又一場贏波唔代表踢得好既比賽 (足總盃賽後分析 - 曼聯對維拉)

Hea談曼聯 於 11/01/2022 發表 收藏文章
蘭歷克排出4-2-2-2。龍門迪基亞。防線由左至右係梳爾、華拉尼、連迪路夫、達洛治。麥湯文尼拍費特出任防守中場。兩名攻擊中場係華舒福同般奴費南迪斯。前鋒線係卡雲尼拍格連活特。

謝拉特排出4-3-2-1。龍門馬天利斯。防線由左至右係泰格、明斯、干沙、卡殊。中場線左由右係積及藍斯、雷斯、麥堅。兩個攻擊中場係布安迪亞同屈堅斯。前鋒則用上丹尼京斯攻堅。

曼聯公佈就用4-2-2-2,但踢落就四不像
出場名單陣式就公佈係4-2-2-2,話用綠木拍卡雲尼踢前面,但踢落就完全唔係果回事。一開波就見到般奴同卡雲尼上前壓迫,而福仔同綠木則叫做踢兩個攻擊中場,但兩個基本上都係責住邊路黎踢,似兩隻翼鋒拉邊。般奴居左卡叔居右,而般奴則經常墮後去左邊拎波或者先現身再轉身向前走位,甚少回徹到中場較炮同較少出現係中場中路位置,似係一個會回後拎波既左前鋒,多於一個4-4-1-1既攻擊型中場;卡叔則主力係右路既前點。呢個進攻模式既不是4-2-2-2又類似4-2-3-1,極其四不像。整隊嘗試以overload左路為主,但踢落
明顯唔順。

開波初段雖然入波先,但絕無開心只有擔心
一開波,曼聯趁維拉未企穩陣腳就爭取到主導權。兩翼既福仔同綠木回歸邊路係進攻參與度幾高,但只要佢地回傳到中路經麥費組合做波,就會擾亂左進攻節奏。中場誤傳都幾多。開頭受壓既維拉靠後場搶到波再打反擊都有一兩下機會,布安迪亞單人扭入禁區右路傳中既威脅相當大。踢到8分鐘既曼聯角球攻勢,費特右路靚傳中搵到麥湯文尼頂入,以一比零領先。以曼聯近期絕對係一個好開始,但呢8分鐘入面已經見到曼聯進攻組織力弱同失誤多既問題。雖然領先,但至少要擔心多82分鐘。

維拉中場完勝曼聯,由五五波變成六四波
失波後既維拉冇自亂陣腳,更開始踢出佢地既風格。係前場就開始壓迫曼聯,針對麥費組合停波護波組織力弱既特點,加上中場人數優勢多次搶贏曼聯中場,攻勢一浪接一浪。今年睇左幾場維拉,謝老四都係幾慣常用4-3-2-1。防守時一對攻擊中場防守對面麥費組合。中場三人一字排開先收窄中路及half-space位置。當對方閘位拎波會先由邊中場去對位,兩名攻擊中場再後移半格遮中路,其餘兩名中場則順移強邊,球員間保持一定既聯繫。前鋒則係一對中堅前逼進攻方先揀一邊進攻,先縮窄傳球路線選擇。進攻上布安迪亞既策動,積及藍斯同麥堅既後上。丹尼京斯既支點停波同屈堅斯既衝擊都不停俾到麻煩曼聯。要不是屈堅斯未能把握冰人犯錯射中楣,加上迪基亞集中精神,與及一兩下折射改變方向唔中目標,維拉早早可以追平。曼聯則依靠外圍施射同把握維拉中場球員自己交失波去反擊埋門,黃金機會唔算多。曼聯領先一球番更衣室。

蘭sir都係改番踢4-2-3-1,可惜維拉未能追平
下半場出黎,蘭sir改番4-2-3-1去迎戰下半場。不過維拉已經打起左個勢,繼續不停向曼聯後防逼搶,搶到就繼續攻。控球比率一度去至七三之比。卡雲尼今場狀態甚差,雖然見佢周圍走,但要停波回波就失左蹤,左路福仔踢落又未到無里神氣,但硬係冇左果種火同眼神。前面停唔到波,後面又組織唔到,就被維拉㩒住黎踢。整個下半場都盡是維拉攻勢,可惜既係前面食左兩球詐糊,亦因迪基亞撲出卡殊既怒射先未能平扳敗局。曼聯只靠界外球戰術,由般奴妙傳俾兩翼去爆先有機會入波,但今場綠木既獨食病又發作,多次拎到波就一心埋門冇望過隊友,但射出黎質素一般;麥湯文尼亦多次禁區外起腳,但不是猜到空先射,而係射埋去搏下啦果種居多。曼聯最後驚途駭浪下以一比零險勝維拉晉級。

總結
小弟好多場賽後分析都分析過4-2-2-2並唔係曼聯最佳陣容,亦暗示左蘭sir根本係知道,估唔到咁快今場就已經要跪低改番踢4-2-3-1。先講番今場波,蘭sir強調既控制比賽失效,前場逼搶漸不復見,隊型更係散亂。睇數據會見到13射9中,看似攻門甚多,但當中好多都係憑對手失誤打反擊既攻門,要係陣地戰中創造到既埋門極少。全場控球僅得43%,反映到整隊整場都係捱打,而睇福仔被換出後既神情木口木面就知道內部更衣室問題比場上表現問題更大。夏季轉會窗已開,唔見得曼聯會買人,亦唔可能買人就可以解決到隊問題。
唔評論蘭sir既戰術部署正確與否,淨睇場上球員既執行力同表現可以話係唔合格。雖然只係踢左19場聯賽賽事,但以蘭sir領軍呢個半月既表現黎睇,唔好話頭四,今年可以第五名完成到都可以還神!(希望完季可以
鞭屍)

如果喜歡我們的文章,請即分享到︰

標籤: 曼聯  維拉  FA CUP  

留言


請按此登錄後留言。未成為會員? 立即註冊
    快捷鍵:←
    快捷鍵:→