唔輸已經要還神就唔好打飛機啦(賽後報告-曼聯對水晶宮)

Hea談曼聯 於 07/12/2021 發表 收藏文章
蘭域克走馬上任不夠三日就要安排正選陣容迎戰水晶宮。佢今場排出4-2-2-2陣容,係踢法上同陣式上都有顯著既不同。今次就淺談一下呢場波見到有咩改變。先講出場陣容,龍門迪基亞,防線由左至右係泰利斯、麥佳亞、連迪路夫、達洛特。一對防中係麥湯文尼拍住費特。左右攻擊中場係般奴費南迪斯同辛祖。前鋒線係華舒福同C朗拿度。

進攻模式既轉變
水晶宮今場甚少係前場作出逼搶,都係中場線佈防,前鋒最多係三閘線遮線。曼聯整條防線用波相對輕鬆,踢法上後防多左用長傳不停嘗試直接搵福仔跑空位等佢係較深既位置停波,令到對手既中後場防線要後移,曼聯球員再向前壓上利用對方中後場防線後移既空間再搵般奴或者辛祖去做波。C朗拿度則多數係最前點先負責牽引住另一名中堅,有機會先突襲一段。兩名攻擊中場則收入中路協助組織,般奴則會踢得較近邊路係對方三閘線幫手串連較炮,利用佢踢對角斜線或者直接同C朗拿度連線。辛祖持球則大多會以突破為主或同附近既隊友作小組配合。今場佢多時走到左路位置,清空右側邊線交俾達洛特一人負責進攻。一對防中主要係中場負責駁腳轉方向,費特會因應對手中後場防線位置而壓上禁區附近,麥湯文尼較稍稍墮後去補位。一對二閘經常壓上,達洛特直頭係統治右路,利用佢既側擊力單人進攻。左閘泰利斯則利用佢具質素既傳中球提供側擊。

蘭域克強調既逼搶見到雛形
球隊進攻減少左係中後場build-up,減少左兩翼球員係邊線突破推進,改以長傳放空位再整隊向前壓,令到球隊即使前場一失控球權都可以有較多人手係對方既後場施壓作出瞬間既壓迫。當對方開龍門球時,兩名前鋒各自防守一對中堅,兩名攻擊中場防守一對二閘,企位上再以遮住中場既線路為主,務求逼二閘拎波後要向住邊路踢。麥費組合則壓上防守人地既中場,二閘則緊身纏繞對方兩名翼鋒,唔容許佢地輕易轉身。一對中堅一個搶一個包去應付賓迪基。整個防守都想逼對方踢長波,盡快拎番控球權,地波打出黎就靠費特麥湯中場拼搶攔截。當對方可以係中場停到波,整隊會先縮番中場重整陣形,只要當對方一後傳既時候,中前場6個人又再向前施壓,整條防線又向前移,盡量要對方回後到龍門再踢。

呢場唔輸其實執番身彩

上半場可以話佔盡優勢,但你話真係黃金機會威脅到對方門將唔多,全場僅有三腳射門中龍,但係場上形勢確係見到曼聯今季終於叫主導球賽。下半場體力下降,壓逼速率一低左,就令到水晶宮有可乘之機。要不是尾段佐敦艾耶近距離射斜,都應該冇機會贏到波。再講,呢套4-2-2-2前場施壓有隱憂,對方其實使用4-3-3係有3名球員去overload曼聯中場,只係水晶宮既高耶迪同舒路普都不是控傳型球員,踢法上較為粗枝大葉,只有一個加拉查串連中場先令麥費搶得輕鬆。但都有幾下俾人輕鬆打穿,再放到長波俾沙夏用速度打防線身後空間。水晶宮質素所限,而曼聯感覺煥然一新,此消彼長就覺得曼聯好好多,但呢場波都係僅僅熟,不宜過份興奮。

呢套陣式又會犧牲邊堆球員呢?又會有邊個得益呢?
根據今場踢法作分析,防線方面,雲比沙加再不是必然正選。佢既後上時間掌握、傳中球既質素、個人盤扭能力難以勝任單閘踢晒成條邊路既要求。達洛特就明顯係得益既球員,但佢必須要加強個人防守力。中場方面,馬迪、馬達既速率同體能都難以長時間維持高強度壓逼,或會在比賽尾段出黎控制節奏。雲迪碧克應會多左時間上陣,中場中路淨番麥湯文尼同費特,都需要人輪換。位置上連加特或者較辛祖更合適,但合約傾唔掂數睇怕都會坐板坐到走。漢尼拔呢個小將我覺得有機會會係其中一個得益者,睇下佢有冇機會啦。前場方面,馬斯亞踢波既態度將會令佢離隊,除非有明顯改善。迪亞路呢個擅於係邊路突破既小將都未必合適,外借對佢成長會有幫助。得益既會係已經後備落場既艾蘭加。開季前我已經講呢個小將有力爭取輪換,可翼可鋒,擅於走位,多同隊友配合既踢法係佢特色。速度亦快但略嫌缺少左個人突破侵略性,有潛能再進步。

睇下蘭域克點調教隊波
蘇b都曾經起用4-2-2-2但為時不長就轉番用4-2-3-1用普巴踢左中場,原因係當使用般奴同普巴踢兩個攻擊中場時,前場既反擊速度欠奉,麥費組合係中場中路難以有效率地組織個波上前場,加上福仔始終不擅長背向對方係前場停波,所以要改變陣式將奴般踢番攻中位解決串連問題,再擺番隻翼加強邊路推進速度。蘭域克初到埗都係幾日,繼續觀望一下佢既領軍模式,睇下可以維持幾耐先。

如果喜歡我們的文章,請即分享到︰

標籤: 曼聯  水晶宮  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→