國際賽後的英超賽事 - 曼聯對白禮頓(預測曼聯正選陣容)

Hea談曼聯 於 04/04/2021 發表 收藏文章
剛過去的國際賽期﹐曼聯有多達16名球員入選國家隊﹐包括有梳爾、麥佳亞、甸軒達臣、拉舒福特、迪亞路、拜利、普巴、馬斯亞、雲迪碧克、迪基亞、連迪路夫、般奴費南迪斯.、占士、麥湯文尼﹐外借左的連加特和拿維特。番到黎聯賽賽事﹐睇睇國際賽期對曼聯既影響又大唔大先。

略略講下國際賽既球員
先講講英格蘭﹐拉舒福特因傷退隊﹐今周都應該無法上陣。甸軒達臣三場賽事都只係座上客﹐睇住樸比表演。而梳爾同麥隊長則有上陣﹐修夫基都算【錫住】梳爾黎用(我估係爭正選輸左比捷維爾)﹐只在3月29日對阿爾巴尼亞賽事上陣﹐踢足90分鐘仲交出一個靚助攻俾哈利簡尼打破悶局﹐而麥隊長則係最後兩場賽事都踢足全場﹐對波蘭更係賽事末段一箭定江山﹐狀態睇黎不俗。小弟估計甸軒達臣、麥隊長同梳爾加埋冇被徵召入隊既雲比沙卡﹐都會繼續係聯賽正選上陣。

初次入選國家隊既迪亞路就無緣上陣﹐只可以場邊感受下氣氛先﹐但拜利係27號對尼日既賽事﹐踢到66分鐘就被換出﹐30號既賽事亦冇上陣﹐莫非佢又傷左?連迪路夫係29號就已經完成左佢國家隊既任務﹐兩場都踢足﹐而最後既友誼賽就休息﹐所以都有接近一星期既休息。

法國既普巴就三場賽事都有上陣,剛剛傷癒都可以算係寓賽於操﹐不過馬斯亞就係對哈薩克斯坦場波因傷退下火線﹐果場佢都貢獻左一個靚轉身加助攻﹐睇黎今場都唔會見到佢漫遊球場﹐對曼迷黎講都唔知算係福定禍!西班牙既迪基亞既正選位都俾人搶左﹐三場都係做觀眾﹐番到黎英超都係睇下波先啦。雲迪碧克番到國家隊都係特別醒神﹐雖然上陣時間唔多﹐三場加埋踢左二十四分鐘都有一個入波。雖然係果場入波只係錦上添花﹐但對個人信心上點都會有少少提升既。

攻擊重心的般奴費南迪斯則【非常醒目地】對塞爾維亞時拎左面黃牌﹐黃牌儲夠數下﹐對盧森堡既賽事要停賽﹐變左佢有差唔多一星期既時間休息﹐終於可以真係抖一抖﹐備戰白禮頓既賽事。占士係威爾斯繼續擔大旗﹐兩場外圍賽都踢足90分鐘﹐仲用個頭入左一球。今場邊路缺人既情況下﹐相信佢都會繼續正選上陣。最後既麥湯文尼就三場賽事都踢足全場﹐估計今場都會先抖抖﹐畢竟馬迪、費特都冇參加國際賽﹐可以有充沛既體力踢呢場波。

預測曼聯正選陣容
首回合作客白禮頓﹐曼聯驚險地憑住般奴費南迪斯係補時階段射入12碼﹐三比二反勝對手。今場估計白禮頓都係會用番3412陣式應戰﹐都係中後場防守﹐壓縮中路空間﹐反擊就靠韋碧黑、梅菲同杜沙特係前場攪攪震﹐缺少左矮腳虎林比對曼聯黎講都係著數左。曼聯就到前場受傷兵困擾﹐福仔、馬仔、格連活特都有傷﹐好大機會未能披甲上陣﹐得番占士、後生仔迪亞路同埋剛上一隊既梳泰爾可以上陣﹐估計都係得占士會正選上陣﹐左面睇黎會倚靠普巴客串。對5後衛陣容都係要從邊路入手﹐用番4231會較為正路﹐雖然卡雲尼剛傷癒﹐狀態未知﹐但前線缺人下﹐都要用卡叔拍住般奴攻堅﹐一對防中就起用馬迪拍費特。戰術繼續overload左路﹐多左卡叔係前面搶點﹐梳爾同占士都可以多D做early-cross﹐而普巴亦可以多走入禁區接應﹐外圍遠射就靠般奴了。

預測正選陣容
甸軒達臣
雲比沙卡 連迪路夫 麥佳亞 梳爾
占士 馬迪 費特 普巴
般奴費南迪斯
卡雲尼

p.s.希望見到雲迪碧克拍卡雲尼﹐般奴打中場中再加普巴係左路﹐三個齊齊出睇下會有咩效果
標籤: 曼聯  白禮頓  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→