場場都要踢,睇下般奴幾時捱唔住(聯賽盃次回合賽後報告-曼聯對諾定咸森林)

Hea談曼聯 於 03/02/2023 發表 收藏文章
首回合曼聯作客3:0擊敗諾定咸森林,今場移師奧脫福。上半場兩隊互無記錄;下半場曼聯憑後備入替既費特同馬斯亞各建一功,兩球淨勝對手晉級。

《有冇必要派遣大量主力出戰》
「兵疲」應該全世界都見到,但坦克好似唔覺得有問題。上場對雷丁都已經盡遣主力出戰,只係後防輪換左一對中堅同梳爾;今場繼續精銳盡出,接近擺出勝利十一人,只係收起迪基亞、養傷既艾力臣同華舒福,改用希頓、費特同加拿祖頂上。先唔講場波踢成點,般奴、艾力臣同卡斯美路係隊中既作用係冇人可以取代到,艾歷臣已經因上一場對「英冠」比賽被剷傷。今場領先住三球情況下,有冇必要出晒佢兩個去踢呢場波呢?如驚早失波會被反超的話,大可以只起用卡斯美路穩固中後場防守。第二,呢場比賽係相對有條件等小將去犯錯去吸收經驗(畢竟有三球差距),如果連呢一場波都唔用小將去踢去練,你會夠膽係聯賽、足總盃16強、聯賽盃決賽同歐霸盃附加賽及之後既賽事用佢地咩?

《上半場既表現係極差》
一開波森林踢出黎既風格係輸少當贏feel,前場放棄逼搶,4-2-3-1踢中低位防守,打到反擊就打,失左控球就番晒黎守,讓出控球權等曼聯踢陣地戰。未知究竟係收到指示留力,還是真係力有不逮,曼聯最有威脅既埋門要數到半場尾段先有韋賀斯接應卡斯美路early-cross頭鎚頂中柱。左路overload踢唔到效果,只見加拿祖單打獨鬥;右路安東尼早段較活躍,亦多同雲比沙加配合,但兩人都欠缺傳中能力,只得安東尼推大位有一兩腳水準不太高既埋門;中路亦欠缺小組推進,費特既參與度同進攻能力實在係有限公司,令中場既運轉大打節扣。相反森林間唔中既一兩下反擊更直接,要不是希頓擋出對方兩次甚有威脅既埋門,曼聯分分鐘要先失波。

《辛祖同馬斯亞既回歸係開心既》
下半場戰況同上半場冇太大分別,森林雖然多左控球,但能製造到具威脅既埋門接近冇;曼聯減少左前場逼搶,但因森林壓前左少少,打一兩下轉守為攻仲似番少少樣。坦克係62分鐘換入馬斯亞、辛祖同華舒福。換入馬仔同辛祖等佢地適應番比賽節奏,pick up下比賽狀態可以理解;但換入福仔而非用柏利斯迪,明顯想贏場波多過俾機會年輕人囉!73分鐘,馬仔門前快腳射入係值得開心,但成個攻勢三打二個處理都幾差,馬仔絕對需要檢討傳球既線路同力水。費特係3分鐘後既入波則要讚般奴既視野同傳中質素,令入楔尾柱既福仔輕鬆接應撞橫俾門前既費特建功。82分鐘,坦克換入連迪路夫同麥佳亞,將連迪路夫改踢防中。呢招都算特別,不過時間太短,加上對方實力有限,難以睇到效果如何。最後,曼聯二比零取勝,兩回合計贏五比零入決賽。

《總結》
慶幸呢場波冇主力受傷,中前場多番馬仔同辛祖令到球隊係踢法上可以有改變,絕對係好事。格連活亦被撤銷所有控罪,佢既能力有目共睹,期待佢操番起再為曼聯上陣。不過,費特踢正選只係權宜之計,需要防守時先用佢會較佳。如要對弱隊去進攻,坦克絕對需要諗第多個方法增添中場推進到前場既模式。借入沙碧薩或者可以解決到,佢需要時間適應同觀察,但我睇都會好用過麥費。下場對水晶宮,睇下可唔可以贏番場啦!

留言


請按此登錄後留言。未成為會員? 立即註冊
    快捷鍵:←
    快捷鍵:→