連美斯借去西咸暗藏玄機？ 精選

日前連加特正式以借用身份，借去現時英超倫敦排名最高既球隊韋斯咸，呢個消息一出，網上議論紛紛。有啲朋友就話曼聯今次有救喇、有啲朋友就話睇嚟莫耶斯對曼聯既愛係真㗎；而有啲朋友就話要借都唔係借走佢，有位人兄仲衰過連加特，點解唔係借走佢。其後就有網民問到底係邊個衰過連加特，之後嗰位朋友就話連加特起碼識跑下，馬斯亞條X樣連跑都唔跑，仲可以場場正選。
到底連加特去或留，對於曼聯嚟講係好定壞，小編真係唔敢講，始終曼聯板凳深度其實都唔算係十分強，比連加特打下啲盃隻，比啲常規正選球員休息下，都可能係一件好事嚟既，雖然蘇斯克查幾乎咩盃賽都比啲常規正選打。況且曼聯喺前場最缺乏既就係無球跑動，當球隊面對密集防守，打極都打唔到入去既話，比佢跑下做多啲拉扯，其實都有得諗下。話曬佢都算係個大賽球員或者可以話係曼聯幸運童子，有時都有啲神來之筆，情況就好似利物浦既奧利基咁。

到底連加特去到韋斯咸對曼聯好定壞，相信時間會證明一切，所以小編就唔再喺呢個位置到討論喇。相反，小編對呢一次既租借就有所疑惑，到底呢一次租借係咪代表連加特喺曼聯既日子已經結束呢？
其實喺蘇斯克查麾下既球員，好多租咗出去都番唔到嚟曼聯。又或者係番到嚟不過都係冇位置比到佢。先由上一個球季講起，曼聯就先後借走咗洛荷、波夫域積遜、阿歷士山齊士、祖爾彭利拿以及史摩寧。咁以上幾位球員既下場係點呢，小編又逐一講下。


首先講既係仲屬於曼聯球員既洛荷，洛荷今季從未試過為一隊上陣，一直受傷既佢喺今季不斷傳出會離隊既消息，現時洛荷就繼續屬於外借既一員，至今仍然養傷緊既佢，應該喺今夏就會正式離隊，洛荷雖然今季仍然未被蘇斯克查正式放棄，但無論係曼聯球迷定係領隊，相信都當洛荷已離隊咁看代，始終佢一直都處於受傷既狀態，而年齡都漸大，相信喺曼聯既日子都愈嚟愈短，值得一提既係佢既合約都將於今夏完結，球會遲遲都唔為佢續約相信已經係離隊既先兆。最近更加消息指洛荷會喺冬季轉會窗關閉前轉會去小保加，睇嚟佢既曼聯生涯喺2021年將會完結。


接住就係波夫域積遜，呢位曾經喺雲高爾既帶領下被譽為曼聯左閘既接班人，但今時今日已經喺英格蘭第四級別既球隊上陣，呢位球員喺蘇斯克查接任曼聯後，一直被外借出去，今季終於正式離隊，重新開展佢既新一頁。現齡23歲既佢，唔知喺不久既將來，會唔會再喺頂級聯賽入面見到佢呢？大家千祈唔好覺得冇可能呀，利物浦既安德魯羅拔臣都係喺英格蘭既第四級別聯賽走到上嚟英超㗎。雖然波夫域積遜既能力同羅拔臣都差得幾遠，要佢再一次重返英超頂級球隊絕對唔容易，但係效力中下游球隊既機會，絕對唔係冇可能。


近年被球迷嘲笑為多既阿歷士山齊士亦係上一季被外借既一員，上一季被外借國際米蘭之後，表現唔係十分突出，上陣22場攻入4個入球以及9個助攻，但已經足以吸引國際米蘭，今季正式以自由身加盟國際米蘭。蘇斯克查上季曾經講過有機會比山齊士再一次為曼聯上陣，可惜最後都係離隊收場。今季雖然上陣都唔係十分之多，但相信大家對佢既印象都幾深刻，因為國際米蘭喺歐聯賽場上，爆冷出局，而喺最重要嗰場比賽入面，山齊士有一個非常黃金既機會，接應角球頭槌攻門，可惜前曼聯球員盧卡古變咗中堅賓，令到國際米蘭出局收場。


至於祖爾彭利拿呢位曾被摩連奴稱為曼聯既明日之星喺蘇斯克查既麾下，都係不斷外借為主。上季外借完結之後，今季繼續外借之旅，加上李爾格蘭以及甸軒達臣既在陣，相信祖爾彭利拿喺未來既日子都係繼續外借為主甚至比較大機會離隊。再者，無緣無故地被雪藏既羅美路今時今日都仍然係曼聯一員，雖然羅美路喺曼聯既日子都應該所剩無幾，但係至今仍然未離隊既佢，應該都會比祖爾彭利拿更大機會為曼聯一隊上陣，因此彭利拿既將來，相信都幾難行。


另一位就係現時羅馬球員史摩寧，史摩寧上一季已經間接地被蘇斯克查放棄，喺中堅非常缺人既時候，都選擇將佢外借到羅馬。而喺佢外借到羅馬既嗰一季，表現雖然幾岀色，但都打動唔到蘇斯克查，最後喺今季夏天正式轉會到羅馬，結束多年喺紅魔既生涯。嚟緊歐霸盃既賽場上或者又有機會再次遇到史摩寧，唔知各位曼迷經過今季防守又有冇掛住細緊呢？不過唔講大家可能唔知，史摩寧最近喺羅馬既比賽入面，又派膠。90分鐘既時候解圍失誤，被逼和3:3，幸好羅馬喺92分鐘再一次入波，以4:3驚險獲勝。

上季外借既五位球員，下場或者佢地喺曼聯既將來都好似唔係幾好，咁今季外借既球員喺未來既日子又係如何呢？上季去到今季都仲係外借緊既祖爾彭利拿因為喺上面已經講左，所以就唔再提喇，咁其餘幾位球員，分別係鍾泰希、達洛治、加拿以及安迪阿斯皮利拉，佢地情況又如何呢？




先講一講鍾泰希，鍾泰希喺外借之前，曼聯就已經同佢續咗一份新合約，看似鍾泰希喺曼聯既前景好明朗。但事實上又係唔係呢？鍾泰希最擅長就係打翼鋒位置，由其是左翼。但左翼其實陣中已經有兩個蘇斯克查既契仔同佢爭位置，加上曼聯會今夏轉會窗關閉前，突然既恐慌性收購，連續收購咗柏利迪斯以及迪亞奴，兩位都係打翼鋒。加上陣中仲有收購不夠兩年既占士，愈數就愈多人，就連文中主要人物連加特都可以打翼，假設下季連加特番埋嚟，鍾泰希喺曼聯既位置會係幾高，相信大家都心中有數。




另一個外借球員達洛治，理論上前景就比鍾泰希好得多。達洛治主要飾演右閘位置，亦都有曾經出任過左閘位，前曼聯領隊摩連奴喺收購佢既時候，都曾經講過佢會係曼聯既將來，但好可惜無論係摩連奴定蘇斯克查既帶領下，達洛治一直既上陣機會都唔多，今季曼聯其實喺右閘位位置板凳深度都唔係好高，再者雲比沙卡屬於防守型既右閘，而達洛治屬於進攻型右閘，理論上達洛治應該會留喺曼聯至啱。但蘇斯克查反而就決定將佢外借到AC米蘭。佢喺AC米蘭雖然就唔算係常規正選，但佢都時不時為AC米蘭正選上陣，而表現都係好多過差。更有傳AC米蘭有興趣將達洛治買斷，根據以上原因都選擇外借既蘇帥，相信收到米蘭想買斷既消息，都應該係放手居多。




輪到上季曾入選金童獎100強既球員加拿，加拿喺上季季中開始，已經開始跟一隊操練，今季正正式式成為一隊成員，可惜都係需要面臨外借。今季加拿就外借到啱啱降咗班既屈福特，可惜上陣機會不足。近日曼聯已決定提早中止加拿外借屈福特一事。但有傳加拿會再一次外借去另一隊球隊，有傳係昆士柏流浪。呢位被外界期待為新卡域克睇嚟喺曼聯既前景都唔太明朗，始終現時中場既人選實在太多。麥湯文尼、費特、馬迪、般奴、普巴、雲迪比等等，要喺云云球星下突圍而出相信絕對唔容易，佢喺曼聯既將來，都非常令人擔心。




最後一位係曾被球迷安迪阿斯皮利拉，佢同加拿、鍾泰希有著異曲同工之妙，但有一樣野還要同加拿、鍾泰希比下去。到底小編講緊咩呢？其實皮里拉喺曼聯既位置一直都有個問號，到底佢喺屬於左右翼定係攻中、中場中既位置呢？論幾個位置，人選都非常充裕，根本好難再預留機會比佢，情況就好似鍾泰希同加拿咁。但皮里拉仲要比加拿、鍾泰希年紀大好多。現齡25歲既佢，今季外借到拉素出場次數都算多，不過出場時間就非常少。意甲上陣12次，但只有263分鐘，亦只錄得1個入波0助攻既數據。下一季重返曼聯要爭贏翼位或中場既對手，機會可以話係少之又少。雖然佢份合約去到2023年先到期，但喺曼聯既日子仲有幾多，真係唔敢講。




小編講咗以上咁多位球員，唔係單單想講佢地既將來，反而係想用佢地作為例子。喺蘇斯克查麾下被外借既所有球員，當中差唔多每一位都係喺曼聯前景好差。小編都明白到，如果真係有競爭力既話，絕對唔會外借出去。但現今曼聯比小編既感覺係，借咗出去就好似返唔到轉頭咁。以前既曼聯，都話外借之後，都會重返曼聯，為曼聯踢番一兩季，但蘇斯克查麾下，似乎一個都冇。如果係咁，又係咪即係代表連加特喺曼聯既日子，正式劃上句號呢？雖然喺呢次交易當中，不設買斷條款，但又唔代表唔會放走佢姐。而蘇斯克查喺呢次連加特既交易當中，就講過希望佢享受足球，然後重返曼聯。但喺六個月前，蘇斯克查就曾經咁講：「山齊士會喺今夏重返球會，然後證明比大家睇，你地係錯既。」。睇完蘇斯克查咁講，唔知各位曼迷個心又有冇定咗落嚟呢？不過無論如何，都希望連加特喺韋斯咸有一個好好既發展。