國際賽後既聯賽踢得特別醒神好似係(賽前陣容預測 - 屈福特對曼聯)

Hea談曼聯 於 19/11/2021 發表 收藏文章
上周係國際賽日,正好俾上場輸左俾曼城既曼聯回一回氣。雖然隊中亦不乏主力球員要為國效力,但亦有馬達、馬迪、拉舒福特、馬斯亞、連加特、辛祖、甸軒達臣、雲迪碧克、雲比沙卡、泰利斯同麥湯米尼等人可以休息。蘇B亦放左一星期假,周二先番到曼聯基地進行練習。放下假諗下野或者可以突破到固有既思維,又睇下今周對住屈福特有冇咩改變。

曼聯近況絕對唔係好。自改踢三中堅後,只能贏近況比佢更頹既熱刺,作客摸和阿特蘭大,上場亦輸比曼城二比零。輸波唔係最大問題,最大問題係場上戰況慘不忍睹。我一直都唔認為三中堅係最合適曼聯既陣容。原因係呢套陣容會無限放大兩隻正選翼衞進攻力不足既問題。亦不能改打5-4-1,起用兩個翼鋒球員去提供寬度,而犧牲具創造力既般奴費南迪斯,翼鋒亦冇攻中既思維意識去進攻half-space位置。雖然三中堅能利用人數優勢去鞏固後防,但踢落亦唔見得比踢四人防線為佳,而放棄左使用翼鋒球員既陣式,亦令到進攻完全啞火。與其為彌補麥隊長既缺點而改變陣式,何不抽起佢睇下其他組合有冇火花?

上述都只係空談,因我唔相信蘇B會唔用麥隊長。預測番今場正選陣容先,面對護級份子,相信蘇B會改用4-2-3-1陣式去強攻對手爭取勝利。龍門繼續係迪基亞。麥隊長國際賽兩場都有波入,仲做手勢叫球迷收聲。今場睇你表演,將會拍住連迪路夫握守中路。梳爾受傷上陣成疑,令泰利斯或會正選上陣。右閘正路都會係雲比沙加。中場方面,一個防中會係麥湯文尼,另一個則係雲迪碧克。佢或能趁費特踢左兩場國家隊賽事而正選上陣。攻擊中場繼續係般奴費南迪斯。左翼將會係放棄左為國效力而留係基地訓練既拉舒福特;右翼或會係辛祖,用佢取代近期表現有所回落亦較為踢得比較獨既格連活特。前鋒線將會繼續係大師兄C朗拿度。考慮到佢踢足兩場國際賽事,又睇下蘇B夠唔夠膽先用格連活特踢正選,先加強前線既活力。

預測曼聯正選陣容
迪基亞
雲比沙加 連迪路夫 麥佳亞 泰利斯
辛祖 麥湯文尼 雲迪碧克 拉舒福特
般奴費南迪斯
C朗拿度

如果喜歡我們的文章,請即分享到︰

標籤: 曼聯  屈福特  

留言


請按此登錄後留言。未成為會員? 立即註冊
    快捷鍵:←
    快捷鍵:→