卡斯美路呢個頭鎚都值二千萬鎊啦（賽後簡評-曼聯對車路士）

《車路士反擊幾好「睇」；曼聯贏在把握力》
坦克沿用番上場贏般尼茅夫既陣式，華舒福復出但先列後備。坦克係進攻上明顯有別於上幾場，今場冇再將梳爾逗深去幫手做波，反而同雲比沙加兩個拉到最闊，後場build-up靠連迪路夫、華拉尼同卡斯美路。艾歷臣同般奴則先向前走，尋找線與線之間既空位，有需要先回後駁腳。面對車路士唔係太高強度既逼搶，後場用波問題不大；最大問題係當失去控球權要轉攻為守時，前鋒夏維斯極容易係前場停波策動反擊。一對中堅甚少對佢施壓，令佢輕鬆轉身再搵到兩隻快馬去攻擊邊路空位。夏維斯聯同加拉查再跟進，多次憑簡單反擊製造到威脅。只係球員把握力其差，上半場七次射門零中目標（當中不乏冇壓力下埋門），否則有幾下相信都可以入到波。當然不能只怪防線施壓不足，前場高位逼搶成功率低，亦係其中一個問題，令對方可以輕易打番生個波或者直接搵到夏維斯去做。上半場曼聯都算落下風，全靠卡斯美路5分鐘接應艾歷臣既罰球傳送建功，早早領先一球。再係上半場補時階段，辛祖一次教材式翼鋒走位，接傳卡斯美路挑傳再橫傳俾馬斯亞，等佢射成二比零先有燕梳球。上半場曼聯射四中二入兩球，把握力同對面形成強烈對比，踢波都係要講入波既。
《車路士送多兩球你入；曼聯輪換休息等下場》
下半場出黎兩隊都不乏入球機會，可惜都係過唔到兩隊既門將。73分鐘，車仔中堅科芬拿係禁區內被般奴通渠。佢選擇轉身再出腳嘗試攔截，結果就踢中般奴隻腳被罰十二碼。科芬拿展示左一個學界式防守，先胡亂出腳被人扭過，然後再選擇係冇把握情況下出腳攔截（背身轉身落腳），地點仲要係禁區內。般奴一個「唔該」射成三比零。輸第四球又係科芬拿後場大意橫傳失誤，最後被福仔輕鬆射成四比零。最佳出醜球員非科芬拿莫屬。坦克則係45、70同86分鐘，先後換走艾歷臣、般奴同梳爾等主力休息，下場主場對富咸，睇黎大家都會見到大量副選，正選則要留力準備6月3號既足總盃決賽。曼聯今場面對對方既防擊明顯有問題，89分鐘亦被菲歷斯單騎推半場射入。曼聯未能保持清白之身、只能以四比一擊敗車路士，亦正式獲得下屆歐聯參賽資格。
《總結》
有分就完成任務既一場波，都算係半驚逃駭浪之下完成。雖然曼聯早入波，但車路士反擊既入肉程度絕對比我地為高。七個機會都入唔到一球係非常困難既一件事。曼城前場既把握力一定比車路士勁，如果想以呢套戰術去拼曼城，被人大炒不是夢。一場過既波，希望坦克度度點樣可以守穩先。今場淨計防守既表現係唔合格。另外，安東尼既受傷係一個大影響。望落情況都唔樂觀，應該都唔可以係決賽上陣，寄望辛祖可以及時回勇，同雲比沙加可以係右路提供到側擊。有雲比沙加幫辛祖做拉扯同配合，相信可以俾到多少少壓力曼城左路。下場輕鬆踢，但主場出擊之下，贏波都係必需，去答謝球迷支持。