修夫基成功<守>入八強 - 英格蘭對德國 (賽後分析 - 長文)

Hea談曼聯 於 01/07/2021 發表 收藏文章
不出賽前所料,路維都係用番343陣式。正選陣容大致同預測陣容一樣,只係用左哥利斯卡同添姆華拿取代左根度簡同格拿比;而修夫基則更改左球隊既陣式,改用343迎戰,同賽前預測只有兩個變動,抽起左一個攻擊中場,用查比亞打右翼衞,梳爾出任左翼衞;抽起左科頓,改用沙卡出任右翼,獲加則移入中路變成右中堅。

英格蘭修夫基既排兵佈陣同戰術部署
修夫基繼續佢分組賽戰術 - 以守行先。三中堅加兩翼衛明顯係針對住德國既陣式作出部署,全場一對一防守。見識過德國對葡萄牙overload兩側,兩翼衛插入身後盲眼位。修夫基決定利用兩翼衛捉住高辛斯同甘美治。三個中堅一對一捉住梅拿、華拿同夏維斯。獲加既速度亦彌補左速度慢既麥佳亞同史東斯。一對防守力攔截力甚強既雙斯則保護防線前面,以免卻奧斯可以從中路打直線打穿中場線。前場則以沙卡同史達寧係前場自己搵食,簡尼則係最前點作牽引同幫手停波。整體戰術都係中後場防守,搶到就俾兩翼去爆,去唔到就經雙斯拖慢比賽節奏,再慢慢尋找機會。

德國路維既排兵佈陣同戰術部署
對住葡萄牙為出線而非勝不可,將堅達當右閘踢壓上三閘線提供闊度,呢招今場不復見。路維知呢招會暴露防線缺陷,為保持防線完整性以防止英格蘭快馬進襲。堅達、曉姆斯、魯迪加三人都唔會壓上前。兩翼側擊繼續依賴翼衛甘美治同高辛斯。哥利斯卡則輔助卻奧斯派牌,下欄野佢做晒。前面梅拿、夏維斯墮後幫手組織,而華拿則係最前點負責做拉扯同插入禁區接應。防守方面都係中場開始佈防,當英軍中場開始回波向後,整體先會向前施壓。進攻則依賴卻奧斯派牌同夏維斯係前場引球推進,製造威脅。

英軍踢得保守係意料中事,德國都踢得保守就意想不到
一開波見到德國嘗試主導球賽,英格蘭就擺明等君入甕。德國早段更憑攻守轉換之際,兩次成功俾穿英格蘭防線。可惜碧福特既出迎同賴斯回追既犯規都令到兩次攻勢無功而回。兩下險象亦令英軍球員醒一醒,站穩陣腳下更一度控球在腳,逼到德國要退守中後場,更有史達寧推大位射遠柱被救出。英軍雖然重奪主動權,但中前場明顯缺乏重心去派牌做波,空有控球但實際威脅有限。只能靠史達寧同梳爾係左路發難,右路既沙卡則發揮麻麻,被魯迪加拑制。即使轉到身,卻奧斯、哥利斯卡等亦好快作出夾擊。而簡尼亦因缺乏供應,踢得沉寂。都要讚下德國既防守,非常有紀律同專注。踢到上半場最後一節,德國開始拎番個波踢。先有甘美治係右禁區角左腳curve尾柱,可惜高辛斯比查比亞貼身追住無法攻門。再有夏維斯突然中路望空,直線質比入楔既華拿,可惜碧福特出黎封位極快,成功擋出華拿既埋門。今場德國控球進攻個節奏受制於英格蘭一對一既防守而拖得較慢,但更相信係路維採取較保守既踢法,一對防中並冇經常後上插入接應,更多時候會平排係番中路駁腳。而堅達亦長期留守後半場。兩邊翼衞缺乏個人突破力,難以係邊路製造威脅。前線三子亦受制於英格蘭三名中堅同兩名防中既包圍,係中路被圍困。兩隊都踢得保守,戰情膠著地完半場。

半場冇換人﹐戰情繼續膠著
下半場一開波,德國再次主動進攻。夏維斯今場踢得幾生,多次係前場策動進攻,更在47分鐘係禁區頂窩利狂抽,只可惜被碧福特以極快反應單手撲出。跟住佢亦接應魯迪加既轉方向係右路策動反擊,推左三四十碼後一腳斜線傳俾走位既華拿。可惜史東斯捉晒華拿路,佢一推落死位就出腳攔截,成功破壞一下反擊機會。戰情繼續膠著,兩隊都冇乜具威脅埋門。踢到68分鐘,修夫基抽起冇表現既沙卡,換入格利殊。而路維亦抽起華拿,換入格拿比。格利殊踢左翼,史達寧改踢右翼,而格拿比則位換位踢最前。兩隊陣式上冇轉變,大家都換入突破力更強既球員,尋求破局既機會。

差少少成也史達寧﹐敗也史達寧
74分鐘,史達寧不負契仔之名。係中路一下變速突破三名德國防守球員後,彈左個直線俾禁區頂既簡尼。處於心臟地帶既佢吸引晒德國球員內收防守。簡尼立刻將波橫傳俾左路既格利殊。同時間,史達寧後上插入禁區跟進。甘美治唯有出去遮格利殊,就令到後上既梳爾變成無人看管。梳爾接應格利殊傳送後,第一時間傳個急勁地波入中間。個波越過兩名德國球員到史達寧腳下,佢係門前撞射破網打破疆局。成個組織由佢發動再由佢完成,今場佢既表現其實不太差 ,多次靠佢係邊路停波同個人突破﹐只係佢決定何時扭何時俾都仲有進步空間。失波後既德國並冇放棄,一係中場開波就放一個長傳等甘美治直插心臟地帶,逼到麥佳亞要係禁局頂掃跌佢。可惜梅拿既處理過唔到人牆。入波後既英格蘭控球時,更多後傳橫傳,盡量保持控球在腳。但史達寧一下失誤,差d斷送江山。佢係前場無壓力下回後,但冇人接應。夏維斯一句唔該就長驅直入策動反擊。梅拿接應夏維斯既直線成單刀之勢,右腳一盪竟然唔中目標,錯失黃金機會。德國繼續進攻,但梳爾突然係中路搶左格拿比個波策動反擊。前場四個對四個。梳爾係中路持球,讚下簡尼既走位,佢係梳爾左邊直插入禁區,吸引左堅達收中,等格利殊可以輕鬆接應梳爾既傳球。堅達嘗試轉身走去遮格利殊既傳中線路,但為時已晚。格利殊左腳一包個波,就已經將波送到簡尼頭頂,簡尼輕鬆一頂入網,宣佈德國死刑。

強強對碰鬥既係把握力
德國最後既換人只係盡最後努力,面對防守相當專注同集中既英格蘭,陣地戰要入波真係非常困難。最後,英格蘭以二比零擊敗德國晉級。其實雙方整場比賽都踢得保守,一場和局會比較合理。路維同修夫基既調動都係合理。英格蘭真係贏史達寧果下突破,而德國方面就缺少左呢類球員(辛尼係後備席)。夏維斯、梅拿、華拿都不是呢類球員。當大家都係用343陣式時,就好依賴個人技術突破,去破壞對方既防守陣型。最後,梅拿單刀射斜亦非常關鍵。呢下把握唔到﹐一來一回就輸到兩球。[足球]就係咁殘酷!身處下線既英格蘭贏左德國﹐睇牌面就好大機會可以殺入決賽。睇下今屆修夫基能否守]到個冠軍番黎

如果喜歡我們的文章,請即分享到︰

標籤: 英格蘭  德國  歐國盃  

留言


請按此登錄後留言。未成為會員? 立即註冊
    快捷鍵:←
    快捷鍵:→