只失一球所以防守好? (賽後分析- 曼聯對拜仁) 精選

曼聯係呢場歐聯生死戰中以零比一不敵拜仁。除左係呢組包尾出局之外，亦成為英格蘭歷史上首支係歐聯小組賽中失球達到十五個既球隊。小弟賽前預測唔睇好曼聯可以贏波而回，面對full-team既拜仁，曼聯係進攻上係完全佔唔到丁點甜頭（拜仁望落都未係開盡turbo踢），而防守更係屢次被打穿，特別係應付對方既兩翼側擊，可以話係險象環生。坦夏賽後話球隊防守做得非常好，整場踢得都唔錯，奈何最後都係輸波。咁究竟曼聯防守又係咪真係好？

<<先睇下拜仁既防守>>
拜仁係陣地戰果陣係選擇用zone defense。圖一可以見到甘美治提場叫左閘既戴維斯要跟進番麥湯文尼，而金玟哉亦準備補位，甘美治自己則去番中路偏右位置去守番般奴。
圖二清晰見到拜仁係守緊一個4-4-1-1既陣式，以zone defense為主。
右閘雲比沙加上黎支援，辛尼就追番後守。中場甘美治同哥利斯卡係番中路做屏障。持球既伊雲斯則交俾梅斯亞拿去逼，壓縮佢傳球空間同唔俾時間佢諗點交。中場線同後衛線都畫到兩條線，球員互相間亦有準備補位。
<<曼聯又係點呢>>
坦夏繼續踢高位逼搶，中前場選擇釘人方式壓迫，
麥佳亞同華拉尼亦各自負責梅斯亞拿同簡尼。安拉拔既工作除左要守人外，亦需要適時係中間執漏補窿。圖二見到麥佳亞有少少失位但都未被扭過，但麥湯已決定放棄自己守果個而夾擊梅斯亞拿，導致中路被人輕鬆打穿。安拉拔又係咪應該早少少去填番個窿？
去到陣地防守，圖五見到曼聯條中場線唔係一條直線，中場球員間失去聯繫，曼聯明顯唔係守緊一個zone defense，都係維持釘人方式，但係呢一刻邊個捉邊個已經亂左龍。

圖六，華拉尼跟指示照追墮後現身既簡尼，防線就得番三個人，相互間既空位極大。加拿祖企位亦遮唔到線又守唔到人，令簡尼傳俾後上既馬沙奧利。其實高文都係空，如傳俾高文，梳爾都係面臨以一敵二。
圖七，見到呢個傳中已經可以輸波，唔輸只係馬沙奧利傳得未夠準，而辛尼始終搶點果下都係差少少。
《總結》
雖然小弟只係cap左其中一兩個攻勢，但對方今場係唔止一次係邊線側擊傳中做左好多機會出黎。係咪只係輸一球就代表防守好好呢？小弟認為係前場用人釘人高位逼搶下去試圖搶控球權係可以，哪怕後防用麥佳亞呢個risk都要take，因為如果前場一逼得甩，就可以人多打人少，用最短時間完成埋門，亦係依家呢隊曼聯最有機會入波既方法（依家好難係陣地戰創造機會入波），而今場係前場高位逼搶亦有唔少次數係成功，但當人打穿你高位壓迫，你中後場係咪仲要釘人式去守還是縮番落黎企番一個聯防去守先係重點。今場兩隊最大分野係拜仁既兩翼既速度可以輾壓曼聯二閘；而曼聯兩翼既速度係快唔過拜仁既二閘。除左速度，幾時推幾時引球等支援幾時傳，兩隊兩翼既成熟程度亦有分別。輸係預左，早早出局專心本土賽事亦比留戀歐洲賽事著數，但今場又傷左梳爾同麥佳亞就真係慘不忍睹。不論佢兩個傷勢如何，周末對利物浦既賽事都唔會踢到，希望呢場唔好又飲七喜就好！