一個入三球,最威水係你 (賽後分析-曼聯對熱刺)

Hea談曼聯 於 13/03/2022 發表 收藏文章
蘭sir排出4-2-3-1迎戰熱刺。龍門迪基亞。防線由左至右係泰利斯-麥佳亞-華拉尼-達洛治。一對防中係馬迪拍費特。左右翼係辛祖同華舒福。般奴少見連後備都冇,攻擊中場普巴支援C朗拿度攻堅。

干地排出5-4-1。龍門羅列斯。防線左至右係列古朗-賓戴維斯-迪亞-羅美路-杜靴迪。中場線由左至右係古路錫斯基-賓坦古亞-靴爾保-孫興慜。哈利簡尼係前線爭取入球。

蘭歷克防守有部署
干地係陣地戰中會將孫仔同古路錫斯基內收,連同哈利簡尼集中中路,邊路俾晒兩隻翼衛進攻。蘭sir今場有鋒對性部署,當熱刺後場控球,整隊都會嘗試係高位遮線,不作胡亂逼搶,推費特上前同普巴形成兩個8號位球員去防守對方一對防中。C朗係前面少量移動下遮線。企位上一對翼鋒就面對一對左右中堅。當個波係熱刺左路時,重點:馬迪會離開中路位置,選擇盡量緊貼孫仔,唔俾佢輕鬆拎波轉身;左面既古路錫斯基則交由麥佳亞防守。當個波由左轉右,正常馬迪應該要由右路移去左路,因得佢一個單防中,但蘭sir決定安排佢唔好離開孫仔,慎防孫仔接應對角斜線攻擊華拉尼同達洛治既身後空間。呢著相當成功,就算你照放長傳,我都有三名球員係你附近,令呢招既威脅減到最低。當曼聯縮到中場企位防守時,費特會移後同馬迪變番平排中場去守番兩面half-space既位置。中場中路其實空位甚多,但干地踢5-4-1下,缺少左一名攻擊中場係呢個位置到駁腳或者拎波做致命傳送,只得簡尼墮後,但中間又變左冇中鋒。只要曼聯一對中堅有溝通一個逼住唔俾佢轉身,已經可以將呢個中路弱點彌補到。放走左盧斯素就有呢個明顯問題。進攻上沿用番對屈福特既模式,當兩翼拉邊時,推前費特同普巴踢兩個攻擊中場攻擊half-space。當兩閘推前,兩翼內切時,普巴同費特就會稍稍逗後係中場做波。前場中路總會係三名進攻球員,令C朗唔需要被3名中堅圍困。缺少般奴費南迪斯,唔知係咪蘭sir要求,進攻速度上明顯有所放緩,攻擊重心落係辛祖,靠佢係邊路突破又或者走翼衛身後進攻。普巴雖然冇助攻,但佢係中路既串連控制節奏都有一定既幫助,亦少左好多冒險要搏既斜傳同直線。兩閘則甚少壓得太上,盡量保留4-5人係中場,防止熱刺既反擊。

C朗靚射建功都要多得戰術運用
一開波,兩隊個節奏都唔係相當快,大家都係摸索階段。踢到12分鐘,蘭sir進攻模式奏效。華拉尼引球出擊至對方三閘線。福仔拉邊,達洛治插入half-space,令熱刺既防守陣式出現問題。孫仔企位出現問題,佢縮得太後去守達洛治,令到靴爾保要離開崗位崗去遮華拉尼。費特、C朗、普巴一齊係中路。費特現身吸引左賓坦古亞防守,好靚既腳背一撥就俾左中路既C朗。迪亞應該要出去遮線,但因費特俾完即走位,就形成中路三打三下,迪亞選擇維持陣式完整性就放棄出去遮C朗。C朗就係禁區外約廿四五碼到遠射建功。當然C朗呢個波射得靚,但進攻戰術體系亦功不可沒。如果唔係C朗而係其他人,迪亞或者可以企定定遮線,所以呢個波佢都有部分責任要孭。孫仔當然亦有責任啦。

手球就各有各睇法啦
入波後既曼聯就縮係中後場防守,都甚少壓上黎係高位逼,減少後場空間俾對方打反擊。進攻就拖得更慢,真係有機會先斬俾C朗或向前進攻。熱刺都冇同你特別急慢慢踢。熱刺控球時間長左,曼聯就想打反擊。熱刺要圍攻對手就缺乏創造力,創造到黃金機會既次數不多,要迪基亞撲真係冇。踢到33分鐘,古路錫斯基右路扭過辛祖傳中,禁區內既泰利斯犯手球,被罰12碼。都冇咩好嘈,隻手並冇垂低而拍到個波,明顯係一個12碼。簡尼一射入網,追成平手。咁早段迪亞都犯手球點解唔吹?個人觀點係迪亞隻手係垂低,而個身向左前係意外地被波打中隻手,所以球證同VAR都唔認為係手球;而泰利斯係面對面用手拍個波。

C朗入波要多謝辛祖
踢到37分鐘,熱刺迪亞見到馬迪放長傳俾入楔既辛祖,佢想裝越位就帶領防線向前移,但列古朗走慢半步。辛祖突破越位左腳傳中,俾門前既C朗輕鬆撞射再次領先。呢一下又係進攻體系既功勞。兩閘壓上,兩翼就插入翼衛同邊中堅既空間。馬迪既長傳亦非常準確。列古朗呢下就孭晒獲啦。落後既熱刺都唔見得係進攻上搵到方法去進攻曼聯,反而辛祖係完半場前仲有一腳快射,被羅列斯接實。半場,完。

福仔都唔係冇貢獻既
半場出番黎都唔見熱刺係個進攻上有特別調整,但早段古路錫斯基既傳中又差少少可以威脅到迪基亞,好彩達洛治快一步頭鎚解圍。熱刺點解突然有呢下機會,就係源於費特既魯莽衝前導致失位俾人打反擊。踢到68分鐘,蘭sir首先換人,用伊蘭加入替福仔。今場福仔表現沉寂,係進攻上冇太大既幫忙,但今場佢都多次墮後到較深位置防守,甚少見到華拉尼要離開崗位去補右閘位,亦算有貢獻。


麥隊長都唔想擺老烏既
踢到72分鐘,簡尼背門而立,控球避開馬迪既攔截,羅美路衝前交橫俾孫仔。孫仔交俾沉底既列古朗左腳急勁傳中。麥佳亞擺老烏,飛剷踢左個波入網,被熱刺追成二比二。輸呢個波其實係防守體系問題,兩名防守中場要拉闊去守古路錫斯基同孫仔,形成兩個中間既距離唔夠緊密。當羅美路突然係呢個空間出現,馬迪又俾人過左,費特就焗住要離開孫仔去補呢個窿。孫仔再同列古朗二打一達洛治。華拉尼又被簡尼拉左出禁區,麥隊長又要一個人包兩個位。到費特番到去逼孫仔,列古朗就可以睇到定黎出波。你話羅美路企左越位位置唔剷咪得,但果刻根本唔會知入楔果個有冇越位啦,剷到一定剷。成場波既表現黎計,麥隊長同華拉尼其實冇乜問題,麥隊長一個老烏又俾人笑了,真慘!

蘭sir換人盡地一煲
被追成平手後,曼聯又要嘗試壓上黎攻。踢到78分鐘,干地用摩拉入替古路錫斯基,加強前場既反擊速度。蘭sir則係80分鐘用卡雲尼入替馬迪,陣式改為4-4-2,普巴移後一格踢防中。踢到82分鐘,C朗再做救世主,接應泰利斯右路角球頂入,替球隊再次領先。休息左兩星期既C朗,明顯係個速率上體能上去到後段都仲有貨。一週三賽對佢黎講個負擔好大,重要既賽事咪正選囉,下場對馬體會咪正選,周末既聯賽就要留留力,後備出黎踢30分鐘,保留佢既體力先係皇道。一入完波,蘭sir即刻用連迪路夫換走C朗拿度,陣式轉成5-4-1,只留卡叔係前面打反擊。干地都換入哈利榮斯同比亞芬入黎搏鎚,可惜最後都無功而還,曼聯險勝三比二。

總結
干地需要諗一個有效既進攻模式去破密集,曼聯既防守緊密性已經唔算高,但熱刺係全無辦法去創造黃金機會。暑假引援上必須要從攻擊中場既位置入手,又或者係中場中引入一個有創造力既球員,擺係靴爾保或賓坦古亞隔離。而曼聯今場收起般奴,係進攻上冇咁急,呢個行軍節奏或者會較適合C朗拿度。卡雲尼復出,絕對係一個好消息,可以改用隻箭頭做plan b。曼聯贏波後重上第四位,餘下既賽事絕對不容有失,周中先應付左馬體會既歐聯次回合賽事再講。

======================================
有興趣睇分析片既朋友都可以follow 以下 Instagram
https://www.instagram.com/hea.talk.manu/

如果喜歡我們的文章,請即分享到︰

標籤: 熱刺  曼聯  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→