戰術有咩獨特之處,再擺出一顧問心態既帶隊模式,冇鼓勵只有批評,令到更衣室完全失控,根本冇乜球員為佢賣命,更加難可以團結變番一隊波。季尾開始出現讓四大戰,令曼聯有機會上番黎,但軍心渙散,加上季尾對強隊較多,最後就以第六名完成賽季。管理層亦係季尾宣布下季用阿積士教頭坦克領軍,蘭sir就轉做顧問。佢亦係季尾宣布佢會做奧地利國家隊領隊,身兼兩職,仲聲稱會幫曼聯繼續重建。

總結今季,展望下季
今季可以用兩個字作總結:「廢」和「亂」。球員場上表現「廢」,進攻防守組織「亂」,管理層處理球員同領隊問題亦冇方向,終於攪到一隊上兩年排第二既球隊變成一隊中游。蘭sir亦承認C朗係踢唔到逼搶,整隊既防守戰術用半季都搵唔到一個最合適既方案,間接承認C朗十分影響領隊既防守部署(你要佢踢逼搶,就要犧牲佢既體能同入波把握力,C朗又肯唔肯放棄個人數據去成全隊波)。當然C朗只係其中一個原因,今季整隊都跌晒watt,尤其麥湯費特既進步不似預期,福仔大倒退,辛祖遲遲未能融入,後防派膠派到九彩等,亦係今季成績差既原因。季尾領導層瘋狂炒人,重組整個架構,看似有好大決心去重建隊波,要觀望一下領導層究竟肯下放俾新帥幾大權力。新帥坦sir上任,首先要處理隊波既球員問題,多人約滿同有意離隊,係冇左歐聯資格下,點樣補充番足夠人手應付下季4條戰線係難攪既課題;之後就要著手處理防守戰術,堅持己見踢高位逼搶,還是縮後踢中低位防守,還看坦克sir如何妥協;進攻就好睇坦sir改唔改變到般奴踢法迎合佢既模式,又睇下佢引入到咩球員再評論。個人相信下季係磨合期,希望能保到頭六挑戰前四,最快都要第三年先可以挑戰下冠軍。眼望季尾管理層既操作都似似地有心大改革,希望今次真係俾時間坦sir去執隊波,重建曼聯皇朝吧!

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

如果喜歡我們的文章,請即分享到︰

標籤: 曼聯  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→