麥湯文尼的前路到底怎麼走 精選 推薦

將近24歲既麥湯文尼原來唔經唔覺已經為一隊英超上陣第五個球季，最近朋友一言驚醒小編呢個夢中人，先發現原來佢唔再後生了。隨著雲達碧克既加盟，中場又多咗一個競爭對手，麥湯文尼既前路，到底如何是好？
麥湯文尼 (McTominay)
年齡：23歲 (1996年12月8號)
身高：190CM
國籍：蘇格蘭
慣用腳：右腳
位置：防中、中場中、中堅


大家冇睇錯，最近麥湯文尼都開始嘗試打中堅，早前喺蘇格蘭對以色列既比賽入面，麥湯文尼就飾演球隊既右中堅，雖然表現冇話非常搶眼，因為對手都唔係太強，佢可以表演既時間都唔多，但係佢踢完呢個位置之後，令小編印象深刻，原因係乜？賣個關子先，先同大家講講近年來既麥湯文尼，喺際遇以及表現等等。

麥湯文尼喺16/17球季開始為曼聯出戰英超比賽，至今已經有59場英超比賽既經驗，雖然唔係話好多，但佢既表現、投入程度等等，加上場內場外既行為，令到好多球迷都非常愛戴呢位球員，甚至封佢為真曼球員。場內既麥湯文尼投入程度十足，硬朗以及打不死精神，十足十以前堅尼、或著近期啲既朗尼。呢種球員時至今日已經買少見少，唔係講緊曼聯入面愈嚟愈少咁簡單，而係整個球壇都愈嚟愈少呢種球員。
以前好多球員真係同你衝、同你撞、同你拼命，當時好多球員都會覺得足球，除咗係一場比賽，仲係一場戰爭。當中除咗包含勝負，仲有好多元素喺入面，精神、榮辱、面子等等。相反，今時今日好多球員都只不過當比賽係一個表演、係工作既一部分。加上對球隊、國家既歸屬感不足，由其好多唔係屬於球隊國家既球員，就更加冇嗰份歸屬感。所以好多大戰既味道都大不如前，好似雙紅會、西班牙打吡等等。

但唔知麥湯文尼係咪因為青訓出嚟既關係，佢總係好似流住紅魔既血咁，以前一啲名宿既霸氣、精神，一直保留喺佢身上。喺佢身上，永遠搵唔到Hea踢、揸流攤既情況。除咗拼勁十足以外，佢喺場內既指揮都係令到好多球迷非常滿意。現時曼聯好多時缺乏就係一個領袖，近年來曼聯既領袖，走完一個又一個。難得曼聯依加仲有一個真曼球員，球迷們當然對佢寵愛有加。


場內既表現令球迷滿意之餘，場外既表現亦都令球迷們非常佩服以及敬重。熱愛健身既麥湯文尼雖然高挑身型比較瘦削小小，但身型其實一啲都唔差，經常喺社交平台分享自己訓練既成果。除咗喺身體素質方面著手，體能亦都唔少得。記得喺四月，就有一個5KM既挑戰比一眾曼聯職球員參加，而麥湯文尼就成為球隊最佳，除咗話比大家知，佢係最Fit既一位之餘，嗰個5KM既時間亦都顯示佢既能力，十分驚人。佢身上帶住既手錶就顯示咗麥湯文尼跑咗5.03KM，時間為16:01，即係只用咗16分鐘就完成5000米。驚大家唔知5KM有幾遠，所以計比大家睇。一個運動場圈就400米，佢跑咗5000米，即係兜咗12個半圈。咁到底有幾勁呢？當時就英國報章，太陽報就攞咗個數據做比較，得出結果顯示，當時只有頭27位職業跑手可以成功擊敗麥湯文尼既時間。留意番，手錶顯示麥湯文尼仲要係跑多咗小小，唔係準確地喺5KM就即刻完，太陽報扣番嗰小小距離，得出既結果係15:45已經跑完。重複多次，以上既比較係攞職業跑手唔係職業球員。證明當時既佢，係幾咁厲害。
喺武漢肺炎底下，理論上所有球員理應會走曬樣，不論係身型定係體能，但係無論係身型同體能，麥湯文尼仍然可以Keep到喺一個咁好既狀態，真係無得彈。佢既自律性真係令小編非常佩服。雖然球壇中，能夠繼續保持到狀態，或者能夠改善到身型既球員，一定唔會只係得麥湯文尼。好似拜仁既哥列斯卡同祖雲達斯既C朗都一樣得，但呢一種自律性，呢一種紀律性，真係絕對值得球迷們讚賞。


講咗咁多戰術上、打法上以外既事之後，就講下近年嚟麥湯文尼喺曼聯飾演既角色以及表現。近年嚟，佢喺曼聯都係一個掃蕩型既中場、防守中場或者係一個Box To Box既球員，因為佢既攔截能力非常強，加上體能、跑動量十足，因此打呢一個位置確實係唔錯。另一點就係佢既身高，擁有1米9身高既佢，經常喺中場同對手爭頂一啲門將大腳開出嚟既死球、生球，而爭贏既成功率都唔低，所以喺防守上面，麥湯文尼絕對值得成為球隊既正選成員。

可惜喺進攻方面，麥湯文尼就冇咁出色。雖然佢都有一段時間經常為曼聯入波，但係明顯地佢喺進攻方面始終同普巴、般奴、雲達碧克差幾班波。不過，搵以上三位球員同麥湯文尼比較，都算係唔太公平既。始終麥湯文尼主要唔係進攻嗰方面。麥湯文尼比以上三位球員最缺乏既就係創造力以及護球能力，雖然好多球隊其實都係打三個中場，而配置大多數都係一個防守搭兩個進攻。但係曼聯同其他隊伍相比之下，球隊既創造力都係偏弱，變相球隊對麥湯文尼既要求就要多啲。除咗喺普通傳控方面要做得好之外，仲要有一定要跑動、創意力、遠射等等，簡單嚟講曼聯係需要一個比較全能啲既Box To Box球員，但現時既麥湯文尼只係一個偏向防守多既球員。雖然佢可以飾演Box To Box，但只係一個僅僅合格既Box To Box球員，同曼聯需要既球員好似都係差咗少少。
咁到底麥湯文尼應該點樣去令到自己變得更重要，甚至能夠成為球隊既正選呢？喺不同既方面睇，佢都要不斷進步，包括佢既第一時間傳球、無球跑動、護球等等。但講到佢最需要改善既，一定係長傳球。有一直睇開小編打既文章都知道，現今既足球最著重長傳球，而曼聯喺呢一環入面都算係最弱。儘管般奴加盟之後，明顯有所改善，但係當般奴喺中前場做跑動、配合既時候，球隊就唔能夠依賴般奴作出長傳。令到球隊喺轉換兩邊既時候都非常慢，好多時都需要經過幾個球員，先可以成功將皮球成功由左轉右、右轉左。


而儘管普巴踢得再差、喺場外既表現再差都好，好多領隊都唔選擇收起佢既原因，除咗係因為佢既才能、技術之外，另一點正正就係佢既長傳能力。喺摩連奴時期既普巴，因為球隊當時打防守反擊為主，因此令到長傳顯得更重要。而普巴最強既就係佢既視野、以及長傳非常準繩，因此當時普巴對曼聯嚟講，非常重要。直至去到蘇斯克查帶領，曼聯確實對普巴既需要性減低，因為蘇帥著重短傳滲入，而呢個打法最需要既就係快速傳球。但大家可能唔記得，喺蘇帥正式上任為曼聯領隊之前，已經講過曼聯係需要圍繞住普巴嚟踢。試問一位咁迷普巴既領隊，點會輕易收起佢呢？加上喺現今既足球打法上，就算球隊點樣唔重用長傳都好，長傳都好有價值。好似喺蘇斯克查既戰術入面，雖然唔似摩連奴戰術咁，咁著重長傳，但當面對密集既防守時，快速轉換兩邊就係最好既解決方法。加上蘇斯克查一直希望皮球由龍門或後場傳上去，而普巴既強項就係護球能力、以及將皮球帶出重圍，咁多個條件下，普巴都好似係最合適既人選，試問麥湯文尼又點會有機會呢？
因此麥湯文尼好應該改善佢既長傳球先，當佢能夠有一半普巴既長傳攻力，自自然然就會更加威脅普巴。加上麥湯文尼比普巴最優勝既就係跑動量、防守以及夠爽，當佢有埋普巴既長傳能力，就算技術差少少，唔能夠長時間護球或者帶出重圍，麥湯文尼既重要性都唔會比普巴低。當然，要普巴直直正正失去正選，除咗麥湯文尼要改善佢既問題之外，最重要都係要蘇帥肯放棄佢所謂既最強十一人先。

喺文章開始既時候，小編就輕輕提及過麥湯文尼出任中堅一役，令小編印象深刻。到底係咩原因？曼聯現時一直都希望皮球由後場開始做上去，但係曼聯一直都做唔到，原因係球隊中堅喺用腳能力一直都唔強，加上戰術一塌糊塗，蘇斯克查同哥迪奧拿相比，根本差天共地。喺球員能力以及戰術上已經有好大分野既時候，仲想打到好似曼城咁，簡直係天方夜譚既一回事。而曼聯一直都希望解決呢件事，無論係曼聯球迷定係幾任既曼聯領隊，因此高價收購咗麥佳亞同連迪洛夫。但其實市面上，腳下功夫好，而又有上乘既制空能力既中堅，真係少之又少。
球隊又希望有強既制能力，又希望後場用到波，最後就被逼之下選擇用腳下功夫比較好少少既連迪洛夫，同制空力好少少既麥佳亞。雖然理論上，呢個配置好似毫無破綻，因為佢地可以互補不足。但喺足球場上，理論歸理論，喺場內要面對不同既突發既事情，根本就唔能夠互補不足。但係單純既蘇斯克查就一直以為可以，所以喺英超開季既時候，曼聯既中堅連迪洛夫就喺對水晶宮一役，不斷出現失誤。因為戰術底下，要一個制空力唔高、唔硬朗既中堅面對沙夏、舒立普呢啲對手。而麥佳亞喺對熱刺既一役，就更加唔洗講啦。


單純既蘇斯克查喺呢一方面，明顯就係輸比哥迪奧拿，因為哥迪奧拿一早就知道，根本唔能夠互補不足，所以一直都希望羅致一個非常好既中堅，唔止制空力強，腳下功夫亦都要有。而蘇斯克查就會同大家講，最已陣。呢一個就係兩隊領隊既差距。加上蘇斯克查喺戰術與用人等等，同哥帥比下去。就算曼聯管理層比幾錢領隊用，根本都冇乜可能同鄰居爭好中堅。

既然曼聯喺今夏轉會窗人又買唔到，仲要清走咗史摩寧。其實又會唔會考慮一下麥湯文尼轉打中堅呢？其實情況就好似當時曼城搵費南甸奴打中堅一樣，更較優勝既係麥湯文尼喺制空力方面，仲要唔差。而麥湯文尼喺場內無論係指揮或者鎮定上面，都表現得非常之好。喺速度上、體能上又唔差既時候，其實小編又諗唔到啲乜條件，係佢唔適合轉打中堅。更何況蘇格蘭領隊都已經洞悉到麥湯文尼可以咁打既時候，證明呢個轉變其實係可行嗰喎。再講，麥湯文尼打中堅可以話係百利而無一害。球隊可以繼續貫徹蘇斯克查所謂既戰術，由後場猜上去；中堅又多一員、麥湯文尼既競爭對手又少啲，更容易多啲出場機會等等。


其實麥湯文尼話老一定唔老，但話後生都唔後生，好多好似佢咁上下能力既已經為球隊正選上陣，如果再得唔到正選上陣的話，佢既進步速度再減慢既時候，好有可能下場同曼聯隊內既連加特、皮里拉差唔多。若然幾年之後，仍然冇正選機會的話，佢仲留唔留喺曼聯，相信都係一個需要正視既問題。始終蘇斯克查既用人，大家都有目共睹、心知肚明，一個為曼聯把關，最後為球隊捧起歐霸盃既球員都可以突然棄用既時候，試問仲有啲乜佢做唔出呢？