曼聯來季可能會離隊既球員——中場篇 精選 推薦

上一篇講完後防篇，唔知大家有冇錯過呢？錯過咗可以Click入嚟，睇番後防篇。睇完後防都覺得要清既人有好多，唔知中場又會唔會係咁呢？其實中場有好多球員都係非常唔肯定，有啲年紀有番咁上下大，有啲外借咗出去，番到嚟又唔知佢地既定位喺邊，相比起後防，中場就更加多有潛在離隊既可能性。


第一個要講既就係喺英超煞科取得入球既馬達。其實想當年既西班牙幫，來年度可能已經一個都留唔住了，當年靴里拉、迪基亞同馬達，三個西班牙幫撐起整隊曼聯，三個Friend過打Band，但隨著曼聯對靴里拉既不在乎，令到靴里拉轉投巴黎聖日耳門。而迪基亞以及馬達都相繼漸趨年長，雖然喺門將既角度嚟講，迪基亞又唔算係十分老，對比喺保方同陸浩明，佢都只不過係後生仔。但係現齡30既迪基亞，相信喺曼聯既日子都唔遠。而佢個好朋友，馬達既未來就更加係一個好大既問號，到底佢係希望繼續留喺曼聯，定係另謀出路呢？同佢差唔多年紀、差唔多踢法既大衛施華都重返西班牙，其實仲有啲貨仔交既馬達，為前途著想既話，西班牙一定係一個好地方。唔止係因為佢既年紀已經唔適合喺英超到踢，更因為曼聯根本就冇空位比佢再發揮。所謂長江後浪推前浪，一代新人勝舊人，馬達離隊既機會相信都會十分大。希望佢既未來，一片光明，亦都好多謝西班牙幫既三位，包括馬達叔叔喺曼聯呢段低潮期，對曼聯不離不棄。

下一位就係喺倫敦踢到風生水起既連美斯。連加特今季季中被外借至西咸，令到西咸喺季中之後，成績依然十分之好，最後更成功地為球隊爭取到歐洲賽資格，擊敗咗兩支北倫敦「強隊」，成為倫敦二哥。連加特喺韋斯咸既表現，簡直就係判若兩人，由大部分曼球睇死佢，到依加終於有番啲球迷欣賞。好記得當初小編打連加特外借既文章，比大家睇死，話佢一定唔會好，好行唔送呢啲字眼，唔知依加球迷又點睇呢？Click入嚟文章重溫。有啲球迷就話連加特啱韋斯咸既踢法，唔啱曼聯，但其實韋斯咸既防守反擊，同曼聯咪又係有啲一樣。當曼聯面對強隊既時候，曼聯都係選擇防守反擊，記得曼聯仲係喺摩連奴帶領既時候，每當對英超Big6，佢都係選擇防守反擊，當時既連加特表現都係十分好。仲記得對阿仙奴既時候，佢同馬迪亞夾手夾腳搞掂咗對手。其實連加特又係咪真係對曼聯作用唔大呢？小編就真係有啲保留，但係就算曼聯話想留番連加特，都要連加特肯留低喺曼聯先掂。話曬依加曼聯中前場實在係太大人，都未計一啲外借以及喺青年軍打滾緊既球員，包括今季收購既柏利迪斯，希望大家唔好忘記佢。喺咁多人競爭既大前提底下，佢會唔會見喺西咸踢得咁好，順便走人呢？相信好快就會有答案，唔知球迷們又想唔想佢重返曼聯，定係仍然覺得佢只係有一個笑柄呢？


連加特之後就要講一個相信大家對佢印象都唔淺，又冇曬期望既球員。安迪阿斯皮里拉，今季被外借去到意甲既拉素效力，身穿7號波衫既皮里拉，喺拉素都仲係搵唔到穩定既出場機會。雖然喺意甲話就話上陣咗26場，但係實際上陣時間就只有500幾分鐘，四捨五入咁計，其實都只係得10場踢足90分鐘，出場時間雖然未到短，都唔算特別長。證明拉素都唔係好重用佢，加上佢既表現絕對係麻麻，意甲嗰26場波入面，只有1個入波兩個助攻，相信重返曼聯既機會都十分大。但不論係連加特定係其他中場，都面對一個好大既問題，就係競爭對手好多，技術以及球商都比下去既皮里拉，相信留喺曼聯既機會就更加細。幾年前小編對佢都仲有一絲絲既希望，始終係一個巴西既翼鋒，腳法唔多唔少都應該有啲，但係喺曼聯幾季都冇乜表現，即使有一段時間踢防中位置，表現都未如理想，睇嚟曼聯都係同佢分手，會係雙方最好既結果，話曬都算係因了解而分開嘛...相信呢位曼聯既青訓產品，都要同曼聯論再見。


另一個有機會既球員，就係蘇斯克查收購既丹尼爾占士。其實占士真係都算係一個可造之材，因為佢既速度確實係唔容易招架。雖然得一招爆落底，但係當呢一招練到爐火純青既境界，就算對手明知你會咁做，最後都係冇辦法去破壞，就好似洛賓嗰招咁。但到底佢係踢左邊好啲定係右邊好啲呢？佢自己以及蘇斯克查就話佢係左邊好啲，因為佢都鐘意扣大位起腳，但係鐘意同做到，又真係兩回事喎。講真佢扣大位起腳既技巧，連前隊長楊格既水平都未到，想達到洛賓既境界就更加冇乜可能，倒不如踏踏實實好似前隊長華蘭西亞咁，爆落底出個靚波好過。因為其實占士既傳中，其實真係唔差，而呢一點喺上季已經係咁。上一季已經有幾球傳中，落點準到不得了，最後成功助攻到比隊友，而今季佢亦都喺英超煞科戰入面，成功以傳中，助攻比年青球員艾蘭加頭槌頂入。雖然球波喺左路吊入禁區，但小編相信右路就會更加好。不過球會近兩季一直傳會收購新右翼，加上有阿密迪阿奴、美臣格連活等等既球員喺陣中，佢要攞到位置又真係唔容易。至於左翼就更加唔洗爭，如果球隊真係喺今夏收購右翼，睇嚟占士喺紅魔既日子都見到終點了...


之後要講既就係通天老倌馬迪，雖然萬金油程度就唔及利物浦幾位中場咁勁，但作為防中既馬迪，都曾經為曼聯出任中堅一職，都算係揹得起呢個稱號。馬迪唔覺唔得現齡已經30有2，呢位摩連奴既遺物兼契仔，對曼聯嚟講，作用當然仍有係有。但係曼聯會唔會仲留佢呢？而佢又會唔會走呢？相信呢兩點係關鍵，因為馬迪明顯地對於曼聯嚟講，已經再冇咁重要。加上馬迪先32歲，如果佢想踢落去，絕對仲有機會，但英超或者係曼聯機會就應該唔大。所以佢既去或留，相信真係要睇落曼聯對佢既挽留程度以及佢對前途既睇法，摩連奴就去咗羅馬喇，唔知又會唔會低價地再次帶契仔轉會呢？

下一個要講既就係最失望既一位，雲迪比。見到佢個名既讀者，相信都會忍唔任講番句「下，唔x係呀話！？」，加盟咗一季炸喎，咁快就走！？其實都唔係冇原因㗎，年齡24歲既雲迪比今季加盟曼聯，為曼聯出戰36場，包括英超、歐霸、歐聯、足總盃、聯賽盃，比賽時間足足有1456分鐘，多過啱啱講喺拉素既皮里拉多多聲，可惜入波同助攻既次數就比皮里拉仲要低。作為一位Box To Box既球員，錄得呢個紀錄，絕對唔係一個好既數據。加上佢之前喺阿積士既表現，同喺曼聯相比，明顯地係有出入。小編唔係以佢喺荷甲既表現喎，係講緊佢喺阿積士出戰歐聯賽事喎。加上佢依加喺國家隊既位置都危危乎，而年紀都已經去到當打時期，如果唔搵番足夠既出場機會以及狀態，來屆世界盃或者佢都冇機會踢。雖然，有荷蘭叻加持既荷蘭，近代都唔係十分好，但係相信每一位球員，都希望有機會出戰世界盃，為國家出一分力。如果佢仲唔趁依加搵番多啲出場機會，佢既球員生涯絕對係令人擔心。 其實曼聯絕對係需要多一個Box To Box既球員，而雲迪比係一個幾合適既球員，但係蘇斯克查同佢合作咗一年，好似乜都冇變過咁，真係好大問題。其實近年嚟，好多前曼聯明星球員，喺曼聯都會有踢唔啱既情況，一開始大家滿心歡喜以為佢地可以為曼聯帶到去另一個境界，可惜最後都係踢咗一季就離隊收場。呢個到底係曼聯既問題定係球員自身既問題呢？講雲迪比既問題，小編都講過好多次，其實編輯都講到口臭，相信就連領隊以及雲迪比都知問題出現喺邊，所以喺今夏一定要搵個方法。一係要忍痛離隊，一係要同自己既前途賭一舖。


最後一位球員或者大家又有少少估唔到，就係占士加拿。加拿今季既際遇就唔係十分之好，佢先後外借到屈福特以及諾定咸森林，兩支英冠既球隊。一季借兩支球隊，相信大家都知道咩事喇。佢喺屈福特既時候，上陣既表現以及次數因為唔係太理想，所以喺季中就中斷外借，然後再去諾定咸森林。佢去到諾定咸森林之後，表現確實係好咗，都時不時取得入球。相信大家對佢喺英冠既表現唔係十分清楚，或者小編用少少數據去講解一下。首先係佢喺屈福特既時候，佢踢咗有20場波，當中有差唔多10場係踢足90分鐘咁制，就只係得一個助攻咁大把。但去到諾定咸森林之後，佢踢咗20幾場波，就已經有4個入波，表現絕對係比喺屈福特好。但呢位曾榮獲提名金童獎既球員，要喺未來既日子爭取到正選或者出場機會，就真係唔容易。小編就認為能夠榮獲得金童獎提名既，能力以及對自己既期望都唔低，如其喺曼聯不斷等，等到2046，不如早少少出嚟闖一闖，攞多啲出場機會仲好。所以小編認為加拿都絕對有機會離隊。
其實不論係曼聯既中場定係前場，競爭情況都非常之大，所以好多球員都好大機會會喺未來日子離隊，至餘真係有幾多個，就真係要基於佢地球員自身既考量嚟決定。因為有啲年紀都唔細，絕對唔可以再喺曼聯到浪費時間。唔知今集講既球員，又有邊位大家想留低，邊位覺得要走呢？差啲唔記得講，唔知普巴又會唔會愛回家呢，呢一個可能性都唔細㗎，不過小編就諗住遲啲用一篇文去講呢個話題。希望行家唔會搶先一步啦。