呢場波,有今生冇來世(賽後分析-阿根廷對法國)

Hea談曼聯 於 20/12/2022 發表 收藏文章
史卡朗尼排出4-3-3陣式。龍門馬天尼斯。防線由左至右係達利芬高-奧達文迪-羅美路-莫連拿。三名平排中場左至右係麥卡里士打-安素費南迪斯-迪保羅。前線左中右係迪馬利亞-艾華利斯-美斯。

迪甘斯排出4-4-1-1陣式。龍門羅列斯。防線由左至右係靴蘭迪斯-烏柏麥簡奴-華拉尼-觀迪。中場線由左至右係麥巴比-拉比奧特-祖亞文尼-丹比利。攻擊中場基沙文支援基奧特攻堅。

《史卡朗尼有針對部署;迪甘斯出人有問題》
我賽前分析有講,「英格蘭對法國」場波對史卡朗尼係一個好好既借鏡。史卡朗尼放棄使用上場既菱形中場,改為踢三中場,模仿英軍軒達臣,用迪保羅去主力防守右路協防麥巴比,同時選擇用美斯踢右翼鋒去牽制對方進攻力強既靴蘭迪斯,令靴蘭迪斯要顧忌美斯不能壓太上,令法國既主要進攻路線左路冇太多發揮機會。右翼起用突破力強既迪馬利亞單對單挑戰防守力較強既觀迪。中場兩個就緊纏對方既拉比奧特同祖亞文尼。莫連拿同達利芬高緊貼麥巴比同丹比利,盡量唔俾佢地拎波轉身。艾華利斯繼續不停奔跑施壓一對中堅。基奧特則交由奧達文迪同羅美路輪流招呼。防守部署完就到進攻,美斯繼續右路發難,聯同迪保羅同後上莫連拿overload左閘靴蘭迪斯,尋找機會轉向俾左路既迪馬單對單,中場安素主要保持控球權控制節奏,麥仔則會插入禁區支援艾華利斯。美斯則較自由,除左係右路發難,亦會係中路嘗試打小組入滲。點解要強打左閘?因為一黎靴蘭迪斯進攻時會推得幾前,令左路會有較大空間;二黎麥巴比係唔會回防,而法國只踢平排二人中場,基沙文進攻時會向前壓上支援,要係攻守轉換時回後拍番祖亞文尼踢防中,移拉比奧特去左路防守,呢一個舉動係有時間差,所以不論英格蘭同摩洛哥都想係呢度大做文章,再尋找對角空間進攻。阿根廷今場成功了。

法國隊賽前傳出華拉尼同干拿迪都患病,而拉比奧特早幾場亦因患病所以冇出場。今場迪甘斯決定照派上拉比奧特同華拉尼出戰,烏柏麥簡奴則代替干拿迪上陣。干拿迪病要用烏柏麥簡奴係冇辦法中既辦法;華拉尼決賽紮住頂硬上都可理解;但拉比奧特則大把替代品,卡馬雲加同科芬拿唔會差佢太遠,甚至乎用上細爆根度斯用活力搭夠都仲得,但偏偏迪甘斯照起用冇態既拉比奧則係極大問題。冇狀態速率跟唔上,多次傳球失誤失控球權,整個上半場完全係遊魂,令到整隊法國隊係中場完全失勢。其他正選跟番前幾場既出人係正路,踢得好就無謂變太多,同埋明顯係阿根廷會針對你黎踢,可以臨場睇住佢點踢先黎應變。

《淨睇上半場以為可以熄機訓覺》
一開波,阿根廷就起勢咁搶。跟住戰術部署,搶贏中場就控制戰局,想贏既氣勢不停係法國後場製造攻勢,左中右點點開花。迪馬、麥仔、美斯都不乏射門機會。法國則因受壓要將防線縮到至禁區前頂住,而反擊上,基奧特或許因傷關係下屢屢未能停波,麥巴比亦因莫連拿同迪保羅重點照顧下,甚少發揮到速度同突破力。因迪馬強勁突破力,右路丹比利要縮後協防觀迪,難以幫手打到反擊。22分鐘,迪馬左路搏到丹比利腦筋犯錯獲得十二碼,美斯一射入網。得勢不饒人既阿根廷繼續尋找第二個入球;法國失左波都仲係未訓醒咁,繼續唔知踢緊乜。36分鐘,阿根廷轉守為攻,一個反擊正正就係從左閘靴蘭迪斯入手,由迪保羅彈前,到麥仔右路妙傳俾左路後上既迪馬,幾下first-touch就彈散法國左路既防守。迪馬輕鬆射成二比零。淨睇呢40分鐘,法國完全唔似踢緊世界盃決賽。40分鐘,迪甘斯頂唔住用杜林同艾姆尼入替基奧特同丹比利,將麥總移入中路。此舉對戰局起唔到任何作用,依家中場失勢輸晒控球權,換兩隻翼入黎作用何在?阿根廷最驚係高空轟炸,仲換走空中霸王基奧特更令人摸不著頭腦。補時足足補左8分鐘就要幫法國㩒足8分鐘平安鐘。球證夠鐘就響雞,番去抖抖先。

《阿根廷莫莫地要縮;法國入波唔駛多兩分鐘就夠》
下半場開始兩隊冇作出任何調動,法國繼續苦戰,連進攻組織都難就唔好講射門。64分鐘史卡朗尼先用阿古拿入替迪馬,加強番左路防守;同時間阿根廷都開始縮番後少少,係後場做番緊密防守,上半場既搶都去得幾盡。法國開始係呢個時間拎番多少少主導;阿根廷就搵空間打反擊(美斯都要差差電先)71分鐘,迪甘斯換入卡馬雲加踢左閘;用高文入替基沙文。整隊改踢4-4-2,終於變陣去搶攻阿根廷。呢個變陣立竿見影,麥總除左可以係中路活動,亦可走到左邊路發動進攻。卡馬雲加入替亦穩住左路既進退失據場面。80分鐘,法國一下反擊,麥總無心插柳踢前,艾姆尼攝贏奧達文迪,係禁區被撞跌獲得12碼。麥總一射響袋,追番一球。1分鐘後,高文係中場搶到美斯腳下球策動反擊。拉比奧特吊去左路俾麥總。佢同杜林1個one-two就過左大意標前既莫連拿,再球不著地窩利射尾柱入網,追成平手。法國頭70分鐘既垃圾表現,只需踢兩分鐘好波就入兩球。史卡朗尼則需要負責,見到對面開始上力,領先兩球下又唔嘗試換入屠夫馬天尼斯增強防守,又唔嘗試換下中場前保持球隊活力,俾法國帶點偶然性加上麥總既把握力就追成平手。兩隊之後既攻門都無功而還,就加時作賽。

《加時仲刺激;勝負靠射碼》
加時上半場,史卡朗尼即用蒙迪爾入替犯錯既莫連拿;迪甘斯則唔旭住。兩隊加時上半場都踢得比較保守,都係搓住先唔好亂咁搏拳。96分鐘迪甘斯換入科芬拿搶中場;102分鐘史卡朗尼終於抽起跑乾既迪保羅同艾華利斯,換入柏列迪斯同前鋒馬天尼斯準備搏鎚。加時下半場就黎料,108分鐘,阿根廷反擊,一個三角短傳,馬天尼斯接應安素斜線,突破越位係右路窄位怒射被救出,美斯門前執雞再次領先。干拿迪係113分鐘入替受傷既華拉尼。118分鐘,麥總執到角球第二點,係左面禁區頂遠射被蒙迪爾用手肘擋到獲得12碼。佢再射又入,再次追成平手。補時階段,門將馬天尼斯大字形撲出艾姆尼既單刀;前鋒馬天尼斯則又再次失機,接應隊友傳中,無人看管頭鎚撻頭下錯失入波既黃金機會,最後都係要射碼分勝負。120分鐘,戴巴拿入替達利芬高準備射碼;迪沙斯亦入替觀迪。最後,阿根廷4射全中;法國則有高文既12碼被救出,祖亞文尼射出界,4射只得2中下,失落世界盃冠軍。冠軍係屬於阿根廷既!

《總結》
史卡朗尼既部署加上球員既執行力成功贏左頭70分鐘既比賽;迪甘斯只能扔晒可以進攻既球員出黎搏一搏,相信佢當刻非常懷念普巴同賓施馬,但又俾佢地搏到兩球番黎。踢20分鐘好波,就差D可以成功贏埋。史卡朗尼則顯得有少少手足無措,贏緊兩球有條件早早換人保持勝果。如果只領先一球而唔加強防守球員,則相對可理解。加時,迪甘斯卻唔放手一搏又係錯失機會,明明見到阿根廷球員體能爆晒計、法國體能則遊刃有餘下都唔揀搶攻對手,埋下射碼伏線;史卡朗尼去到加時就諗揀人射碼都無可厚非,畢竟球隊體能都去到極限,難以搶攻法國。最後頂得住都要靠門將馬天尼斯;前鋒馬天尼斯則係黑過墨斗,我唔會覺得佢冇能力,果下單刀走位係有意識,但奈何今屆世界盃唔屬於你,點射都射唔入,鬧佢敗家又唔係,我都幾鄧佢慘。多謝法國同阿根廷踢左一場有今生冇來世既比賽。麥總都係23歲,黎緊仲有幾屆等著你;美斯亦完成足球大滿貫,再唔會有任何爭議下,登上球王寶座。美斯完夢了。恭喜恭喜!世界盃冠軍,你值得擁有!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→