球迷們，最錯的真是普巴？ 精選 推薦

歐戰過後既曼聯喺星期日晚主場迎戰阿仙奴，繼續曼聯既魔鬼賽程。賽前曼聯都有幾個壞消息，分別係迪利斯仍然因為感染武漢肺炎而未能為曼聯上陣，另外亦有曼聯已退役球員(Nobby Stiles)去世，令球迷更震撼既係曼聯名宿波比查爾頓亦患上失智症，希望波比Sir既退化可以慢啲，仍然身體健康！
今場曼聯最終已0:1主場不敵阿仙奴，除咗繼續跨季主場不勝之外，亦都破咗封塵70年既尷尬紀錄。儘管曼聯比對手有更多既休息時間，儘管曼聯喺歐聯賽場上，兩戰全勝之餘、大勝對手，番到嚟英超既賽場，曼聯始終都係繼續失魂。到底今場發生啲咩事呢？即刻同大家分享。


曼聯喺今場就排出最近常用既陣式，用一個4-3-1-2或4-4-2菱形既陣式出戰。後防球員基本上不變，而中場就繼續沿用兩個非常有活力既球員，麥湯文尼以及費特，而普巴繼上兩場後備之後，今場再一次重拾正選機會。而前場就採用傷癒復出既格連活特搭華舒福。

華舒福 格連活特
般奴費南迪斯
普巴 麥湯文尼 費特
梳爾 麥佳亞 連迪洛夫 雲比沙卡
迪基亞


今場比賽無論係戰術或者用人，都同週中對RB萊比錫大同小異。上半場曼聯都係比較偏向於防守，每當球隊有機會控球既時候，曼聯都希望造波上去，可惜經常有傳送失誤而令進攻缺乏。雖然對手阿仙奴喺傳送方面都唔係十分好，亦常有失誤。但對比曼聯，阿仙奴既失誤明顯地少過曼聯，令阿仙奴順理成章地喺攻勢方面較為入肉。上半場曼聯既後半場區總共有好幾次險境，令阿仙奴幾位球員，分別奧巴比楊、薩卡、韋利安以及拿卡錫迪都有黃金機會，只可惜佢地都未能夠把握，令曼聯喺上半場能夠力保不失。喺防守方面曼聯經常有漏洞，不斷險象環生，以為進攻會好啲，點之整個上半場就只有一次既埋門機會。防不穩，攻不銳，完完全全可以形容整個上半場。

下半場曼聯開波，立即採取主動，喺比賽時間55分鐘之前，明顯見到球隊喺進攻方面落力咗好多，而無論係攻勢或者係精神面貌方面，明顯地都比上半場好咗好多。然而，當阿仙奴喺下半場重新企穩陣腳既時候，曼聯嗰團火，又好似熄咗咁。比賽時間去到61分鐘，蘇斯克查首先選擇換人，繼續好似上場咁，換人明顯快咗，一改以往換人慢既作風。將原本有黃牌喺身既費特收起，換入馬迪。換咗人之後既曼聯，唔單止喺進攻方面冇進步，相反對手仲可以好似上半場咁，慢慢控制番比賽節奏。68分鐘，阿仙奴一輪傳控之下，皮球去到韋利安腳下，然後放入禁區交比對手比爾連，好日都唔積極回防既普巴喺回防時不慎踢跌對手比爾連，令曼聯被罰十二碼。最終十二碼由奧巴美楊操刀，輕鬆射入，0:1。及後曼聯先後換入卡雲尼以及雲達比，代替般奴以及格連活特。可惜進攻方面改善仍然不大，雖然改善好似冇乜。但曼聯曾經都喺比賽尾段有一次中柱既攻勢。雲達比接應隊友傳送，隨即傳咗球急勁既波入對手禁區，阿仙奴守衛首先省到，然後皮球再彈落對手門將塊面，再彈落門柱，然後彈出。比賽時間去到最後十分鐘，明顯地見到曼聯係全力去反撲，可惜有心無力，最後以0:1不敵對手，全失三分。


整場比賽，幾乎每位曼聯球員都踢得非常之差，而當中最差既一定有普巴份。普巴喺整場比賽明顯地同以往一樣，繼續非常慢。另外經常有傳送失誤既情況，上半場普巴係曼聯傳送失誤最多既四位之一。而下半場普巴亦喺禁區內犯下天條，令球隊失球。失球之後，佢既表現繼續強差人意，幾次隊友走到靚位都慢咗先比，或者控甩腳。而不論係跑動量定係防守工作亦都做得唔夠多，令曼聯球迷對普巴整場比賽都表示非常不滿。
普巴既問題，你知、我知，單眼佬都知，但最大問題既真係普巴，定係另有其人？今場比賽，曼聯繼續沿用蘇斯克查最新安排既新戰術、新陣式。同上一場對RB萊比錫既打法差唔多，只係幾位球員唔同，但不論係球員既角色或者係戰術，分別都唔大。先講一講般奴既位置，同上一場雲迪比既位置一模一樣，而效果亦都冇任何分別，佢地兩個喺呢兩場就好似隱咗形咁。咁到底點解會咁呢？其實蘇斯克查喺呢個戰術入面，將般奴(攻中位置)推到好前，每當球隊處於防守時，般奴企位就好似一名中鋒咁，當球隊處於進攻時，般奴依然會企喺禁區頂等搵食，蘇帥安排呢個戰術、打法，完完全全地將般奴或上場既雲迪比，最強既一面隱藏。佢地兩個最強既就係跑動量以及頂級既傳送，而要佢地兩個將最好嗰面發揮到出嚟，最需要既就係絕對唔可以限制佢地既走位。喺呢兩場波，蘇斯克查表面上好似打緊4-3-1-2或者係4-4-2菱形陣，但實際上係打緊一個無鋒陣，攻中嗰位球員會打一個假9號既位置，當球隊控球時，兩個中鋒就會拉開變翼鋒，左邊係華舒福，右邊則係格連活特。蘇斯克查希望中鋒有球員喺到，令到球隊可以喺中前場多一個選擇。但問題係當般奴、雲達比被限制走位之下，球隊整個進攻就變得唔立體，因為前場其他球員跑動少，最後就重返以往既曼聯，少跑動、冇球員現身。
亦都因為以上嗰一點，令到曼聯由中後場組織上去既難道高咗好多，好多時都需要用一啲比較長少少既傳送放上前場，但咁就會令到對手好容易攔截到球隊既長傳。今場波曼聯中場好多球員都喺中場斷纜，不論費特、普巴定係其他球員。當然，佢地傳失係有錯，但係你要球員每球波都要長傳，都好難唔失姐。加上好多時準備控波嗰位球員都係會等波到，有時候更係啲高空波，試問咁既情況下，般奴、華舒福同格連活特點同對手三個中堅鬥呢？

另外，新一季至今曼聯比賽超過十場，但明顯地同上季季尾差好遠，講緊除咗係表現之外，好多戰術都打唔番。好似曼聯既高壓逼搶問題，曼聯喺上季季尾呢一點做得非常之好，幾時壓迫幾時搶，喺上季係非常清晰，亦都成功做到好多反搶。但今季直至對陣阿仙奴呢場，小編都完全睇唔到有好成功既逼搶。今場波見到既就十足十以前摩連奴帶領既曼聯。有球員肯去跑去搶，但永遠就只有少貓三隻，做唔到齊上齊落。


而今場波焦點除咗係普巴問題之外，換人亦都大受批評。不論係球迷定係NowTV旁述都對蘇斯克查既換人有所質疑。曼聯喺60分鐘將有黃牌既費特換出，換入馬迪。其實睇落去好似冇乜問題，但係作為主場，仲要有多一日休息，而喺下半場初段，60分鐘之前曼聯都比較上佔上風，攻勢多番好多。點解要換入馬迪咁保守呢？其實馬達、雲達比佢地都非常適合，點解要選擇搵番一個防守既球員落嚟呢？最後馬迪換入之後，曼聯既優勢開始少番，接著阿仙奴就企番穩陣腳。其實如果一開始，曼聯係有心換走費特，就拜托你下半場就立即換走啦。又要懶係用多陣先換，又要搞到隊波所有優勢冇曬。而費特今場波又唔係特別搶眼、踢得特別好，萬一再領多張黃，又點算呢？呢一個換人表面上係好合理，但諗清楚其實蘇斯克查好似仲未清楚換人為乜咁。
而另外兩個換人調動就喺失咗波之後，比賽時間74分鐘先作出既。當中就分別收起格連活特同般奴，換入卡雲尼同雲達比。先講講換走格連活特既問題，格連活特雖然今場發揮唔係十分好，但係比上不足比下絕對有餘。格連活特喺右邊仍然有一兩次有威脅既攻勢，相反華舒福真係冇乜。只係上半場，放咗一個靚直線比格連活特。咁點解要換格連活特唔係華舒福呢？再者，球隊當時係失緊一球，點解唔選擇打多一個前場球員呢？加上呢場波，呢個所謂既戰術根本乏術，完全係敗筆。若然係咁，點解唔選擇番蘇斯克查，甚至係球隊打得最好既4-2-3-1呢？

另外一個換人名額就將般奴收起，換入雲達比。首先大家都好唔明白到底普巴有啲咩係好過般奴，今場波無疑地般奴係打得差。但普巴真係唔會差得過般奴？加上般奴隱形既問題，完全係因為蘇斯克查自己既戰術造成，絕非般奴自身既問題。因為上一場對RB萊比錫，雲達比打呢個位置既時候，都係隱咗形。證明咗係位置以及角色問題，點解唔肯改番自己用開既陣式同打法呢？而換入雲達比之後，球隊喺戰術上都冇改善過，而踢法亦都不變。令到雲達比出到嚟，其實效果都係一般。而卡雲尼換咗入嚟就同之前格連活特、華舒福一樣，完全得唔到任何輸送。


曼聯名宿堅尼喺比賽完咗之後，講咗一句：「I DON'T see any leaders out there.」。冇錯，曼聯根本完全冇一個Leader喺到，不論係帶住隊長臂章既麥佳亞定係般奴都好，都完全見唔到有Leader既感覺。其實每一隊球隊入面，Leader都係非常之重要。用伊巴謙莫域做例子，以前伊巴謙莫域喺曼聯既時候，完完全全見到曼聯係兩隊波。但當佢離開咗之後，又好似回到熟悉既曼聯。依加伊巴謙莫域喺AC米蘭除咗表現好之餘，都Lead得到AC米蘭隊波，變相AC米蘭就愈踢愈好。而講番今時今日，小編完全唔覺得曼聯有一個球員可以Lead到隊波。其實Lead唔到唔緊要，好似今場阿仙奴咁，今場冇放格列沙加落嚟，少咗個Leader完全唔緊要。因為隊波仲有場邊阿迪達嗌住，但相反蘇斯克查繼續一貫作風，幾乎全場坐喺觀眾席上面。一個著住西裝，淋雨淋足全場，全程嗌住隊波。而呢一個著住羽絨既就坐喺觀眾席上面，直到比賽就完先落嚟嗌下。隊內冇Leader其實去到呢一刻，轉會窗關閉曬既時候，根本就唔會再解決到。唯一既方法就係用非球員去Lead住隊波，但每次鏡頭望上去，蘇斯克查都係望住個Mon黑曬口面。其實責任真係唔喺蘇斯克查身上？
總結整場比賽，曼聯就好似重返未有般奴既情況，冇跑動冇現身。加上蘇斯克查利用戰術去將自己球隊既球員隱形，以及運用換人實力將曼聯擊敗。球迷們或許會對目光放曬落輸十二碼，全場比賽漫不經心既普巴身上，但大家好似又遺忘咗令到般奴隱形、用人以及調兵遣將失敗既蘇斯克查喎。阿迪達今場波明顯喺戰術運用以及調兵遣將方面都高過蘇斯克查。只少阿迪達每一個換人舉動都係合理、清晰，而戰術以及打法就算係簡單都起碼做到出嚟，有幾下板斧睇。反觀蘇斯克查.....

曼聯今季喺英超至今，只係領先咗對手43分鐘係事實，英超六戰得七分排15名係事實。千祈唔好將某啲事情合理化，作為曼聯絕對唔可以接受踢六場得43分鐘領先對手，更加唔好講曼聯已經對咗好多強隊呢啲說話。踢成點，有冇說服力，作為球迷既你，應該最清楚。普巴有問題，有邊個唔知。但係最錯既真係佢？