哥帥話輕鬆過練波既打吡戰(賽後長文分析-曼聯對曼城)

Hea談曼聯 於 07/11/2021 發表 收藏文章
雙方出場陣容
蘇B排出5-3-2陣式。龍門迪基亞,三名中堅左至右係麥佳亞、連迪路夫、拜利。左右翼衛係梳爾同雲比沙加。三名平排中場左至右係費特、麥湯文尼、般奴費南迪斯。前鋒係格連活特拍C朗拿度。
哥帥排出4-3-3假九陣。龍門艾達臣。防線左至右係簡些路、魯賓戴亞斯、史東斯、卡爾獲加。逗後中場為洛迪,前面一左一右係根度簡同迪布尼。左右翼係科頓同耶蘇仔。前鋒則係假九既貝拿度施華。

一開波見到速率頻率相差咁大已經知道呢場波死硬
踢波講兩樣野,一係技術,二係體能。技術不如人就唔該你練好體能準備同人鬥跑,每人跑多步去彌補番技術既不足,但當你連體能都輸既時候,已經唔駛再講甚麼戰術部署。曼城上周末主場出戰,周中歐聯都係主場仲要輕鬆取聯,今場只係過隔離街踢波;曼聯上周末要搭火車去倫敦,周中飛去意大利激戰打和,今場就番屋企踢波。曼城可謂以逸待勞;曼聯則真係拖住疲憊既身軀去作賽。一開波已經見到兩隊球員跑動頻率既差異。費特同綠木已經算係較好,般奴、C朗、連迪路夫、麥隊長等都明顯跟唔上節奏。般奴特別明顯,當佢要彈一腳俾隊友,又或者嘗試大腳轉方向,成功率極低。而佢仲要兼顧防守更睇得出力不從心,有一下被科頓輕鬆玩弄已經追唔到。整隊人連6-4波都拍輸,就見到個體能頻率既分野。

蘇B唔係冇部署,但哥帥早已識破
蘇B雖然都係排5-3-2,但今場嘗試作出針對部署。防守改以5-3-1-1陣式,最前僅留C朗作突擊,綠木縮後一格去守住對面既逗後防中洛迪,希望綠木可以限制佢派牌,去阻止佢帶動曼城進攻,亦係中路增加人手防止對方用獲加或者簡些路內切中場既踢法係中路overload進攻。可惜,哥帥絕不是省油的燈,簡些路改為責住條邊踢,配合科頓狂打側擊,根度簡則不停插入half-space進攻。右路沉底出波靠耶蘇,獲加就間中上到黎三閘線出下波,主力留守係中場線協助史東斯防守。史東斯係中場做最後一人,魯賓戴亞斯則拉開靠近左路協助組織。洛迪高就企番係中路駁下腳,迪布尼則自由度極大,除左係中路保持控球,亦會到右路拉闊傳中,亦有走到half-space位置進攻。貝拿度施華則游走前場,幫手做小組配合。整隊集中係邊路發難,針對5-3-1-1只得一名翼衛防守邊路,邊中堅又被後上既攻擊中場牽制,利用45度傳中同沉底出波不停施壓。出波以急勁中腰波、地波為主,放波落點以中堅既身後空間同小禁區位置,等後上插入黎既中前場球員攻門。

失波果下已經見到曼城既戰術部署
曼城一開波已經係前場逼搶,逼使曼聯球員係後場大腳斬上前,曼聯前場除左欠缺可以停波護波既球員,斬上前既落點亦唔夠深,個波往往過唔到中場,防線推唔到出黎就不停受壓;而曼城就立刻搶到球賽主導權。踢到6分鐘,失果一球波正正就係呢個問題。曼城高壓逼搶曼聯後場。雲比沙加被壓至角球旗位置,佢選擇斬俾係中場線既綠木搵佢嘗試停波,但個波唔夠力,落係三閘線即被洛迪輕鬆拎番控球權。搓左兩板就轉去右路既耶蘇仔,佢橫傳俾後上既獲加就early-cross扯個急勁中腰波去尾柱。曼城缺乏一個中鋒,但就正因缺乏呢樣野,入楔既球員都係老鼠仔型,不停楔係中堅既身後,令到曼聯既防守球員難以捕捉對方走前定後,只能企係個位度一齊移而非man-mark對方。點解獲加呢下傳中極具質素?因為曼聯陣式上只有三名中場,一轉方向就少左一個邊路中場球員去防守後上既閘位球員。梳爾亦要保持防線完整性,加上要防止費特被耶蘇仔突破,所以未能出黎防守獲加,令到佢有大量空間同時間睇住黎傳。根度簡捕到尾柱一撞撻左已經響起警號,冰人門前勉強解圍不遠下,又係三閘線被洛迪執左第二點再分俾左路後上既簡些路。佢一沉底再出個急勁中腰波。拜利飛身解圍,但判斷失誤,出腳時間完全錯晒就射左入自己龍門。烏龍波永遠係最靚,咁就收死迪基亞。

蘇B究竟係睇唔到定係覺得佢既部署work
轉過頭又見到迪布尼右路45度early-cross,科頓黎遲半步。之後到科頓沉底又出波。呢下科頓直頭係望都唔望,總之落到去就出。踢左成廿分鐘擺明踢呢招,亦見到3中場補得一邊就補唔到第二邊,淨係打呢招都猜到你blackjack,咁點解唔立時轉個5-4-1守番穩兩條邊路先?或者驚一轉就俾人強打中路掛。

曼聯上半場只得呢個機會,亦係全場既唯一機會
曼城谷左頭廿分鐘,都要回一回氣,選擇縮一縮後守,亦可以睇下有冇空間打反擊。曼聯終於有一段時間可以組織下進攻。經過一輪搓傳,個波由右路轉去左路。梳爾直接傳中,C朗左腳窩利一射,被艾達臣救出。個波跌左係綠木腳下又未能反應得切,撞左個波出界。上半場得呢腳中目標,亦係全場唯一一腳中目標,可見今場曼聯進攻力直頭係「零」。

要不是聖基亞上身又可以早早完場
曼聯呢段係前場逼搶,成功拎番多少少主導權,但自己猜猜下又俾左個波人。當個波係人地度又出事,今次瀨野既係雲比沙加。貝拿度施華係中場中路現身,般奴再次輕易俾佢吸引左埋波。睇當時既企位,應該係費特埋去對波,而般奴應該要右移去守根度簡。根度簡輕鬆接應貝仔既橫傳,聯同簡些路、科頓就已經三打一雲比沙加。根度簡一下直線就隊穿曼聯右路防線。雲比沙加衰咩?佢見到自己比人三打一,係唔應該追出去守簡些路,應該後移去守番邊路既科頓,唔係舉手叫拜利去包就完左任務。閘位球員最忌俾人打直線打穿中堅同自己既盲眼位,因為一穿人地就可以直插禁區,真係香港青訓都識既野,佢竟然唔識。科頓入到禁區cut-back俾後上既迪布尼一射省到梳爾彈橫,耶蘇仔回身拎番,近距離再射俾聖基亞神救,未能拉開紀錄。緊接既右路角球開出,迪布尼輕鬆橫傳俾禁區外既簡些路,佢可以左腳一控,再踩一踩地踏順先射,又俾聖基亞飛身救出。由角球開左到散出去禁區頂,曼聯球員真係慢得可憐。再黎右路角球,直接開出俾禁區頂既簡些路窩利就高出,完全冇人防守禁區頂位置,死球教練究竟攪邊科?轉過頭,洛迪由右路一個大轉向已經搵到簡些路,再向前俾一腳已經係科頓1-on-1雲比沙加。科頓擺幾下又禁地波出黎,冰人向住自己門口一篤,好彩聖基亞用腳又解到圍。鏡頭一轉已經見到迪布尼係禁區內右腳快射尾柱又被救出。跟住左路角球一開,冇人守既簡些路係右邊禁區角又射又被擋出。要不是聖基亞,一早已經俾人四五六左。

頂到半場都仲有價講,半場輸多球就玩完
踢到45分鐘,簡些路係左路k角位望空curve尾柱,個波落點非常毒,係小禁區右面落。個波彎過麥隊長係梳爾面前落。麥隊長有條件先解圍但佢選擇左漏。跟住到梳爾都有條件解圍但唔知係冇人提佢定係佢太有信心,佢選擇唔出腳等個波漏出界。貝拿度施華跟住戰術部署,捕係梳爾身後就望住龍門口一篤。迪基亞要橫移下,突然個波篤埋黎,咁近距離都冇計可作出反應就拍左個波入網。曼城領先二比零,就可以宣布場波玩完。

哥帥:夠皮啦,唔好傷就得。
下半場蘇B果斷抽起擺左個烏龍既拜利,換入辛祖,變番4-2-3-1嘗試加強攻力。辛祖居左綠木居右。用番兩隻翼既曼聯係個進攻上都多左兩條邊路去推進,但中路缺乏連接點,亦令整隊波難以向前推進。只係空有控球,根本製造唔到威脅。而哥帥則落左命令,猜住就得唔駛刻意搶攻,真係空晒先踢落去試下。面對曼城既鳩猜足球,需要既就係逼搶圍搶去拎番個波踢。曼聯球員速率本身已經輸蝕,上半場仲要撲黎撲去,下半場想谷都唔係咁易,加上蘇B既逼搶戰術亦屬BB級,前中後三線要點壓點逼亦明顯見唔到有部署,成個下半場就係馬騮搶波,但搶極都搶唔到。俾你搶到,前面又缺少快馬突襲,得C朗一個又未能停波等支援,完全係毫無還擊之力。

兵疲就容易受傷,傷埋梳爾就仲大獲
踢到67分鐘,蘇B用福仔換入無表現既綠木。福仔出黎都唔太幫助到隊波,始終連波都搶唔到,個人再快都冇用。70分鐘,梳爾因早幾分鐘撞到個頭而被逼退下火線,由泰利斯入替。暫時未知狀況如何,希望佢冇乜事。除左梳爾,連迪路夫同般奴都有摸下自己既背部,疑似背部有傷。麥湯文尼係跑動上亦有少少唔自然。隊波已經非常唔順,如仲有咁多傷兵加入,真係唔知講咩好。80分鐘換入雲迪碧克都係做下樣試下。最後場雞一響,曼城兩球輕取曼聯。

總結
哥帥對蘇B,領隊級數固然有差距,但場內球員質素差距亦相當大。曼聯陣中有邊個球員可以踢到曼城既正選?要講呢場波輸既主因我會話係體能速率既差距。比數睇落輸二比零,但場上面輸既完全唔止呢個數。除左球員防守連環犯錯,進攻可謂一潭死水,冇人係前面可以護到波停到波,就被人㩒住半場黎踢。我都算係迷普份子,一見到呢D情況就好自然諗起佢。但當C朗回歸,般奴又係必然核心情況下,想圍繞普巴黎踢就真係想下先;而佢亦都未必再有心同蘇B賣命。般奴場場踢足亦令佢體能爆廠,發揮未如理想就等同廢左曼聯進攻。一早知兩邊翼衛既進攻力會廢左兩條邊路,但連防守都錯漏百出就…….
換帥真係解決到?又有邊個會黎肯接呢隻鑊?咩陣式先最fit現有人腳?無既話,呢隻鑊蘇B都係食住先啦!

如果喜歡我們的文章,請即分享到︰

標籤: 曼聯  曼城  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→