值得拎三分既一場反勝賽事 (賽後分析-曼聯對阿特蘭大)

Hea談曼聯 於 22/10/2021 發表 收藏文章
雙方出場陣容
蘇B排出4-2-3-1陣式,門將迪基亞,防線由左至右係梳爾、麥佳亞、連迪路夫、雲比沙加。麥湯文尼同費特出任一對防中,左翼華舒福,右翼格連活特。前面由般奴費南迪斯拍住C朗拿度攻堅。
加斯柏連尼則排出5-3-2陣式,龍門梅素,三名中堅左至右係柏洛文奴、迪米羅、迪朗。左右翼衛係馬爾利同薩柏哥斯達,中場三個係柏沙歷、費奧拿、古普美拿斯。一對箭頭則係梅利爾拍住伊歷錫。

放棄前場逼搶所以輸兩球,但進攻其實唔差
一開波,曼聯主導球賽,嘗試爭取入球。開波早段有一下綠木麥湯連線,綠木走回中圈,接應雲比沙加傳送後輕輕一撥,就讓左俾後上既麥湯文尼大步前推。佢再直線俾由左路走入黎中路既福仔形成單刀。可惜福仔一射柱邊出界,否則已經可以先開紀錄。點解呢下攻勢咁流暢?源自於阿特蘭大既部署。佢踢5-3-2陣式但並唔會縮係中後場,反而整隊會壓前。兩名前鋒壓迫兩名中堅,費奧拿一個會逗後少少去守攻中位,另外兩個就係前面追麥湯文尼同費特,中場形成man-mark。只要攻中位球員向前拉出空位有人後上,就可以係中路進攻。呢下就咁岩綠木同般奴調左位,所以就形成呢個攻勢。另外,阿特蘭大整隊壓前逼亦令到福仔、C朗、般奴可以插入中堅身後空間去大造文章。不過麥湯文尼同費特都唔可以揹住一個防守球員,再搵到前面空位踢長傳,變左當波回後要再經中場駁多兩下腳先可以轉到方向又或者向前搵到般奴再做。今場麥費組合都算醒神,甚少交失波或者被人逼甩,可以透過多幾下傳送就傳番個波出黎。不過曼聯係防守方面就有問題啦,當曼聯係前場完結左攻勢後,係選擇退到對方三閘線與中場線中間開始佈防,放棄前線逼搶,盡量保留C朗既體力,同對李斯特城一樣。呢個防守模式雖然令反擊空間增加,但好講求整隊隊形既防守位置緊密性。阿特蘭大就可以慢慢組織進攻,因福仔甚少回防,阿特蘭大多次overload曼聯左路,引到曼聯聚係左路就大腳轉方向攻擊右閘既空位。踢到15分鐘,阿特蘭大後場大腳踢前比梅利爾哨,佢停完波就回傳俾後上支援佢既伊歷錫。加埋後上既薩柏哥斯達,係曼聯左路形成三個打二個(冰人同費特)。正正就係福仔回唔切防,伊歷錫送薩柏哥斯達一程,沉底傳中俾入楔既柏沙歷係門前輕鬆撞入,領先一比零。失波後既曼聯繼續進攻,中路還是兩側都有嘗試,可惜費特禁區射門被救出。般奴同C朗中路配合後一射又省到人。C朗右路壓入禁區以一敵三,係窄位施射又射得太正。踢到29分鐘,阿特蘭大獲得一個右路角球。古普美拿斯開出,迪美羅輕輕推開梳爾後,麥佳亞又黎遲半步,就被佢一頂入網,領先到二比零。 輸死球往往都係整隊人既責任,只能檢討依家防守角球既模式是否適合自己。

改變防守策略就係成功既第一步
落後兩球下,唔知係蘇B指示還是場上球員放手一搏,整隊防守不再縮係中後場,改為係前場高位逼搶,不停施加壓力,但C朗則相對少參與去壓迫。呢個改變令到阿特蘭大唔能夠再輕鬆係後場慢慢組織,不停出現傳球失誤。曼聯即刻有大量機會。先有C朗左路推大位撻Q,又有福仔走空單刀,但嘆左少少慢版就被迪米羅從後解圍,跟住到費特般奴福仔配合,壓入禁區右腳射斜。到補時階段,福仔把握到對手中堅漏踢,接應傳送窄位單刀一盪又中楣。由輸左第二球,改變防守模式後,盡是曼聯攻勢,只係把握唔到。

狂攻下終有回報
下半場出黎,阿特蘭大先用洛華圖入替受傷既迪美羅。到47分鐘,般奴把握對手失誤,一個斜線傳俾C朗又單刀。但佢first touch做得唔好,控離左少少身,受壓迫情況下只能勉強起腳,射得太正被擋出。轉過頭就有個角球攻勢,福仔執到對方解圍既波,窩利一射又唔中目標。踢到52分鐘,阿特蘭大後場傳球失誤,般奴一腳妙傳斜線送福仔一程,佢入到禁區窄位冷靜地一盪,個波慢溜尾袋,追番一球。

66分鐘換人都唔太遲 但再早D就更好
追番一球之後,士氣番晒黎,即刻繼續施壓。55分鐘開始,短短兩分鐘已經令到阿特蘭大有三名球員用職業犯規截停曼聯既進攻,明顯阿特蘭大已經陣腳大亂。最好就係呢個時候再換攻擊球員去衝一段,不過蘇B未有係呢個時候換,見到隊波仍然順既時候唔換人,都可以理解;而阿特蘭大就換左沙柏達入黎嘗試係前線加強壓力,但呢段個勢輸晒,出到黎既作用不大。

好彩有迪基亞保住後方
轉過頭,綠木係右路禁地波傳中,可惜麥湯搶點撞射又中柱,曼聯攻勢一浪接一浪。踢到66分鐘,蘇B首先換入卡雲尼同普巴,換出福仔同麥湯文尼。福仔今場係左邊同走中路中堅身後空間極具威脅,除左錯失幾個黃金機會,亦不停嘗試係左邊突破。佢既速度入楔帶快左曼聯既行軍速度,而佢今場亦甚少衝入人堆式盤扭。可能福仔剛剛復出,蘇B唔想佢過度疲勞就換走佢;而費特今場踢得比麥湯文尼好,換走麥湯調入普巴都明顯想加強中後場組織力。對面見你換入進攻球員,就抽起進攻球員換入中場,改踢5-4-1希望可以守到尾。兩分鐘後,反而阿特蘭大先有機會。薩柏達近門一抽,被迪基亞單腳救出。跟住馬連路夫斯基係禁區再射多腳,個波又勁又飄,不過都比迪基亞打走,成功保住後方。

努力之下終於有回報
蘇B係73分鐘再用辛祖換入貢獻不多既綠木,加強邊路側擊。兩分鐘後就有收獲,角球被解圍後,辛祖執番第二點交俾邊線既般奴,再向前走拉開對手等般奴睇定定黎出。個波係禁區橫過去左尾柱既麥隊長前面。佢隨即作出射門,個波近柱入網追成平手。上場既罪人變成今場既功臣。成功追成平手後,亦帶動到C7既鬥志。隨左聯同卡雲尼等前場球員係前場施壓,亦有幫手係左路回防。戰至80分鐘,梳爾左路一個傳中,C朗跳頂對手,成功用頭鎚波網,反超前三比二。尾段用馬迪換入抽筋既費特亦都係合理調動。最後場雞一響,曼聯拎到極重要既三分。

總結
尾段見到C朗全速回防,再衝番上去幫手進攻,見到佢既體能係冇問題,而落後兩球下,係防守策略上既改變係贏呢場波既關鍵。對李城一役加上對阿特蘭大頭25分鐘,可以睇到曼聯係不應該係中場開始防守,應該利用前場球員既速度,麥費組合既覆蓋面,兩閘單防能力,係前場作出壓迫。C朗亦不需過份慳住佢既體能,一佢根本仲有貨賣,二我地仲有卡雲尼。整隊係前場搶斷就可以立刻攻擊防線既空位。另外,左福右辛呢個組合係時候要試下,辛祖絕對有能力係右路提供到傳中球俾C朗。福仔既入楔走位亦能幫C朗拉開防守球員。般奴雖然貢獻左兩個助攻,但佢狀態唔係太銳,傳送既質素同成功率都比之前低。如可輪休既情況下,可嘗試改變陣式,改踢4-3-3,抽起般奴並活用普巴同雲迪碧克,嘗試用佢兩個去彌補般奴休息所帶來的影響。呢場波既表現係值得贏波拎三分,亦為雙紅會前打下一枝強心針。

如果喜歡我們的文章,請即分享到︰

標籤: 曼聯  阿特蘭大  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→