今場隻鑊蘭sir食左九成(賽後長文分析-維拉對曼聯)

Hea談曼聯 於 16/01/2022 發表 收藏文章
曼聯一星期內兩戰維拉,上場足總盃險勝一球晉級,又睇下今場兩個領隊有冇新招式。

蘭歷克排出4-2-3-1。龍門迪基亞。泰利斯同達洛治復任正選二閘拍住華拉尼同連迪路夫為四人防線。馬迪、費特為雙防中。左右二翼係伊蘭加同格連活特。前線則係攻中般奴費南迪斯支援卡雲尼。

謝拉特排出4-3-2-1。龍門馬天尼斯。防線由新加盟既迪尼出任左閘,中堅由干沙拍明斯,右閘卡殊。三名中場由右至左係辛臣、雷斯、積及藍斯。布安迪亞同屈堅斯出任兩名攻擊中場支援前鋒丹尼京斯。

蘭sir再次公佈一套踢另一套,謝拉特以不變應萬變
上場蘭sir一開波既4-2-2-2陣式,兩名中場被維拉完美壓制,要去到後段改踢番3名中場先叫做頂得住,今場一開波就見到曼聯改用4-3-3陣式,費特推上一格踢右中場中,般奴費南迪斯踢左中場中,令中場人數對等,同時麥湯文尼停賽要出動馬迪,安排三中場令馬迪逗住踢可以節省佢既體力,亦彌補到佢速率慢覆蓋範圍不大既弱點;謝老四則沿用番上場既陣式同踢法,只係人腳上輪換一下,再加以利用左閘迪尼後上進攻力,主力進攻曼聯既右方。

上半場頭30分鐘曼聯表現有改善,尾15分鐘開始維拉主導球賽
蘭sir除左改陣式,係防守上都見到有改善。整隊會係高位遮線,絕不胡亂向對方防線進行單人逼搶。當前場高位被打穿,就整隊縮後係中場重整陣形防守,難得見到整條中場線一齊收縮,竟然會見到中路甚少空間俾到維拉中前場球員做波或轉身。多次成功攔截或逼對方要個人突破重圍,成功搶到控球權。進攻上使用泰利斯同達洛治亦見到二者提供到拉闊作用,尤以泰利斯為甚。多次邊路傳中俾卡雲尼搶點,亦令綠木有一下半黃金機會被馬天尼斯大字型撲出。整隊主要集中左路進攻,皆因般奴靠左,要靠佢用波組織及踢斜線長傳進攻弱邊空位。值得一讚既係新仔伊蘭加。係邊線一對一夠膽進行突破,亦唔會責住條邊黎踢,會嘗試走入中間拉走卡殊,令般奴有空位走邊路再加埋後上既泰利斯形成三打二。頭30分鐘防守上抵讚,中路夠密搶番個波,大大減低對方進攻力。進攻亦見到主打左路為主及盡量控球組織,雖然唔係創造到好多黃金機會,但場上形勢算圍住對方黎踢,起碼控球多番組織似番D樣,有側擊有人搶點,更係早段6分鐘已經憑馬天尼斯失誤屙蛋領先一球。頭30分鐘維拉完全捱打,但三十分鐘後,曼聯中場個速率稍為下降左少少,維拉就開始大舉反擊。布安迪亞尋找到曼聯中場與後防線與線之間既空位拎波再分俾兩側,迪尼同卡殊頻頻壓上傳中。除左有布安迪亞接應角球近距離攻門被聖基亞救出,又有屈堅斯反擊盪射,亦有雙閘齊飛令迪尼禁區內左面怒射被擋出。形勢一面到倒轉,呢15分鐘曼聯前場再次展現停唔到波既問題,解圍後既第一點亦被對方先一步拎到再進攻。中場失勢,前面冇停球點,只能靠零星反擊去埋門,後防備受壓力。幸好,丹尼京斯及屈堅斯今場表現跌watt下,令到曼聯拎住一球番更衣室。

謝老四變陣調動湊效,蘭sir想逼就出事
謝老四見到中場人數冇優勢,下半場決定變為4-3-1-2,將布安迪亞擺正係中路自由人,前面屈堅斯拍住丹尼京斯牽引一對中堅,兩側交晒俾二閘進攻;而蘭sir見上半場尾段球隊後場太受壓,決定叫般奴同費特見同邊對方中堅拎波就推上前去施壓,卡雲尼就移後去遮番雷斯條線。呢著就出晒事。面對一對雙箭頭,二邊閘位被逼要內收協防中路。布安迪亞企正攻中位就要馬迪去招呼,變成般奴同費特對住辛臣、雷斯同積及藍斯,本身已經唔夠人而費特更要推前去逼對方中堅。只要引左費特向前,積及藍斯就會更空更冇人看管,亦令馬迪要一個兼顧埋費特走左出去既空位就出晒事。另外,卡雲尼係一個勤力同防守意識好高既球員。佢一發現後面唔夠人就會自動波走埋落後面防守,前場變成冇前鋒可以牽引對方。此消彼長,就令到維拉大舉壓前。

㩒爆平安鐘,但竟然偷到雞入多球
上面分析左兩軍踢法就知道下半場一開波係點。維拉不停打穿中場就分俾兩側出波,又或者係邊路打小組配合,積及藍斯同布安迪亞係左路已經有一下小組配合,積及藍斯係禁區左側推大位射近柱被擋出。攻勢一浪接一浪,而費特向前逼亦令馬迪進退失據,佢填完費特個位,咁邊個又補番佢中間個位,般奴防守意識明顯弱,係中前場望到個波都還好,一打穿左佢,佢好多時都冇回追番或者冇留意同馬迪間既距離,令到禁區頂出現成個窿,費特當然番唔切所以禁區頂俾人輕鬆做波,而卡叔就愈跑愈後,多次跑到自己三閘線防守。還好個平安鐘㩒極都未爆,維拉就自爆。踢到67分鐘,辛臣後場被達洛治一逼之下回波力水唔夠,被費特執左個熱煎堆,係禁區頂傳俾般奴,佢一控一抽怒射破網,領先至二比零。

一換入極具質素既古仔就有效果
謝老四立刻用古天奴換入派膠既辛臣,加強創造力,陣式維持不變。踢到76分鐘再用卡尼卓古麥卡換入丹尼京斯,變番4-3-2-1推番古仔上一格。維拉踢到呢刻都冇放棄就有回報。明斯後場一個扭上黎再俾波古仔。佢係左面禁區頂k角位轉到身引下引下,等卡尼麥古卓卡係禁區轉到身先俾入去打個1-2。費特跑到番黎一篤,但個波篤左俾係中路既積及藍斯,佢近距離快射得手,追成一比二。由曼聯後防解圍,到明斯扭入去,曼聯條中場線既企位都出現極大問題,般奴一散出去太前,冇保護到馬迪左面既空位,費特又被明斯一扭就過,又要馬迪過去補位,一步錯就步步錯。

蘭sir呢隻鑊佢都食左九成
踢到82分鐘,蘭sir既部署再令曼聯輸多一球。維拉後場明斯拎波,費特照舊去逼。屈堅斯走去費特走左既空位,引左連迪路夫出去防守,接應明斯既直傳彈橫俾左面既布安迪亞。綠木又係掛住遮線,完全冇留意身後既布仔已經走甩左。布仔加埋迪尼二打一達洛治。積及藍斯即刻望住連迪路夫失左既位跑,接應布仔既直線壓入禁區左路地波傳中。華拉尼落地稍慢就俾古仔輕鬆射入追平。先係費特逼前失位,再黎冰人離開自己位置。如果冰人唔逼出去,呢球波或者都可以唔駛輸。因為屈堅斯都仲係三閘線,就算轉到身威脅都未有想像中大,但中堅一失位就要成隊人黎補位就死硬。

Sob式換人,咪一x樣.jpg又可以準備
維拉追和之後,冇放軟手腳並繼續施壓。古仔係86分鐘再出古一招,可惜被隊友阻一阻就射得麻麻。禁區頂仍然係冇人防守任射。到89分鐘,蘭sir換入連加特同雲迪碧克,換走般奴同綠木。呢個蘇B式調動都係嘗試保持球隊活力,希望有人跑多步頂到完場。最後場雞一響,打和,SUPER!

總結
蘭sir上半場踢出部署,但下半場既改變完全暴露左空位俾人進攻,而球員既跑動頻率明顯一過左三十分鐘就已經唔夠維拉黎。上下半場明顯見到球員係跟領隊指示黎踢,要不是人地送第二球俾你入到,呢場波已經輸埋,蘭sir呢隻鑊食左九成啦。見到謝老四又換人又轉陣,針對你個弱點黎攻,但蘭sir就冇做任何動作嘗試去補救中場,唔駛你換人,你叫番費特唔逼,保持番條中場線既完整性可能已經唔駛俾人攻得咁有威脅。和埋呢場,距離頭四分數已經有五分差距(少踢兩場),但場上既部署失敗令到隊員會否繼續支持會係一大疑問,而更衣室問題日益嚴重更有惡化跡象,短時間解決唔到既,呢季都可以講拜拜!

如果喜歡我們的文章,請即分享到︰

標籤: 曼聯  維拉  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→